ຄະນະກວດກາພັກ-ລັດ ແຂວງຈຳປສັກ ລົງຊຸກຍູ້ວຽກງານຮອບດ້ານຢູ່ນະຄອນປາກເຊ ໃນວັນທີ 16 ກຸມພາ ຜ່ານມາ ທີ່ສະໂມສອນຂອງນະຄອນ, ຊຶ່ງນໍາໂດຍທ່ານ ປະດິດ ວັນນະລັດສະໝີ ຄະນະປະຈໍາພັກແຂວງ ປະທານອົງການກວດກາພັກ ຫົວໜ້າອົງການກວດກາລັດ ແຂວງຈຳປາສັກ, ມີທ່ານ ນາງ ພົງພັນ ວິລະພັນ ຮອງເລຂາພັກນະຄອນປາກເຊ ປະທານກວດກາພັກ, ຫົວໜ້າອົງການກວດກາລັດນະຄອນ, ມີບັນດາທ່ານ ປະທານ, ຮອງປະທານ ກວດກາໜ່ວຍພັກສຳນັກງານອົງການ, ຄະນະພັກຮາກຖານກຸ່ມບ້ານ, ອ້ອມຂ້າງນະຄອນເຂົ້າຮ່ວມ

ໃນກອງປະຊຸມ, ນາງ ພົງພັນ ວິລະພັນ ໄດ້ລາຍງານການຈັດຕັ້ງປະຕິບັດວຽກງານກວດກາໃນໄລຍະ 1ປີຜ່ານມາວ່າ: ຄະນະກວດກາ ນະຄອນໄດ້ເອົາໃຈໃສ່ໃນການເຄື່ອນໄຫວຕິດຕາມ ກວດກາເປັນປະຈໍາ. ຜ່ານການຕິດຕາມກວດກາເຫັນໄດ້ວ່າຄະນະພັກ, ຄະນະນຳແຕ່ລະຂັ້ນໄດ້ເປັນເຈົ້າການໃນການຊີ້ນຳ-ນຳພາຄົ້ນຄວ້າເຊື່ອມຊືມຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງ, ກໍຄືມະຕິກອງປະຊຸມໃຫຍ່ຄັ້ງທີ VIIຂອງອົງຄະນະພັກນະຄອນ, ບັນດາມະຕິຄຳສັ່ງ, ຂໍ້ກຳນົດ, ລະບຽບຂອງພັກ, ກົດໝາຍຂອງລັດ, ຄະນະພັກຂັ້ນຕ່າງໆໄດ້ມີການປັບປຸງແບບແຜນວິທີເຮັດວຽກ, ແບບແຜນການຳພາດ້ວຍການສ່ອງແສງລາຍງານຢ່າງເປັນລະບົບຊຶ່ງສະແດງອອກໃນ 1 ປີຜ່ານມາ ຫຼາຍໜ່ວຍພັກໄດ້ສຳເລັດແຜນການດຳເນີນງານຂອງຕົນ, ໃນປີ 2023 ໄດ້ຮັບມະຫາຊົນກ້າວໜ້າເຂົ້າພັກສຳຮອງ, ສຳຮອງຂຶ້ນເປັນສົມບູນ, ເອົາໃຈໃສ່ນຳພາຄົ້ນຄວ້າແກ້ໄຂຄຳຮ້ອງ-ຄຳສະເໜີ ຂອງພົນລະເມືອງ ແລະ ບຸກຄົນ ຈຳນວນ 15 ເລື່ອງ. ໄດ້ຈັດຕັ້ງປະຕິບັດຄົ້ນຄວ້າແກ້ໄຂໄດ້ແລ້ວ 3 ເລື່ອງ, ແຈ້ງຕອບເຈົ້າຂອງຄຳຮ້ອງ 3 ເລື່ອງ, ລາຍງານອົງການກວດກາລັດແຂວງ 1 ເລື່ອງ, ລາຍງານເຈົ້ານະຄອນ 3 ເລື່ອງ,ມາຮອບປັດຈຸບັນແມ່ນຍັງສືບຕໍ່ແກ້ໄຂອີກ 1 ເລື່ອງ

(ຂ່າວ: ຈໍາປາສັກ)