ກອງປະຊຸມສໍາມະນາວິທະຍາສາດ ພາຍໃຕ້ຫົວຂໍ້ "ມູນເຊື້ອ 40 ປີ ແຫ່ງການສ້າງສາພັດທະນາແຂວງເຊກອງ" ຈັດຂຶ້ນໃນວັນທີ 16 ກຸມພາ ນີ້ ທີ່ສະໂມສອນແຂວງເຊກອງ, ພາຍໃຕ້ການເປັນປະທານຂອງທ່ານ ເຫຼັກໄຫຼ ສີວິໄລ ກໍາມະການສູນກາງພັກ ເລຂາພັກແຂວງ ເຈົ້າແຂວງເຊກອງ, ມີແຂກຖືກເຊີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ເຫຼັກໄຫຼ ສີວິໄລ ໄດ້ກ່າວວ່າ: ການສຳມະນາຄັ້ງນີ້ ເປັນຫົວຂໍ້ທີ່ສຳຄັນຢ່າງຍິ່ງ ນອກຈາກຈະໄດ້ຮັບຮູ້ບົດຮຽນທາງດ້ານທິດສະດີ ແລະ ພຶດຕິກຳໃນການນໍາພາ-ຊີ້ນໍາ ກໍຄື ສ້າງສາພັດທະນາແຂວງເຊກອງ ຕະຫຼອດໄລຍະ 40 ປີແລ້ວ, ຍັງເປັນໂອກາດໃນການແລກປ່ຽນບົດຮຽນ ແລະ ປະກອບຄໍາຄິດເຫັນເພື່ອປັບປຸງ ແລະ ຮຽບຮຽງເນື້ອໃນບົດຕ່າງໆ ໂດຍສະເພາະບົດມູນເຊື້ອ, ບົດປາຖະກະຖາ, ບົດປາໄສ ແລະ ອື່ນໆ ເພື່ອຮັບໃຊ້ໃນການສະເຫຼີມສະຫຼອງ ວັນສ້າງຕັ້ງແຂວງເຊກອງ ຄົບຮອບ 40 ປີ ໃຫ້ມີເນື້ອໃນຮັດກຸມ, ຄົບຖ້ວນ, ອຸດົມສົມບູນ ແລະ ຖືກຕ້ອງສອດຄ່ອງກັບຜົນງານຕົວຈິງ, ຮັກສາໄວ້ໃຫ້ເຍົາວະຊົນ-ຄົນຮຸ່ນຫຼັງໄດ້ສຶກສາຮໍ່າຮຽນ ແລະ ຮຽນຮູ້ໃນອະນາຄົດ.
ໃນໂອກາດນີ້, ທ່ານ ບຸນທັນ ຈູມຈັນທະວົງ ກໍາມະການພັກແຂວງ ຫົວໜ້າໂຮງຮຽນການເມືອງ ແລະ ການປົກຄອງແຂວງ ໄດ້ນໍາສະເໜີ ບົດ 40 ປີ ແຫ່ງການພັດທະນາແຂວງເຊກອງ ໂດຍໄດ້ຍົກໃຫ້ເຫັນສະພາບຈຸດພິເສດ, ທີ່ຕັ້ງ ແລະ ການກໍາເນີດ, ຜົນງານການປົກປັກຮັກສາ ແລະ ສ້າງສາພັດທະນາ, ບັນຫາຂໍ້ຫຍຸ້ງຍາກ, ສິ່ງທ້າທາຍ, ບົດຮຽນຕໍ່ການສ້າງສາພັດທະນາແຂວງເຊກອງ ໃນໄລຍະ 40 ປີຜ່ານມາ ແລະ ທິດທາງ, ຄາດໝາຍ ຍຸດທະສາດການພັດທະນາແຂວງເຊກອງໃນຕໍ່ໜ້າ. ພ້ອມນີ້, ຍັງໄດ້ຮັບຟັງການປະກອບຄໍາຄິດເຫັນ ແລະ ນຳສະ  ເໜີຜົນງານການນໍາພາ-ຊີ້ນໍາ ຂອງຄະນະພັກແຂວງແຕ່ລະສະໄໝ ຕໍ່ວຽກງານຂົງເຂດການເມືອງ-ການປົກຄອງ, ເສດຖະກິດ, ວັດທະນະທໍາ-ສັງຄົມ, ປ້ອງກັນຊາດ-ປ້ອງກັນຄວາມສະຫງົບ ແລະ ວຽກງານພົວພັນຮ່ວມມືກັບຕ່າງປະເທດ. ທັງນີ້, ກໍເພື່ອປະກອບສ່ວນເຊີດຊູບົດບາດການນຳພາ-ຊີ້ນໍາ ຂອງຄະນະພັກ-ອົງການປົກຄອງແຂວງ, ປະກອບສ່ວນເຂົ້າໃນການປົກປັກຮັກສາ ແລະ ພັດທະນາແຂວງເຊກອງ ໃຫ້ນັບມື້ດີຂຶ້ນເປັນກ້າວໆ.
(ຂ່າວ-ພາບ: ສັນຍາ)