ເມືອດົນຜ່ານມາ, ກອງຈາລະຈອນ ປກສ ເມືອງວຽງພູຄາ ຫຼວງນ້ຳທາ ໄດ້ອອກກວດກາປະຈຳປ້ອມສີແຍກບ້ານວຽງສະຫວ່າງເທດບານເມືອງໄດ້ພົບເຫັນຜູ້ລະເມີດການສັນຈອນໂດຍການດັດແປງສະພາບເຕັກນິກລົດຈຳນວນ 40 ຄັນ ແລະ ພົບເຫັນຢາສູບໄຟຟ້າຈຳນວນ 2 ຫຼອດ. ຈາກນັ້ນ, ຈຶ່ງໄດ້ເຊີນເອົາພໍ່ແມ່ຜູ້ປົກຄອງພ້ອມດ້ວຍລູກຫຼານຜູ້ທີລະເມີດມາສຶກສາອົບຮົມກ່າວເຕືອນ ໂດຍມີທ່ານ ພັທ ທອງຫອມ ທັນອໍລະພິມ ຄະນະພັກຮາກຖານ ຮອງຫົວໜ້າກອງບັນຊາການ ປກສ ເມືອງ ມີພະນັກງານກອງຈາລະຈອນເຂົ້າຮ່ວມ.
    ພັທ ທອງຫອມ ທັນອໍລະພິມ ໃຫ້ຮູ້ວ່າ: ການທີ່ເຊີນເອົາພໍ່ແມ່ຜູ້ປົກຄອງ ແລະ ຜູ້ທີລະເມີດລະບຽບການສັນຈອນເຂົ້າມາໃນຄັ້ງນີ້, ກໍເພື່ອເປັນການສຶກສາອົບຮົມ ແລະ ກ່າວເຕື່ອນຜູ້ຂັບຂີ່ທີ່ປັບແຕ່ງສະພາບເຕັກນິກລົດ, ລົດດັດແປງໄຟຕາລົດ (ໄຟສີ) ຈຳນວນ 11 ຄັນ, ດັດແປ່ງທໍ່ອາຍເສຍດັງເກີນ 10 ຄັນ, ລົດໄຟຕາບໍ່ຮຸ່ງ ແລະ ໃສ່ຕີນນ້ອຍ 19 ຄັນ ຊຶ່ງເປັນການລະເມີດກົດລະບຽບການສັນຈອນທາງບົກ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ, ຊຶ່ງມີຜູ້ລະເມີດ 40 ຄົນ ອາຍຸ ລະຫວ່າງ 16 ຫາ 20 ປີ, ລົດຈັກທັງ 40 ຄັນ. ຈາກນັ້ນ ກໍໄດ້ສ້າງບົດບັນທຶກ ແລະ ນໍາເອົາເຄື່ອງອາໄລ່ທີຖືກຕ້ອງຕາມສະພາບເຕັກນິກຂອງໂຮງານມາປ່ຽນໃສ່ລົດ ຈຶ່ງອານຸຍາດນຳເອົາລົດອອກໄປຊົມໃຊ້ ພ້ອມນັ້ນ ກໍໄດ້ມອບໃຫ້ພໍ່ແມ່ຜູ້ປົກຄອງສືບຕໍ່ເອົາໃຈໃສ່ໃນການຕິດຕາມສຶກສາອົບຮົມສັງສອນ ແລະ ຄຸ້ມຄອງການຫຼິ້ນການທ່ຽວຂອງລູກຫຼານຕືມອີກ.
    ພ້ອມດຽວກັນນັ້ນ, ທ່ານຍັງໄດ້ຮຽກຮ້ອງຕໍ່ຜູ້ຂັບຂີ່ ຫ້າມດັດແປ່ງເຕັກນິກລົດທຸກປະເພດ, ຫ້າມແຂ່ງລົດ, ຫ້າມຂີ່ລົດເປັນເພິງເປັນແພສ້າງຄວາມຊັບສົນຢູ່ທ້ອງຖະໜົນຫຼວງ, ຫ້າມທ່ຽວເດິກເກີນໂມງເວລາທີ່ທາງການກໍານົດໄວ້, ຖ້າຫາກຜູ້ໃດຝ່າຝືນທາງເຈົ້າໜ້າທີພົບເຫັນຈະໄດ້ດຳເນີນຕາມລະບຽບກົດໝາຍໃນສະຖານໜັກ ຫຼື ເບົ່າ.

(ຂ່າວ:: ຄໍາປິງ)