ໃນໂອກາດລົງຜັນຂະຫຍາຍ ແລະ ໂຄສະນາເຜີຍແຜ່ເນື້ອໃນຜົນສໍາເລັດກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ IIທີ່ເມືອງຍອດອູແຂວງຜົ້ງສາລີ ເມື່ອບໍ່ດົນມານີ້, ທ່ານ ສົມຈິດ ຫັບລະກອນຮອງປະທານສະພາປະຊາຊົນແຂວງຜົ້ງສາລີ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ພ້ອມດ້ວຍຄະນະໄດ້ຖືໂອກາດດັ່ງກ່າວນີ້ ເພື່ອລົງຊຸກຍູ້ ແລະ ຢ້ຽມຢາມປະຊາຊົນເຂດຫ່າງໄກສອກຫຼີກໂດຍສະເພາະໄດ້ໄປຢ້ຽມຢາມຄອບຄົວຂອງທ່ານ ຈັນ ອິນລໍາ, ປະຊາຊົນ ບ້ານ ແກ່ງ, ເມືອງ ຍອດອູແຂວງ ຜົ້ງສາລີຊຶ່ງເປັນຄອບຄົວຕົວແບບໃນການປູກໝາກກ້ຽງ.
ທ່ານ ຈັນ ອິນລໍາ ໃຫ້ຮູ້ວ່າ: ໃນເມື່ອກ່ອນຕົນເອງໄດ້ນໍາພາຄອບຄົວບຸກເບີກເນື້ອທີ່ດິນຂອງຕົນຢູ່ບ້ານແກ່ງ,ໄລຍະທໍາອິດ ແມ່ນໄດ້ເຮັດສວນຢາງພາລາ, ຫຼັງຈາກນັ້ນ ໄດ້ຕັດສິນໃຈນໍາເອົາເບ້ຍຕົ້ນໝາກກ້ຽງ ຈາກ ສປ ຈີນ ມາປູກ ເຊິ່ງໄດ້ໃຊ້ຕົ້ນທຶນທັງໝົດ 12 ລ້ານກວ່າກີບ ເພື່ອນໍາໃຊ້ເຂົ້າໃນການປູກໝາກກ້ຽງ ມີ2 ຊະນິດຄື: ໝາກກ້ຽງຊະນິດນ້ອຍ ແລະ ຊະນິດໃຫຍ່, ມີທັງໝົດ 460 ຕົ້ນ, ໃນເນື້ອທີ່ປະມານ 0,184ເຮັກຕາ, ສາມາດໃຫ້ຜົນຜະລິດໄດ້ເຖິງ 12 ໂຕນ/ປີ ຂາຍໃນລາຄາ 15.000 ກີບ ຫາ 25.000 ກີບ/ກິໂລ, ສ້າງລາຍຮັບໄດ້ເຖິງ 180 ລ້ານກີບ/ປີ, ພາຍຫຼັງຫັກລົບຕົ້ນທຶນອອກແລ້ວຍັງມີກໍາໄລໃນການປູກໝາກກ້ຽງປະມານ167 ລ້ານກວ່າກີບ.
ທ່ານ ຍັງໃຫ້ຮູ້ຕື່ມອີກວ່າ: ນອກຈາກນີ້ແລ້ວ, ຍັງມີລາຍຮັບຈາກການຜະລິດກະສິກໍາອຶ່ນໆ ເຊັ່ນ: ລາຍຮັບຈາກການຂາຍນໍ້າຢາງພາລາໃນເນື້ອທີ່ປະມານ 1,7ເຮັກຕາ, ມີ 800 ຕົ້ນ ໄດ້ 9 ໂຕນ/ປີ,ຂາຍໃນລາຄາ 10.000 ກີບ/ກິໂລ ລວມເປັນເງິນໄດ້ 90 ລ້ານກີບ/ປີ, ລາຍຮັບຈາກການຂາຍຊາ ໃນເນື້ອທີ່ປະມານ 0,03ເຮັກຕາ, ມີ 500 ຕົ້ນ, ໄດ້ຜົນຜະລິດຊາແຫ້ງ 20 ກິໂລ/ປີ, ຂາຍໃນລາຄາ 250.000 ກີບ/ກິໂລ, ລວມລາຍຮັບທັງໝົດດພາຍໃນຄອບຄົວ 262 ລ້ານກວ່າກີບ/ປີ.
ຈາກປະສົບການກໍຄືຜົນສໍາເລັດໃນການປູກໝາກກ້ຽງ ແລະ ໄມ້ອຸດສາຫະກໍາເຮັດໃຫ້ຄອບຄົວມີແຮງຈູງໃຈຂະຫຍາຍສວນໝາກກ້ຽງອີກຕໍ່ໄປ ແລະ ສາມາດຢັ້ງຢືນໄດ້ວ່າເນື້ອທີ່ດິນຂອງເມືອງຍອດອູ ໂດຍສະເພາະບ້ານແກ່ງ ສາມາດປູກໝາກກ້ຽງເປັນສິນຄ້າທີ່ຍືນຍົງໃນອານາຄົດໄດ້ ແລະ ນີ້ຈະກາຍເປັນຈຸດລິເລີ່ມໃຫ້ຄອບຄົວອຶ່ນໆນໍາໄປເປັນບົດຮຽນເພື່ອລົງທຶນປູກໝາກກ້ຽງກາຍເປັນສິນຄ້າສໍາຄັນຂອງເມືອງຍອດອູ ກໍຄືແຂວງຜົ້ງສາລີ ໃນອານາຄົດ.
(ພາບ-ຂ່າວ: ພອນແກ້ວປະເສີດ ສຸລິວົງ)