ເມື່ອບໍ່ດົນມານີ້, ທີ່ສູນບັນຊາກອງບັນຊາການທະຫານແຂວງບໍ່ແກ້ວ ໄດ້ຈັດພິທີເຜີຍແຜ່ກົດໝາຍວ່າດ້ວຍອົງການໄອຍະການທະຫານ (ສະບັບປັບປຸງປີ 2022), ໂດຍພາຍໃຕ້ການເປັນປະທານຂອງສະຫາຍ ພົນຈັດຕະວາ ສີໄຫວ ໄມພອນ ຄະນະພັກກົມໃຫຍ່ການເມືອງກອງທັບ ຮອງຫົວໜ້າອົງການໄອຍະການປະຊາຊົນສູງສຸດ ຫົວໜ້າອົງການໄອຍະການທະຫານຂັ້ນສູງ, ເຂົ້າຮ່ວມມີສະຫາຍ ພັນໂທ ເຄນ ແກ້ວດາລາ ຄະນະພັກກອງບັນຊາການ ຮອງຫົວໜ້າຫ້ອງການເມືອງ ກອງບັນຊາການທະຫານແຂວງບໍ່ແກ້ວ, ມີຄະນະພັກ-ຄະນະບັນຊາ 6 ຫ້ອງ, ຫົວໜ້າພະແນກ-ຮອງພະແນກ ຕະຫຼອດຮອດ ພະນັກງານວິຊາການທີ່ກ່ຽວຂ້ອງເຂົ້າຮ່ວມຮັບຝັງ.
ສະຫາຍ ພັນໂທ ອໍາພອນ ທໍາມະວົງ ຫົວໜ້າຫ້ອງການ ອົງການໄອຍະການທະຫານຂັ້ນສູງ ໄດ້ເຜີຍແຜ່ກົດໝາຍວ່າດ້ວຍອົງການໄອຍະການທະຫານ (ສະບັບປັບປຸງ) ປະກອບມີ 9 ພາກ, 9 ໝວດ, 66 ມາດຕາ. ກົດໝາຍສະບັບນີ້, ກໍານົດຫຼັກການ, ລະບຽບການ ແລະ ມາດຕະການກ່ຽວກັບການຈັດຕັ້ງ, ການເຄື່ອນໄຫວ ແລະ ການຕິດຕາມກວດກາຂອງອົງການໄອຍະການທະຫານ. 
ທ້າຍພິທີ, ສະຫາຍ ພົນຈັດຕະວາ ສີໄຫວ ໄມພອນ ໄດ້ຮຽກຮ້ອງໃຫ້ ຄະນະພັກ-ຄະນະບັນຊາ ນໍາເອົາເນື້ອໃນກົດໝາຍດັ່ງກ່າວໄປຈັດຕັ້ງຜັນຂະຫຍາຍໃຫ້ກວ້າງຂວາງເລິກເຊິ່ງ, ສອດຫ້ອຍເຂົ້າໃນທຸກຂົງຂົງເຂດວຽກງານ ແລະ ພ້ອມກັນຜັນຂະຫຍາຍໃຫ້ເຂົ້າສູ່ຊິວິດຕົວຈິງ, ຕິດພັນກັບການປະຕິບັດໜ້າວິຊາສະເພາະ, ມີສະຕິເຄົາລົບກົດ ໝາຍ, ຄຽງຄູ່ກັບການກໍ່ສ້າງໜ່ວຍພັກປອດໃສ ເຂັ້ມແຂງ ໜັກແໜ້ນ, ກໍ່ສ້າງກອງປອດໃສ ປອດໄພ ປອດຄະດີ. ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆທີ່ຄັດກັບລະບຽບກົດໝາຍ, ມີສະຕິຕໍ່ການຈັດຕັ້ງ, ມີຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໝາຍ, ເພື່ອເຮັດໃຫ້ກົມກອງກໍ່ຄືກອງທັບມີຄວາມເຂັ້ມແຂງ ແລະ ມີແບບແຜນທີ່ທັນສະໄໝ.
(ຂ່າວ: ວໍລະສິດ ພິດສະຫາຍ).