ໃນຕອນເຊົ້າວັນທີ 20 ກຸມພານີ້ທີ່ຫ້ອງວ່າການສູນກາງພັກ ໄດ້ຈັດກອງປະຊຸມສໍາມະນາວິທະຍາສາດ ໃນຫົວຂໍໍ້: ຂໍໍ້ສະດວກ, ຂໍໍ້ຫຍຸ້ງຍາກໃນການສະໜອງນໍ້າມັນເຊື້ອໄຟ ໃນໄລຍະຜ່ານມາ ແລະ ທິດທາງໃນການແກ້ໄຂໃນຕໍໍ່ໜ້າ,ໂດຍການເປັນປະທານຂອງ ສະຫາຍ ທອງສະລິດ ມັງໜໍ່ເມກຄະນະເລຂາທິການສູນກາງພັກຫົວໜ້າຫ້ອງວ່າການສູນກາງພັກ, ພ້ອມດ້ວຍບັນດາລັດຖະມົນຕີ, ບັນດາກົມວິຊາການ ຈາກກະຊວງອຸດສາຫະກໍາ ແລະ ການຄ້າ, ກະຊວງພະລັງງານ ແລະ ບໍໍ່ແຮ່, ກະຊວງການເງິນທະນາຄານແຫ່ງ ສປປ ລາວ, ຫ້ອງວ່າການສໍານັກງານນາຍົກລັດຖະມົນຕີ, ກໍາມາທິການເສດຖະກິດ, ສະພາແຫ່ງຊາດ ເຂົ້າຮ່ວມ ເພື່ອພ້ອມກັນແລກປ່ຽນຄວາມຄິດຄວາມເຫັນ, ຄົ້ນຄວ້າ ແລະວິເຄາະ-ວິໄຈ ຊອກໃຫ້ເຫັນບັນຫາທີ່ເປັນຂອດອັດຕັນ, ຫຍຸ້ງຍາກ ໃນການສະໜອງນໍ້າມັນເຊື້ອໄຟ ໃນໄລຍະຜ່ານມາ ແລະ ຄົ້ນຄວ້າຊອກຫາທາງອອກ ກໍຄື ທິດທາງແກ້ໄຂການສະໜອງນໍ້າມັນເຊື້ອໄຟ ໃຫ້ມີສະພາບຄ່ອງຕົວກວ່າເກົ່າ.
    ກອງປະຊຸມໄດ້ພ້ອມກັນປຶກສາຫາລື ຄົ້ນຄວ້າ, ວິເຄາະ, ວິໄຈ, ໄຈ້ແຍກສາເຫດຂອງບັນຫາການສະໜອງນໍ້າເຊື້ອໄຟໃນໄລຍະຜ່ານມາ ຢ່າງກົງໄປກົງມາ, ມີວິທະຍາສາດ ເພື່ອເປັນພື້ນຖານສໍາຄັນ ໃນການກໍານົດ, ແນວທາງ, ນະໂຍບາຍ ກໍຄືມາດຕະການ, ວິທີການແກ້ໄຂໃນຕໍ່ໜ້າ. ໂດຍສະເພາະ ແມ່ນການຈັດຕັ້ງຜັນຂະຫຍາຍບັນດາທິດຊີ້ນໍາຂອງສູນກາງພັກ, ກົມການເມືອງ ແລະຄະນະເລຂາທິການສູນກາງພັກ ທີ່ໄດ້ວາງອອກໃນແຕ່ລະໄລຍະ.
    ໃນໂອກາດນີ້, ສະຫາຍ ທອງສະລິດ ມັງໜໍ່ເມກ ຍັງໄດ້ຮຽກຮ້ອງໃຫ້ບັນດາກະຊວງ-ອົງການທີ່ກ່ຽວຂ້ອງ ຕ້ອງເອົາໃຈໃສ່ຜັນຂະຫຍາຍບັນດາທິດນໍາຂອງພັກ ຢ່າງເຂັ້ມງວດ, ພ້ອມທັງກວດກາຄືນບັນດາຈຸດອ່ອນ, ຂໍ້ຄົງຄ້າງ ທີ່ເປັນສິ່ງກີດຂວາງ ໃນການຈັດຕັ້ງປະຕິບັດໜ້າທີ່ວຽກງານ ເພື່ອລາຍງານຕໍ່ກົມການເມືອງ, ຄະນະເລຂາທິການສູນກາງພັກ ໃຫ້ທິດຊີ້ນໍາຢ່າງທັນການ, ຮັບປະກັນການສະໜອງ ນໍ້າມັນເຊື້ອໄຟໃຫ້ມີຄວາມສະຫງົບ ແລະໝັ້ນທ່ຽງ, ຕອບສະໜອງໄດ້ຄວາມຮຽກຮ້ອງຕ້ອງການຂອງການພັດທະນາຂອງປະເທດເຮົາ. 
(ຂ່າວ-ພາບ:ຫ້ອງວ່າການສູນກາງພັກ)