ຂ່າວຕ່າງປະເທດລາຍງານ ໃນວັນທີ 2 ຕຸລາ ຜ່ານມາ, ກະຊວງສາທາລະນະສຸກຂອງບັງກລາເທດ ໄດ້ເປີດເຜີຍບົດລາຍງານໂດຍລະບຸວ່າ: ສະຖານະການການແຜ່ລະບາດຂອງພະຍາດໄຂ້ເລືອດອອກພາຍໃນປະເທດເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 1.006 ຄົນ ເພີ່ມຂຶ້ນ 17 ຄົນ ໃນຮອບ 24 ຊົ່ວໂມງ.
ຂະນະທີ່ສະຖິຕິຄົນເຈັບສະສົມຂອງພະຍາດໄຂ້ເລືອດອອກໃນບັງກລາເທດຢູ່ທີ່ 206.288 ຄົນ ແລະ ປິ່ນປົວດີແລ້ວ 195.925 ຄົນ ທາງດ້ານຄົນເຈັບທີ່ຍັງຄົງປິ່ນປົວຢູ່ໃນໂຮງໝໍສ່ວນຫຼາຍຢູ່ໃນນະຄອນຫຼວງຖາກາ. ສະຖານະການທີ່ເກີດຂຶ້ນຖືວ່າເປັນການແຜ່ລະບາດຂອງພະຍາດໄຂ້ເລືອດອອກຄັ້ງຮຸນແຮງທີ່ສຸດໃນບັງກລາເທດນັບຕັ້ງແຕ່ການແຜ່ລະບາດໃນປີ 2000, ສ່ວນສະຖານະການໆແຜ່ລະບາດຂອງພະຍາດໄຂ້ເລືອດອອກພາຍໃນປະເທດປີ 2022 ມີຜູ້ເສຍຊີວິດຢ່າງໜ້ອຍ 281 ຄົນ. ທັງນີ້, ອົງການອະນາໄມໂລກລະບຸວ່າ: ໄຂ້ເລືອດອອກເຮັດໃຫ້ປະຊາກອນໂລກເສຍຊີວິດເຖິງປີລະ 50-100 ລ້ານຄົນ ສ່ວນຫຼາຍເປັນພົນລະເມືອງທີ່ອາໄສຢູ່ໃນປະເທດທີ່ມີອຸນຫະພູມອາກາດຮ້ອນຊຸ່ມ ໂດຍອາການຄົນເຈັບທຳອິດຈະມີອາການເຈັບຫົວ, ປວດຕາມຕົນໂຕ, ມີໄຂ້ ແລະ ມີຕຸ່ມແດງຕາມຮ່າງກາຍ ແຕ່ຖ້າຫາກປະໃຫ້ອາການຮຸນແຮງອາດຈະເຮັດໃຫ້ເກີດພາວະເກັດເລືອດຕ່ຳ ແລະ ຄວາມດັນເລືອດຕ່ຳຈົນຊັອກ ແລະ ເສຍຊີວິດ.
