ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 2 ຕຸລາ ຜ່ານມາ ຢູ່ ຮ່າໂນ້ຍ, ກອງປະຊຸມຄັ້ງທີ 8 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ XIII ໄດ້ເປີດຂຶ້ນຢ່າງສົມກຽດ ພາຍໃຕ້ການເປັນປະທານຂອງທ່ານ ຫງວຽນຝູຈ້ອງ ເລຂາທິການໃຫຍ່ພັກກອມມູນິດ ຫວຽດນາມ.

ຂ່າວລະບຸວ່າ: ທ່ານ ຫງວຽນຝຸຈ້ອງ ກ່າວຄຳເຫັນເປີດກອງປະຊຸມວ່າ: ກອງປະຊຸມຄັ້ງນີ້ຈະພິຈາລະນາ, ຕັດສິນຫຼາຍບັນຫາສຳຄັນ ແລະ ມີຄວາມໝາຍສຳຄັນທີ່ສຸດ, ກ່ຽວຂ້ອງເຖິງການປະຕິບັດສຳເລັດໜ້າທີ່ການເມືອງຂອງຄະນະບໍລິຫານງານສູນກາງພັກ ຊຸດທີ XIII ແຕ່ປັດຈຸບັນຮອດໝົດອາຍຸການ. ນັ້ນແມ່ນສະພາບການເສດຖະກິດ - ສັງຄົມ, ງົບປະມານແຫ່ງລັດປີ 2023, ແຜນການປີ 2024; ແຜນການການເງິນ - ງົບປະມານແຫ່ງລັດ 3 ປີ 2024 – 2026 ແລະ ວິວັດການປະຕິບັດລະບົບເງິນເດືອນໃໝ່, ສະຫຼຸບ 10 ປີແຫ່ງການປະຕິບັດມະຕິກອງປະຊຸມ ຄັ້ງທີ 5 ຂອງ ຄະນະບໍລິຫານງານສູນການພັກຊຸດທີ XI ກ່ຽວກັບບາງບັນຫານະໂຍບາຍສັງຄົມ ໄລຍະ 2012 – 2020.

ທ່ານ ຫງວຽນຝຸຈ້ອງ ຊີ້ແຈ້ງວ່າ: ຕ້ອງມີການໄຈ້ແຍກສະພາບການພາຍໃນປະເທດ, ສາກົນຢ່າງເຖິງກົກເຖິງປາຍ, ເຫັນໄດ້ບັນດາການປ່ຽນແປງທີ່ເລິກເຊິ່ງ, ການຜັນແປທີ່ສັບສົນ, ຍາກທີ່ຈະຄາດຄະເນລ່ວງໜ້າໄດ້ ແລະ ຄາດຄະເນໄດ້ທ່າອ່ຽງພັດທະນາໃນໄລຍະຈະມາເຖິງ ເພື່ອມີການເພີ່ມເຕີມຢ່າງທັນການ, ພັດທະນາບາງທັດສະນະ, ແນວຄິດຊີ້ນຳ ແລະ ປັບປຸງບາງໜ້າທີ່, ວິທີການແກ້ໄຂຫຼັກທີ່ເໝາະສົມກັບສະພາບການໃໝ່. ສຸມໃສ່ເຮັດໃຫ້ບັນດາຂໍ້ສະດວກ, ໂອກາດທີ່ຕ້ອງກຳແໜ້ນ, ບັນດາຄວາມຫຍຸ້ງຍາກ, ສິ່ງທ້າທາຍ ທີ່ຕ້ອງຜ່ານຜ່າເພື່ອເປັນເຈົ້າການໂດຍໄວ; ໃນທຸກກໍລະນີແມ່ນລ້ວນແຕ່ປົກປ້ອງເອກະລາດ, ອະທິປະໄຕ, ຄວາມເປັນເອກະພາບ, ຜືນແຜ່ນດິນອັນຄົບຖ້ວນຂອງປະເທດຊາດຢ່າງໝັ້ນແກ່ນ; ປົກປ້ອງພັກ, ລັດ, ປະຊາຊົນ ແລະ ລະບົບສັງຄົມນິຍົມ; ປົກປ້ອງຜົນປະໂຫຍດຂອງປະເທດຊາດ.