ອັດຕາເງິນເຟີ້ຂອງ ສປປ ລາວ ໃນເດືອນກຸມພາ 2024 ເພີ່ມຂຶ້ນ 25,4% ເມື່ອທຽບກັບໄລຍະດຽວກັນຂອງປີຜ່ານມາ. ແຕ່ເມື່ອທຽບກັບເດືອນຜ່ານມາ ເພີ່ມຂຶ້ນ 2,1%. 

ອີງຕາມບົດລາຍງານຂອງສູນສະຖິຕິແຫ່ງຊາດ ກະຊວງແຜນການ ແລະ ການລົງທຶນ ໃຫ້ຮູ້ວ່າ: ອັດຕາເງິນເຟີ້ ຂອງ ສປປ ລາວ ໃນເດືອນກຸມພາ 2024 ແມ່ນສືບຕໍ່ເພີ່ມຂຶ້ນຢູ່ໃນລະດັບ 25,4% (ເດືອນມັງກອນ 2024 ຢູ່ໃນລະດັບ 24,4%) ໃນນັ້ນ, ໝວດສິນຄ້າທີ່ມີອັດຕາເງິນເຟີ້ເພີ່ມຂຶ້ນສູງແມ່ນ ໝວດຮ້ານອາຫານ ແລະ ໂຮງແຮມ ເພີ່ມຂຶ້ນ 35,1%, ໝວດເຄື່ອງນຸ່ງຫົ່ມ ແລະ ເກີບ ເພີ່ມຂຶ້ນ 35,1%, ໝວດຮັກສາສຸຂະພາບ ແລະ ຢາ ເພີ່ມຂຶ້ນ 32,5%, ໝວດສະບຽງອາຫານ ແລະ ເຄື່ອງດື່ມທີ່ບໍ່ມີທາດເຫຼົ້າ ເພີ່ມຂຶ້ນ 25,5%, ໝວດຄົມມະນາຄົມ ແລະ ການຂົນສົ່ງ ເພີ່ມຂຶ້ນ 22,6%.

ເມື່ອສັງເກດການປ່ຽນແປງຂອງລາຄາສິນຄ້າເດືອນຕໍ່ເດືອນ ເຫັນວ່າຍັງສືບຕໍ່ເພີ່ມຂຶ້ນສູງກວ່າເດືອນຜ່ານມາ ຊຶ່ງເພີ່ມຂຶ້ນ 2,1% ໃນນັ້ນ, ໝວດສິນຄ້າທີ່ມີການປ່ຽນແປງຫຼາຍກວ່າໝູ່ແມ່ນ ໝວດທີ່ພັກອາໄສ, ນໍ້າປະປາ, ໄຟຟ້າ ແລະ ເຊື້ອເພີງຫຸງຕົ້ມ ເພີ່ມຂຶ້ນ 3,1%, ອັນພົ້ນເດັ່ນແມ່ນ ຄ່າເຊົ່າຫ້ອງ ເພີ່ມຂຶ້ນ 4,2%, ຊີມັງ ເພີ່ມຂຶ້ນ 5%, ໄມ້ແປຮູບ ເພີ່ມຂຶ້ນ 4,8%, ຫີນແຮ່ ແລະ ຊາຍ ເພີ່ມຂຶ້ນ 2,6%, ຮອງລົງມາແມ່ນໝວດ ເຫຼົ້າ ແລະ ຢາສູບ ເພີ່ມຂຶ້ນ 2,8% ພົ້ນເດັ່ນແມ່ນ ລາຄາເຫຼົ້າ ເພີ່ມຂຶ້ນ 1,7%, ວາຍ ເພີ່ມຂຶ້ນ 3,6%, ເບຍ ເພີ່ມຂຶ້ນ 1,5%, ໝວດເຄື່ອງນຸ່ງຫົ່ມ ແລະ ເກີບ ເພີ່ມຂຶ້ນ 2,5% ໃນນັ້ນ ພົ້ນເດັ່ນແມ່ນ ສົ້ງຢີນ ເພີ່ມຂຶ້ນ 4,5%, ເສືອຢືດ ເພີ່ມຂຶ້ນ 4,4%, ເສື້ອເຊີດ ເພີ່ມຂຶ້ນ 2,5%, ໝວດບັນເທີງ ແລະ ການພັກຜ່ອນ ເພີ່ມຂຶ້ນ 2,3%, ໃນນັ້ນ ພົ້ນເດັ່ນແມ່ນ ໂທລະທັດ ເພີ່ມ ຂຶ້ນ 3,1%, ຄອມພິວເຕີ ເພີ່ມຂຶ້ນ 1,9%, ປຶ້ມຂຽນ ເພີ່ມຂຶ້ນ 1,7%, ໝວດສະບຽງອາຫານ ແລະ ເຄື່ອງດື່ມບໍ່ມີ ທາດເຫຼົ້າ ເພີ່ມຂຶ້ນ 2,2%, ໃນນັ້ນ ພົ້ນເດັ່ນແມ່ນ ເຂົ້າສານຈ້າວ ເພີ່ມຂຶ້ນ 6,8%, ຊີ້ນໝູ ເພີ່ມຂຶ້ນ 0,8%, ຊີ້ນງົວ ເພີ່ມຂຶ້ນ 2,7%, ປານິນລ້ຽງ ເພີ່ມຂຶ້ນ 3,5%.

ການເພີ່ມຂຶ້ນຂອງອັດຕາເງິນເຟີ້ໃນເດືອນກຸມພາຕົ້ນຕໍມາຈາກ: (1) ສະພາບຄວາມຕ້ອງການຂອງສັງຄົມເພີ່ມຂຶ້ນ ຈາກການຈັດກິດຈະກຳງານເທດສະການຕ່າງໆ ເຊັ່ນ: ປີໃໝ່ຫວຽດນາມ, ປີໃໝ່ຈີນ. ດັ່ງນັ້ນ, ຈຶ່ງເຮັດໃຫ້ລາຄາສິນຄ້າ ໂດຍສະເພາະແມ່ນ ລາຄາອາຫານສົດ ເພີ່ມຂຶ້ນ; (2) ການເພີ່ມຂຶ້ນຂອງລາຄານໍ້າມັນເຊື້ອໄຟທີ່ເປັນປັດໄຈໜຶ່ງຂອງຕົ້ນທຶນການຜະລິດ ແລະ ການບໍລິການ ໃນນັ້ນ ນໍ້າມັນກະຊວນເພີ່ມຂຶ້ນ 7% ແລະ ນໍ້າມັນແອັດຊັງທໍາມະດາເພີ່ມຂຶ້ນ 5%; (3) ສະພາບອັດຕາແລກປ່ຽນເງິນກີບທຽບກັບເງິນຕາຕ່າງປະເທດອ່ອນຄ່າລົງ ເຊັ່ນ: ອັດຕາແລກປ່ຽນເງິນກີບ ອ່ອນຄ່າ -1,70% ເມື່ອທຽບກັບເງິນໂດລາ ແລະ -0,61% ເມື່ອທຽບກັບສະກຸນເງິນບາດ.

ຂ່າວ: ຄ. ຄຳປະສິດ