ກອງປະຊຸມໃຫ່ຍສະມາຊິກຊາວໜຸ່ມໜ່ວຍຮາກຖານຫ້ອງວ່າການເມືອງໄຊຍະບູລີ ແຂວງໄຊຍະບູລີ ຄັ້ງທີ IX ໄດ້ຈັດຂຶ້ນໃນວັນທີ 29 ກຸມພາຜ່ານມາ ທີ່ຫ້ອງປະຊຸມຫ້ອງວ່າການເມືອງ ໂດຍພາຍໃຕ້ການເປັນປະທານຂອງສະຫາຍ ພົງເພັດ ສຸກຖາວອນ ເລຂາຊາວໜຸ່ມໜ່ວຍຮາກຖານຊາວໜຸ່ມ ຫ້ອງວ່າການເມືອງ, ເປັນກຽດເຂົ້າຮ່ວມມີສະຫາຍ ຄໍາພຸດ ອິນທະວົງ ຄະນະປະຈໍາພັກເມືອງ ຮອງເຈົ້າເມືອງ ຜູ້ຊີ້ນໍາວຽກງານຂົງເຂດເສດຖະກິດ, ມີສະຫາຍ ນາງ ບົວວົງ ສີຕັນ ເລຂາຄະນະບໍລິຫານງານຊາວໜຸ່ມເມືອງໄຊຍະບູລີ, ມີແຂກທີ່ຖືກເຊີນ ແລະ ສະມາຊິກຊາວໜຸ່ມພາຍໃນໜ່ວຍເຂົ້າຮ່ວມ.

 ໃນກອງປະຊຸມ ສະຫາຍ ພົງເພັດ ສຸກຖາວອນ ເລຂາໜ່ວຍຮາກຖານຊາວໜຸ່ມ ຫ້ອງວ່າການເມືອງໄດ້ຂຶ້ນ ຜ່ານບົດລາຍງານການເມືອງທັງສອງພາກ ບາງຕອນກ່າວວ່າ: ໜ່ວຍຊາວໜຸ່ມຫ້ອງວ່າການເມືອງ ເປັນໜ່ວຍໜຶ່ງທີ່ເຄື່ອນໄຫວພາຍໃຕ້ການຊີ້ນຳ-ນຳພາຂອງຄະນະພັກຫ້ອງວ່າການເມືອງ. ໜ່ວຍຊາວໜຸ່ມໄດ້ຖືເອົາວຽກງານສຶກສາອົບຮົມການເມືອງແນວຄິດ, ເປັນຕົ້ນແມ່ນໄດ້ເຂົ້າຮ່ວມຄົ້ນຄ້ວາຮໍ່າຮຽນເຊື່ອມຊຶມແນວທາງນະໂຍບາຍຂອງພັກ, ຂອງຊາດ, ຂອງກອງທັບປະຊາຊົນລາວ, ວັນສ້າງຕັ້ງພັກ, ວັນສ້າງຕັ້ງຊາວໜຸ່ມ ປະຊາຊົນປະຕິວັດລາວ ແລະ ວັນສໍາຄັນອື່ນໆ ໂດຍຕິດພັນກັບເນື້ອໃນຂໍ້ແຂ່ງຂັນ 4 ບຸກ. ໃນໄລຍະ 5 ປີຜ່ານມາໄດ້ນໍາພາປະເມີນຂໍ້ແຂ່ງຂັນ 4 ບຸກໄດ້ 5 ຄັ້ງ. ມີຜູ້ເຂົ້າຮ່ວມປະເມີນທັງໝົດ 75 ເທື່ອຄົນ, ໄດ້ປະເພດ ແຂງ 75 ເທື່ອຄົນ; ສັງລວມທັງ 4 ດ້ານປະຕິບັດໄດ້ 100%; ຜ່ານການປະເມີນຂໍ້ແຂ່ງຂັນ 4 ບຸກສາມາດຢັ້ງຢືນໜ່ວຍຊາວໜຸ່ມຫ້ອງວ່າການ ເປັນໜ່ວຍຊາວໜຸ່ມ 4 ບຸກ ແລະ ໄດ້ຮັບການຍ້ອງຍໍຂັ້ນຕ່າງໆຄື: ຂັ້ນສູນກາງ 4 ສະຫາຍ ຍິງ 1 ສະຫາຍ, ຂັ້ນແຂວງ 23 ສະຫາຍ ຍິງ 7 ສະຫາຍ. ຈາກນັ້ນ, ໃນກອງປະຊຸມ ຍັງໄດ້ຄັດເລືອກເອົາຄະນະໜ່ວຍຊາວໜຸ່ມຊຸດໃໝ່, ຊຶ່ງໃນກອງປະຊຸມໄດ້ເປັນເອກະພາບ ປະຊາມະຕິເລືອກເອົາສະຫາຍ ວັນສຸກ ວິໄລວັນ ເປັນເລຂາ, ສະຫາຍ ນາງ ປູນໍາ ສີປະເສີດ ເປັນຮອງເລຂາ.

(ຂ່າວ-ພາບ: ລ້ານ)