ກອງປະຊຸມ ສາມັນຄົບຄະນະບໍລິຫານງານອົງການພຸດທະສາສະໜາສໍາພັນລາວ ອພສ ເຂວງສາລະວັນ ຄັ້ງທີ 4 ສະໄໝທີ 8 ປະຈໍາປີ 2023 ຂຶ້ນໃນວັນທີ 29 ກຸມພາຜ່ານມາ ທີ່ຫ້ອງປະຊຸມພະແນກອຸດສາຫະກຳ ແລະ ການຄ້າແຂວງສາລະວັນ ໂດຍການເປັນປະທານຂອງ ພະອາຈານໃຫຍ່ ສອນໄຊ ແກ້ວເມືອງໃຕ້ ກຳມະການສູນກາງ ອພສ ປະທານ ອພສ ແຂວງສາລະວັນ, ໂດຍເປັນກຽດເຂົ້າຮ່ວມຂອງ ພະອາຈານໃຫຍ່ ມະຫາສຸວັນ ຈັນທະລາດ ຄະນະບໍລິຫານງານປະຈຳການ ສູນກາງ ອພສ ອົງຊ່ວຍປະທານ ສູນກາງ ອພສ ຮັບຜິດຊອບບັນດາເເຂວງພາກໃຕ້ ປະທານ ອພສ ແຂວງຈຳປາສັກ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

     ພິທີພຣະອາຈານ ແສງມະນີ ສຸວິໄລຄໍາ ຄະນະປະຈໍາ ອພສ ແຂວງ ຫົວໜ້າຫ້ອງການບໍລິຫານງານ ອພສ ແຂວງສາລະວັນ ໄດ້ຜ່ານບົດສະຫຼຼູບລາຍງານຕີລາຄາ ການຈັດຕັ້ງປະຕິບັດຕາມເນື້ອໃນຈິດໃຈຂອງມະຕິກອງປະຊຸມໃຫຍ່ສະໄໝທີ 8 ຂອງອົງການພຸດທະສາສະໜາສັມພັນລາວ ເເຂວງສາລະວັນ ໃນໄລຍະ 1 ປີຜ່ານມາ ແລະ ທິດທາງແຜນການປະຈຳປີ 2024 ຊຶ່ງມີຫຼາຍດ້ານທີ່ພົ້ນເດັ່ນເປັນຕົ້ນແມ່ນ: ວຽກງານປົກຄອງສົງໄດ້ເອົາໃຈໃສ່ຕິດຕາມກວດກາ, ຄຸ້ມຄອງ ພະສົງ-ສາມະເນນ, ພໍ່ຂາວ-ແມ່ຂາວ ຢ່າງເປັນລະບົບຕາມທໍາມະນູນສົງລາວ ຕິດພັນກັບການປັບປຸງລະບົບການຈັດຕັ້ງ ແລະ ສັບຊ້ອນພະສົງ ເຂົ້າໃນລະບົບການຈັດຕັ້ງໃຫ້ມີຄວາມເຕີບໃຫຍ່ ໜັກແໜ້ນເຂັ້ມແຂງຂຶ້ນໄປເລື້ອຍໆ.

ປັດຈຸບັນທົ່ວເເຂວງມີວັດທັງໝົດ 383 ວັດ, ວັດຮ້າງ 29 ວັດ ພະສົງ 1.160 ອົງ. ໃນນັ້ນ, ພິກຂຸ 559 ອົງ, ສາມະເນນ 601 ອົງ, ວຽກງານການສຶກສາສົງ ມີໂຮງຮຽນສົງທັງໝົດ 5 ແຫ່ງ, ຄູສອນ 61 ອົງ/ທ່ານ. ວຽກງານພົ້ນເດັ່ນ ແມ່ນດ້ານການສ້າງສາພັດທະນາແຕ່ລະວັດທົ່ວແຂວງ ລວມມູນຄ່າ 21.292.666.497 ກີບ. ໃນສົກປີ 2023-2024 ກໍາມາທິການເຜີຍແຜ່ແມ່ນໄດ້ເອົາໃຈໃສ່ຈັດຕັ້ງເຜີຍແຜ່ພະທໍາຄໍາສອນໃນທາງພຸດທະສາສະໜາໃນວັນສຳຄັນຕ່າງໆ.

ໃນກອງປະຊຸມ, ພະອາຈານໃຫຍ່ ມະຫາສຸວັນ ຈັນທະລາດ ໄດ້ເນັ້ນໃຫ້ ອພສ ເເຂວງຫຼາຍດ້ານ ເພື່ອເປັນບ່ອນອິ່ງໃນການຈັດຕັ້ງປະຕິບັດໃຫ້ຄະນະບໍລິຫານງານ ອພສ ເເຂວງ ເພື່ອນຳໄປຜັນຂະຫຍາຍເປັນເເຜນການດຳເນີນງານໃຫ້ລະອຽດໃນການຈັດຕັ້ງປະຕິບັດໃຫ້ປະສົບຜົນສຳເລັດເປັນຢ່າງດີ.

  (ຂ່າວ: ສິດທິໄຊ ແກ້ວທ່ອນຈັນ)