ກອງປະຊຸມສະຫຼູບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ແລະ ທິດທາງແຜນການ ປະຈໍາປີ 2024 ຂອງເມືອງທຸລະຄົມ ແຂວງວຽງຈັນ ຈັດຂຶ້ນໃນວັນທີ 29 ກຸມພາຜ່ານມາ ທີ່ສະໂມສອນຫ້ອງວ່າການເມືອງ, ພາຍໃຕ້ການເປັນປະທານຂອງທ່ານ ກິຄໍາ ວົງໄຊ ຮອງເຈົ້າເມືອງທຸລະຄົມ, ມີແຂກຖືເຊີນ ແລະ ພາກສ່ວນກ່ຽວຂ້ອງຈາກແຂວງ-ເມືອງເຂົ້າຮ່ວມ.

 ທ່ານ ຄອນເກດ ສີສະນະມຸງຄຸນ ຫົວໜ້າຫ້ອງການ ການເງິນເມືອງທຸລະຄົມ ໄດ້ຜ່ານບົດສະຫຼູບການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2023 ແລະ ທິດທາງແຜນການ ປະຈໍາປີ 2024, ໂດຍໄດ້ເອົາໃຈໃສ່ຜັນຂະຫຍາຍຈັດຕັ້ງປະຕິບັດຄໍາແນະນໍາຂອງທ່ານເຈົ້າແຂວງວຽງຈັນ ເລກທີ 004/ຈຂ.ວຈ ລົງວັນທີ 15 ກຸມພາ 2023 ວ່າດ້ວຍການຈັດຕັ້ງປະຕິບັດແຜນງົບປະມານແຫ່ງລັດ ຄຽງຄູ່ກັບແຜນພັດທະນາເສດຖະກິດສັງຄົມ 5 ປີ ຊຶ່ງຮັບຮອງໃນກອງປະຊຸໃຫຍ່ອົງຄະນະພັກເມືອງທຸລະຄົມຄັ້ງທີ VII. ໃນປີ 2023 ທີ່ຜ່ານມາ ພາຍໃຕ້ການຊີ້ນາ-ນໍາພາຂອງຄະນະປະຈໍາພັກເມືອງ ແລະ ຄະນະນໍາພະແນກການເງິນແຂວງວຽງຈັນ ກໍຄືຄວາມພະຍາຍາມສູ້ຊົນຂອງຫ້ອງການ ການເງິນເມືອງ ສາມາດຜ່ານຜ່າຂໍ້ຫຍຸ້ງຍາກ, ອຸປະສັກຕ່າງໆໃນການຈັດເກັບລາຍຮັບເຂົ້າງົບປະມານ ແລະ ຄຸ້ມຄອງລາຍຈ່າຍ ຕາມຄາດໝາຍທີ່ວາງໄວ້ເປັນຢ່າງດີ, ຊຶ່ງສະແດງອອກໃນບົດສະຫຼູບທີ່ນໍາສະເໜີຕໍ່ກອງປະຊຸມ; ໃນງົບປະມານປີ 2023 ແຜນການຈັດເກັບລາຍຮັບເບື້ອງຕົ້ນທີ່ແຂວງມອບໃຫ້ 7.796.464.000 (ໃນນັ້ນດັດແກ້ເພີ່ມ ຈໍານວນ 561.000.000 ກີບ) ລວມທັງໝົດ 8.357.464.000 ກີບ. ຜ່ານການຈັດເກັບລາຍຮັບໝົດປີ 2023 ໄດ້ 8.962.817.427 ເທົ່າກັບ 107,24% ຂອງແຜນ ທຽບໃສ່ການຈັດຕັ້ງປະຕິບັດປີຜ່ານມາເພີ່ມຂຶ້ນ 119,75%. 

 ໃນກອງປະຊຸມ ຍັງໄດ້ມອບໃບຍ້ອງຍໍໃຫ້ບັນດາຫ້ອງການ, ຫົວໜ່ວຍທຸລະກິດ ແລະ ບ້ານ ທີ່ສາມາດປະຕິບັດລາຍຮັບເຂົ້າງົບປະມານຄົບຖ້ວນ ແລະ ເກີນແຜນການ.

(ຂ່າວ: ຄໍາພອນ ຈັນທະວົງສັກ, ພາບ: ຫລ້າທໍ່).