ໂດຍ: ຍຸພິນທອງ

ໂຄງການພັດທະນາ ລ້ຽງກຸ້ງນໍ້າຈືດ ແລະ ກະສິກໍາແບບປະສົມປະສານ ຄົບວົງຈອນ ທີ່ໜອງຄັນ ບ້ານນາຕານ ເມືອງໄຊທານີ ນະຄອນຫຼວງວຽງຈັນມີເນື້ອທີ່ທັງໝົດ 45 ເຮັກຕາ ໂດຍໄດ້ຮັບການສໍາປະທານຂອງບໍລິສັດທະເວວ ພັດທະນາກະສິກໍາຄົບວົງຈອນ ແລະ ຜະລິດຕະພັນລາວຈໍາກັດຮ່ວມກັບປະຊາຊົນໄດ້ຮັບການພັດທະນາເປັນຢ່າງດີ.

ທ່ານນາງ ອານິດ ສີວິໄຊປະທານບໍລິສັດທະເວວ ພັດທະນາກະສິກໍາຄົບວົງຈອນ ແລະ ຜະລິດຕະພັນລາວຈໍາກັດໄດ້ໃຫ້ສໍາພາດໃນວັນທີ 29 ກຸມພາຜ່ານມາທີ່ບ້ານນາຕານ ກ່າວວ່າ: ການພັດທະນາເນື້ອທີ່ກະສິກໍາຈະສ້າງປະໂຫຍດມະຫາສານໃຫ້ແກ່ປະຊາຊົນພາຍໃນບ້ານນາຕານໄດ້ຫຼາຍດ້ານເຊັ່ນ: ດ້ານກະສິກໍາໄດ້ສົ່ງອອກ, ຫຼຸດຜ່ອນການນໍາເຂົ້າ; ສອງໃຫ້ປະຊາຊົນມີວຽກເຮັດງານທໍາ ສ້າງລາຍໄດ້ໃຫ້ປະຊາຊົນ ຊຶ່ງເປັນໂຄງການໄລຍະຍາວນານ. ພາຍຫຼັງເຊັນສັນຍາໃນປີ 2021; ສໍາລັບປັດໃຈໃນການສ້າງໂຄງການດັ່ງກ່າວຍ້ອນການນໍາພັກ-ລັດໃຫ້ໂອກາດ ແລະ ຊຸກຍູ້ໃຫ້ຜູ້ປະກອບການທີ່ເປັນນັກທຸລະກິດໃນການພັດທະນາກະສິກໍາເພື່ອໃຫ້ປະຊາຊົນມີອາຊີບໃໝ່ໆ ແລະ ສະຫງວນສະຖານທີ່ໜອງຄັນໄວ້ໃຫ້ສັດນາໆຊະນິດໄດ້ເປັນບ່ອນອາໄສ.

ຈຸດປະສົງຂອງໂຄງການເພື່ອໃຫ້ແມ່ຍິງລາວທຸກຄົນໄດ້ເປັນສ່ວນໜຶ່ງໃນການເຮັດອາຊີບກະສິກໍາທີ່ສະອາດ, ການເຮັດສວນກໍເປັນອາຊີບດັ່ງເດີມຂອງປະຊາຊົນລາວໃນເມື່ອກ່ອນໃນການປູກຝັງ-ລ້ຽງສັດມາຮອດປັດຈຸບັນວຽກກະສິກໍາແມ່ນມີຄວາມສໍາຄັນຫຼາຍ ໂຄງການນີ້ ແມ່ນເປັນໂຄງການທີ່ດີສາມາດຕໍ່ຍອດໃຫ້ປະຊາຊົນເປັນຢ່າງດີ. ເພື່ອອໍານວຍຄວາມສະດວກໃນການຂົນສົ່ງສິນຄ້າຫຼືຜົນຜະລິດອອກຈໍາໜ່າຍເພື່ອໃຫ້ທຸກຄົນໄດ້ທົດລອງກິນວ່າອາຫານທີ່ຜະລິດອອກມາເປັນແນວໃດ. ພ້ອມນີ້ດິນທີ່ເຮັດການຜະລິດກໍຍັງມີຄວາມສະອາດ ກະສິກໍາກໍສະອາດ ຕົນເອງເຫັນຄຸນຄ່າທາງດ້ານນີ້ກໍເລີຍມີແນວຄິດຮ່ວມກັບກຸ່ມບ້ານ ແລະ ປະຊາຊົນພາຍໃນບ້ານນາຕານ ປຶກສາຫາລືແລກປ່ຽນບົດຮຽນເພື່ອໃຫ້ມີບ່ອນຈໍາໜ່າຍຜົນຜະລິດ,ໃຫ້ມີເນື້ອທີ່ປູກຝັງ. ດັ່ງນັ້ນ, ຈຶ່ງໄດ້ສ້າງໂຄງການນີ້ຂຶ້ນມາ.

ພ້ອມນີ້, ເມື່ອມີການພັດທະນາການນຳພັກ-ລັດທຸກຂັ້ນເຫັນເຖິງຄວາມສຳຄັນຂອງປະຊາຊົນ ຈຶ່ງໄດ້ຊຸກຍູ້ ທຶນຮອນ ແນະນໍາຄວາມຮູ້ດ້ານວິຊາການ ບວກກັບປະຊາຊົນພາຍໃນ ແລະ ອໍານາດການປົກຄອງບ້ານປະກອບສ່ວນເປັນແຮງງານສ້າງທາງເປຕົງຮ່ວມກັນກັບພາກລັດ, ທາງປະທານບໍລິສັດກໍໄດ້ປະກອບສ່ວນເພື່ອໃຫ້ເສັ້ນທາງສໍາເລັດຜົນ.

ໂຄງການນີ້ທາງບໍລິສັດເປັນຜູ້ລົງທຶນ ໃຫ້ຄວາມຮູ້ດ້ານເຕັກນິກວິຊາການ, ວຽກການຕະຫຼາດ, ວາງແຜນການຜະລິດໃຫ້ແກ່ປະຊາຊົນ ເພື່ອໃຫ້ຮູ້ການຈໍາໜ່າຍ ໂດຍພຶ້ນຖານປະຊາຊົນພາຍໃນບ້ານໄດ້ມີປະສົບການທາງດ້ານການຜະລິດແລະ ຈໍາໜ່າຍ ພຽງແຕ່ໄດ້ນໍາເອົາລະບົບເຂົ້າມາໃນການວາງແບບແຜນໃຫ້ສ່ວນໃດໜຶ່ງ ເພື່ອປະສົມປະສານໃນການເຮັດກະສິກໍາ ຊຶ່ງຈະນໍາໃຊ້ວິທີແບບທໍາມະຊາດ ເພື່ອເປັນການປະຢັດຕົ້ນທຶນໃນການໃຊ້ຈ່າຍ, ຫຼຸດຜ່ອນການຊື້ຫຼືນໍາເຂົ້າຫຼາຍໆຢ່າງ. ດັ່ງນັ້ນ, ຈຶ່ງໄດ້ນໍາໃຊ້ແບບວິທີປະຖົມປະຖານແບບເກົ່າປະສົມກັບແບບໃໝ່ເພື່ອໃຫ້ເກີດຜົນຜະລິດອອກມາຈໍາໜ່າຍຢ່າງມີຄຸນນະພາບອອກສູ່ສັງຄົມ. ປັດຈຸບັນການດໍາເນີນການຜະລິດແມ່ນນໍາໃຊ້ຕາມແບບແຜນ ກໍເລີຍບໍ່ກ້າວກະໂດດເທື່ອ ເພາະການປະຕິບັດວຽກຕົວຈິງແມ່ນຕ້ອງໃຊ້ເວລາ ຖ້າຜົນຜະລິດເກີດຜົນແລ້້ວຖືວ່າຜ່ານ ຕົ້ນໄມ້ທີ່ນໍາມາປູກ ແມ່ນຈະໄດ້ຜ່ານການທົດລອງປູກກ່ອນ ວ່າເໝາະສົມກັບດິນຫຼືບໍ, ອາກາດແທດເໝາະບໍ່ ເພື່ອບໍ່ໃຫ້ປະຊາຊົນມີຄວາມສ່ຽງຫຼາຍ, ຈຶ່ງຕ້ອງມີການວາງແຜນທີ່ດີ ເປັນຕົ້ນແມ່ນການວິໄຈນໍ້າ, ດິນ ຕົວຢ່າງ. ປັດຈຸບັນການລ້ຽງກຸ້ງເຫັນວ່າຜ່ານແລ້ວ 90%; ຊຶ່ງມີ 4 ປະເພດກຸ້ງຝອຍ, ກຸ້ງເຄຟິດ, ກຸ້ງກ້າມກາມ ໂດຍລ້ຽງແບບວິທີທໍາມະຊາດຊຶ່ງມີ21 ບໍ່; ຊະນິດຜັກກໍເລືອກເອົາຜັກບາງຊະນິດທີ່ແທດເໝາະກັບດິນ.

ທ່ານໃຫ້ຮູ້ຕື່ມວ່າ: ໃນເບື້ອງຕົ້ນແມ່ນທົດລອງປູກຜັກ 8 ຊະນິດ ແຕ່ຜ່ານພຽງ 4 ຊະນິດ ຖືວ່າມີຄວາມຄົງທົນຕໍ່ສະພາບດິນຟ້າອາກາດ ໂດຍບໍ່່ໄດ້ໃຊ້ສານເຄມີໃດໆທັງນັ້ນ ຊຶ່ງປະຊາຊົນກໍໄດ້ຮຽນຮູ້ການເຮັດຝຸ່ນທໍາມະຊາດ. ສະນັ້ນ, ໂຄງການກຳລັງຈະກ້າວເຂົ້າສູ່ໄລຍະທີ 2; ຕອນນີ້ຖືວ່າແຜນການໄລຍະທີໜຶ່ງແມ່ນປະສົບຜົນສໍາເລັດ 30% ຂອງໂຄງການ ຊຶ່ງ, ໃນນັ້ນປະຊາຊົນສາມາດເຮັດຝຸ່ນທໍາມະຊາດເປັນ, ຫຼັກການປູກ, ໂດຍມີຊ່ຽວຊານຈາກຕ່າງປະເທດເຂົ້າມາຊ່ວຍ. ປັດຈຸບັນພືດທີ່ນໍາມາປູກມີ ໝາກກ້ຽງໃຫຍ່, ໝາກມ່ວງ, ໝາກພ້າວພື້ນບ້ານ, ໝາກມີ້ ແລະ ຕົ້ນໄຜ່ທໍາມະຊາດເພື່ອນໍາໄປເປັນຜະລິດຕະພັນຈັກສານເພື່ອຮອງຮັບເຂົ້າໃນໂຄງການໃນອະນາຄົດ. ສໍາຄັນທີ່ສຸດ ເຮົາຕ້ອງເປີດໃຈວ່າສິ່ງທີ່ເຮົາຢາກໄດ້ແມ່ນຫຍັງ,ຈຸດປະສົງຄືອັນໃດ ຄືໂຄງການນີ້ ເນັ້ນໃຫ້ມີຜະລິດຕະພັນເປັນຂອງຕົນ ເພື່ອໃຫ້ເປັນແບບຢ່າງໃຫ້ປະຊາຊົນໃນກຸ່ມບ້ານນາຕານ ເພື່ອສົ່ງຕໍ່ສິ່ງທີ່ດີໆໃຫ້ແກ່ບ້ານອ້ອມຂ້າງທີ່ຢາກຮຽນຮູ້ແລກປ່ຽນຊຶ່ງກັນແລະກັນ.

ທ່ານນາງ ເວີນ ເພຍສາຂາປະຊາຊົນບ້ານນາຕານ ເປັນຜູ້ໜຶ່ງທີ່ເຂົ້າຮ່ວມຢູ່ໃນກຸ່ມກະສິກໍາດັ່ງກ່າວ ເມື່ອກ່ອນປະກອບອາຊີບເຮັດນາພຽງຢ່າງດຽວ ພໍແຕ່ກຸ້ມກິນພາຍໃນຄອບຄົວ ຂາຍກໍບໍ່ໄດ້ຫຼາຍ ພາຍຫຼັງໄດ້ເຂົ້າຮ່ວມໂຄງການນີ້ ແມ່ນໄດ້ຮັບຄວາມຮູ້ໃໝ່ໆຫຼາຍຢ່າງໃນການປູກຝັງ, ບົວລະບັດຮັກສາພືດ ໂດຍມີນັກວິຊາການສະເພາະມານໍາພາ, ເລີ່ມເຂົ້າຮ່ວມໂຄງການນີ້ແຕ່ປີ 2023 ສິ່ງທີ່ໄດ້ຮຽນຮູ້ຫຼັກໆແມ່ນການປູກຝັງ, ການເຮັດປຸຍແບບທໍາມະຊາດ ແລະ ໄດ້ນໍາເອົາຄວາມຮູ້ວິທີການປູກໄປນໍາໃຊ້ໃນຄອບຄົວ ຕົນເອງມີຄວາມຮູ້ສຶກດີໃຈຫຼາຍທີ່ບໍລິສັດທາເວວສ້າງໂຄງການນີ້ຂຶ້ນມາ ເຮັດໃຫ້ເອື້ອຍນ້ອງແມ່ຍິງພາຍໃນບ້ານມີອາຊີບມີວຽກເຮັດງານທຳເຮັດໃຫ້ຊີວິດການເປັນຢູ່ຂອງຄອບຄົວດີຂຶ້ນ.

ທ່ານນາງ ສຸວັນນີ ສອນວິເສດສະມາຊິກກຸ່ມກ່າວວ່າ: ໂຄງການນີ້ດີຫຼາຍເຮັດໃຫ້ຕົນເອງຮູ້ກ່ຽວກັບການປູກຝັງ ເປັນຢ່າງດີ ດີໃຈທີ່ສຸດທີ່ມີໂຄງການນີ້ຂຶ້ນມາ. ໂອກາດນີ້,ທ່ານນາງ ອານິດ ສີວົງໄຊ ໄດ້ອວຍພອນເນື່ອງໃນໂອກາດວັນແມ່ຍິງສາກົນວັນທີ 8 ມີນາ ຄົບຮອບ 114 ປີ ທີ່ໃກ້ຈະໜູນວຽນມາຮອດນີ້ ໃນນາມຜູ້ຈັດຕັ້ງປະຕິບັດໂຄງການ ແລະ ໃນນາມເປັນເພດຍິງ ຂໍຝາກເຖິງແມ່ຍິງລາວບັນດາເຜົ່າຜູ້ທີ່ຢາກເຮັດສິ່ງໃດໜຶ່ງ ຖ້າຢາກສ້າງສິ່ງໃໝ່ໆທີ່ເຮັດໃຫ້ແມ່ຍິງມີບົດບາດຍິ່ງຂຶ້ນ ແມ່ຍິງກໍຕ້ອງໄດ້ຄຽງບ່າຄຽງໄຫຼ່ກັບອ້າຍນ້ອງຊາຍໃນການເຮັດໜ້າທີ່ໃດໜຶ່ງ ເພື່ອສົ່ງຕໍ່ມອບສິ່ງທີ່ດີ ສ້າງໂອກາດທີ່ດີບໍ່ວ່າຈະເປັນພາກສ່ວນໃດ ຈະເປັນເພດຍິງ, ເພດຊາຍ ຢາກໃຫ້ຈັບມືສາມັກຄີກັນ ແລະ ພວກເຮົາຈະກ້າວໄປພ້ອມໆກັນ ຂໍອວຍພອນມາຍັງການນໍາພັກ-ລັດ ຈົ່ງມີສຸຂະພາບແຂງແຮງ ມີຄວາມຜາສຸກໃນຄອບຄົວ ມີຜົນສໍາເລັດໃນໜ້າທີ່ວຽກງານຂອງຕົນ.