ກອງປະຊຸມຄົບຄະນະບໍລິຫານງານຊາວໜຸ່ມ ປະຊາຊົນ ປະຕິວັດລາວເມືອງເງີນ ຄັ້ງທີ 5 ສະໄໜທີ V ໄດ້ຈັດຂຶ້ນເມື່ອບໍ່ດົນມານີ້ ທີ່ຫ້ອງວ່າການເມືອງເງີນ ແຂວງໄຊຍະບູລີ ພາຍໃຕ້ການເປັນປະທານຂອງສະຫາຍ ໄຊພອນ ສີລິສົມບັດ ວ່າການເລຂາຄະນະບໍລິຫານງານຊາວໜຸ່ມເມືອງ, ມີສະຫາຍ ອິນເນດ ຂຽວສີຟ້າ ຄະນະປະຈຳພັກເມືອງ ປະທານແນວລາວສ້າງຊາດເມືອງ ຜູ້ຊີ້ນຳອົງການຈັດຕັ້ງມະຫາຊົນ ແລະ ພາກສ່ວນກ່ຽວຂ້ອງພາຍໃນເມືອງເຂົ້າຮ່ວມ.
    ສະຫາຍ ອິນລວຍ ໄຊວຸດທິ ຮອງເລຂາຄະນະບໍລິຫານງານຊາວໜຸ່ມເມືອງ ໄດ້ຜ່ານບົດສະຫຼູບການເຄື່ອນໄຫວວຽກງານປະຈຳປີ 2023 ແລະ ທິດທາງແຜນການ ປີ 2024. ຕະຫຼອດໄລຍະ 1 ປີ ຜ່ານມາ ຄະນະບໍລິຫານງານຊາວໜຸ່ມເມືອງເງິນ, ແມ່ນໄດ້ເອົາໃຈໃສ່ຊີ້ນໍາຄະນະຊາວໜຸ່ມແຕ່ລະຂັ້ນ ໂດຍໄດ້ແບ່ງຄວາມຮັບຜິດຊອບ ໃຫ້ຄະນະບໍລິຫານງານແຕ່ລະສະຫາຍ ລົງຊີ້ນຳ-ນຳພາຮ່ວມຊີວິດຢູ່ແຕ່ລະໜ່ວຍ ເພື່ອກວດກາຕີລາຄາຄືນແຜນພັດທະນາຊາວໜຸ່ມ-ເຍົາວະຊົນ ຕິດພັນກັບການປັບປຸງແບບແຜນວິທີເຮັດວຽກ, ປັບປຸງກໍ່ສ້າງການຈັດຕັ້ງຊາວໜຸ່ມຂັ້ນຕ່າງໆ ໃຫ້ມີຄວາມເຂັ້ມແຂງຂຶ້ນເທື່ອລະກ້າວ, ທົ່ວເມືອງມີໜ່ວຍຊາວໜຸ່ມ 46 ໜ່ວຍ, ມີຊາວໜຸ່ມ-ໄວໜຸ່ມທັງໜົດ 3.931 ສະຫາຍ ຍິງ 1.562 ສະຫາຍ, ເຂົ້າເປັນສະມາຊິກຊາວໜຸ່ມປະຊາຊົນປະຕິວັດລາວ ຈໍານວນ 1.454 ສະຫາຍ ຍິງ 569 ສະຫາຍ, ໄດ້ຂະຫຍາຍມະຫາຊົນຜູ້ກ້າວໜ້າເຂົ້າເປັນສະມາຊິກຊາວໜຸ່ມປະຊາຊົນປະຕິວັດລາວໄດ້ 139 ສະຫາຍ ຍິງ 76 ສະຫາຍ, ໄດ້ຊຸກຍູ້ນໍາພາສ້າງຂະບວນການອະນາໄມຫ້ອງການ ແລະ ບ້ານໄດ້ 36 ຄັ້ງ, ໄດ້ເປີດຮັບເອົາອານຸຊົນ ແລະ ເຍົາວະຊົນ ຈໍານວນ 208 ນ້ອງ ຍິງ 107 ນ້ອງ, ໄດ້ຮັບທືນປູກຝັງ-ລ້ຽງສັດ ຈາກໂຄງການພັດທະນາຄວາມອາດສາມາດ ໃນການຄວບຄຸມສານເຄມີ ໃນລະດັບທ້ອງຖິ່ນທີ່ສູນກາງ ຊປປລ ມອບໃຫ້ຊາວໜຸ່ມຜູ້ທຸກຍາກ, ດ້ອຍໂອກາດ ໃຫ້ທືນປູກຝັງ-ລ້ຽງສັດ 4 ບ້ານ, ມີ 16 ຄອບຄົວ, ມາຮອດປັດຈຸບັນນີ້ ໄດ້ຂະຫຍາຍອອກຕື່ມໄດ້ 4 ຄອບຄົວ ລວມເປັນ 20 ຄອບຄົວ, ລ້ຽງສັດ 12 ຄອບຄົວຄື: ມີໜູ 18 ໂຕ, ງົວ 19 ໂຕ, ແບ້ 4 ໂຕ ແລະ ປູກຝັງ 8 ຄອບຄົວ, ໃນເນື້ອທີ່ 23 ຮຕ, ສາມາດເກັບກູ້ຜົນຜະລິດ 120 ໂຕນ, ຄິດໄລ່ເປັນເງີນ 328 ລ້ານກີບ,ໄດ້ລົງຊຸກຍູ້ໜ່ວຍຊາວໜຸ່ມ, ຄະນະຮາກຖານຊາວໜຸ່ມ, ອ້ອມຂ້າງດໍາເນີນກອງປະຊຸມໃຫຍ່ຂັ້ນຂອງຕົນສໍາເລັດ 100%. ຈາກນັ້ນ, ຜູ້ເຂົ້າຮ່ວມກອງປະຊຸມໄດ້ພ້ອມກັນປະກອບຄໍາຄິດເຫັນໃສ່ບົດສະຫຼູບ ແລະ ທິດທາງແຜນການ ໂດຍໄດ້ຍົກໃຫ້ເຫັນດ້ານອ່ອນ ແລະ ຂໍ້ຄົງຄ້າງ ໃນໄລຍະຜ່ານມາ ເພື່ອແນໃສ່ເຮັດໃຫ້ວຽກງານດັ່ງກ່າວໄດ້ຮັບການແກ້ໄຂ ແລະ ມີຄວາມເຂັ້ມແຂງຂຶ້ນເລື້ອຍໆ
               (ຂ່າວ-ພາບ: ສຸລີຍາ ແສງເດືອນ)