ກອງບັນຊາການທະຫານແຂວງບໍ່ແກ້ວ ໄດ້ຈັດພິທີມອບໃບກຽດຕິຄຸນ, ໃບສົມມະນາບຸນຄຸນ, ຊົມເຊີຍຜົນງານ ໃຫ້ບັນດາບຸກຄົນ ແລະ ນິຕິບຸກຄົນ ຂຶ້ນໃນທ້າຍອາທິຜ່ານມາ ທີ່ສູນບັນຊາກອງບັນຊາການທະຫານແຂວງ, ໂດຍການເຂົ້າຮ່ວມຂອງສະຫາຍ ເພັງສອນ ແກ້ວວິໄລ ຮອງເລຂາພັກແຂວງ ບໍ່ແກ້ວ, ມີສະຫາຍ ພົນຈັດຕະວາ ບຸນມີ ພາມີໄຊ ຄະນະປະຈຳພັກແຂວງ ເລຂາຄະນະພັກ ຫົວໜ້າການເມືອງກອງບັນຊາການທະຫານແຂວງ, ມີການນໍາຂັ້ນແຂວງ, ພະແນກການອ້ອມຂ້າງແຂວງ, ສອງກອງບັນຊາການ ທະຫານ-ຕຳຫຼວດ, ບັນດາບໍລິສັດ, ຫ້າງຮ້ານ, ນັກທຸລະກິດ, ຜູ້ປະກອບການທັງພາຍໃນ ແລະ ຕ່າງປະເທດເຂົ້າຮ່ວມ.
ພິທີ ສະຫາຍ ພັນໂທ ເຄນ ແກ້ວດາລາ ຄະນະບໍລິຫານງານພັກ ຮອງຫົວໜ້າຫ້ອງການເມືອງ ກອງບັນຊາການທະຫານແຂວງ ໄດ້ຜ່ານຂໍ້ຕົກລົງວ່າດ້ວຍການມອບໃບຍ້ອງຍໍ, ໃບກຽດຕິຄຸນ, ໃບສົມມະນາບຸນຄຸນ ໃຫ້ບຸກຄົນ ແລະ ນິຕິບຸກຄົນ ຜູ້ທີ່ມີຜົນງານດີເດັ່ນໃນການປະກອບສ່ວນຊ່ວຍເຫຼືອ ອຸປະຖຳທາງດ້ານວັດຖຸປັດໃຈ ເຂົ້າໃນການຊ່ວຍເຫຼືອກຳລັງປ້ອງກັນຊາດ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ເພື່ອເປັນການພັດທະນາປັບປຸງກໍ່ສ້າງກົມກອງ ໃຫ້ເຕີບໃຫ່ຍເຂັ້ມແຂງ.
ການມອບຄັ້ງນີ້, ມີບັນດາບໍລິສັດ, ຫ້າງຮ້ານ, ນັກທຸລະກິດຜູ້ປະກອບການ ທັງພາຍໃນ ແລະ ຕ່າງປະເທດ ຈຳນວນ 8 ບໍລິສັດ, ປະເພດໃບກຽດຕິຄຸນ ຈໍານວນ 34 ໃບ ແລະ ໃບສົມມະນາບຸນຄຸນ ຈຳນວນ 3 ໃບ, ເປັນກຽດມອບໂດຍສະຫາຍ ພົນຈັດຕະວາ ບຸນມີ ພາມີໄຊ ແລະ ໄດ້ສະແດງຄວາມຂອບໃຈຕໍ່ບັນດາຜູ້ຕາງໜ້າບໍລິສັດ, ຫ້າງຮ້ານ, ນັກທຸລະກິດຜູ້ປະກອບການ ທັງພາຍໃນ ແລະ ຕ່າງປະເທດ ຢ່າງລົ້ນເຫຼືອທີ່ໄດ້ປະກອບສ່ວນວັດຖຸປັດໃຈ ທີ່ເຫັນໄດ້ຄວາມໝາຍ ຄວາມສຳຄັນ ຂອງກຳລັງປ້ອງກັນຊາດ ປ້ອງກັນຄວາມສະຫງົບ ແລະ ໄດ້ອວຍພອນໃຫ້ແຕ່ລະພາກສ່ວນ ຈົ່ງມີພາລະນາໄມສົມບູນ ມີຄວາມຜາສຸກໃນຊີວິດສວນຕົວ-ຄອບຄົວ ມີຄວາມຈະເລີນຮຸ່ງເຮືອງໃນການດໍາເນີນທຸລະກິດຂອງບັນດາທ່ານ.
(ຂ່າວ: ວໍລະສິດ ພິດສະຫາຍ).