ຮາກຖານສະຫະພັນແມ່ຍິງພະແນກກະສິກໍາ ແລະ ປ່າໄມ້ ແຂວງຄໍາມ່ວນໄດ້ຈັດກອງປະຊຸມໃຫຍ່ຄັ້ງທີ VIຂຶ້ນໃນວັນທີ 6 ມີນານີ້ ທີ່ພະແນກດັ່ງກ່າວ ພາຍໃຕ້ການເປັນປະທານຂອງທ່ານ ນາງ ອິນແປງ ພິມມະຈັກ ປະທານສະຫະພັນແມ່ຍິງຮາກຖານພະແນກກະສິກໍາ ແລະ ປ່າໄມ້ແຂວງ, ໂດຍເປັນກຽດເຂົ້າຮ່ວມຂອງທ່ານ ນາງ ສຸດທິລົມ ສຸລິວົງ ຮອງປະທານຄະນະບໍລິຫານງານສະຫະພັນແມ່ຍິງແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ໂອກາດນີ້, ໄດ້ຮັບຟັງບົດລາຍງານການເມືອງ ແລະ ທິດທາງແຜນການຄາດໝາຍສູ້ຊົນໃນຕໍ່ໜ້າ 2024-2028, ຕະຫຼອດໄລຍະ 5 ປີຜ່ານມາ, ຄະນະພັກ-ຄະນະພະແນກ ກໍຄືຄະນະຮາກຖານສະຫະພັນແມ່ຍິງຮາກຖານພະແນກກະສິກໍາ ແລະ ປ່າໄມ້ແຂວງໄດ້ຖືສໍາຄັນວຽກງານສຶກສາອົບຮົມການເມືອງ-ແນວຄິດໃຫ້ແກ່ສະມາຊິກແມ່ຍິງ, ດ້ວຍການຈັດປະຖະກະຖາວັນສໍາຄັນຕ່າງໆ ຂອງຊາດ-ຂອງພັກໄດ້ທັງໝົດ 75 ຄັ້ງ, ມີຜູ້ເຂົ້າຮ່ວມ 3.375 ເທື່ອຄົນ. ນອກນັ້ນ, ຍັງໄດ້ເອົາໃຈໃສ່ເຕົ້າໂຮມຄວາມສາມັກຄີ ແລະ ແບ່ງເບົາຄວາມສຸກ-ທຸກ ໃນເວລາເອື້ອຍນ້ອງເຈັບເປັນ ເພື່ອໃຫ້ຄວາມອົບອຸ່ນ ຫຼື ປະຕິບັດນະໂຍບາຍອື່ນໆ. ຜ່ານມາສາມາດສະເໜີຂໍການຍ້ອງຍໍບຸກຄົນ 3 ດີຈາກສູນກາງສະຫະພັນແມ່ຍິງລາວ ແລະ ຈາກສະຫະພັນແມ່ຍິງແຂວງໄດ້ 52 ທ່ານ ແລະ ປະເມີນການປະຕິບັດຂໍ້ແຂ່ງຂັນ 3 ດີ ໄດ້ປະເພດ I ມີ 51 ທ່ານ, ປະເພດ II ມີ 3 ທ່ານ. ພ້ອມດຽວກັນນັ້ນຍັງໄດ້ຕີລາຄາດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້, ພ້ອມທັງທິດທາງແຜນການໃນຕໍ່ໜ້າ.
ຈາກນັ້ນ, ກອງປະຊຸມກໍ່ໄດ້ດໍາເນີນການປ່ອນບັດຄັດເລືອກເອົາຄະນະບໍລິຫານງານສະຫະພັນແມ່ຍິງຮາກຖານພະແນກຊຸດໃໝ່, ຜົນຂອງກອງປະຊຸມຄັ້ງປະຖົມມະລຶກໄດ້ຕົກລົງເຫັນດີເປັນເອກະພາບເລືອກເອົາທ່ານ ນາງທອນມາ ແກ້ວດາໄລ ເປັນປະທານ, ທ່ານ ນາງ ອຸດາລີ ວິລະວົງ ເປັນຮອງ ທັງເປັນປະທານກວດກາ, ທ່ານ ນາງ ອໍລະໄທ ສອນມັງຄະລະ, ທ່ານ ນາງ ສົມຄິດ ຂັດຕິຍາ ແລະ ທ່ານ ນາງ ມະນີເພັດ ລໍມະນີ ເປັນຄະນະ.
ຂ່າວ : ມະນີວັນ