ໃນວັນທີ 6 ມີນາ  ນີ້ ກະຊວງພາຍໃນ ໄດ້ຈັດກອງປະຊຸມສະຫຼຸບການເຄື່ອນໄຫວວຽກງານປະຈຳປີ 2023 ແລະ ທິດທາງແຜນການປະຈຳປີ 2024 ພ້ອມ ສະເຫຼີມສະຫຼອງວັນແມ່ຍິງ ສາກົນ ຄົບຮອບ 114 ປີ ໂດຍການເປັນປະທານຂອງ ທ່ານ ທອງຈັນ ມະນີໄຊ ລັດຖະມົນຕີ ກະຊວງພາຍໃນ, ມີບັນດາ ທ່ານ ຮອງລັດຖະມົນຕີ ກະຊວງພາຍໃນ, ປະທານສະຫະພັນແມ່ຍິງ ກະຊວງພາຍໃນ, ຄະນະສະຫະພັນແມ່ຍິງກະຊວງພາຍໃນ, ຄະນະໜ່ວຍແມ່ຍິງ ຫ້ອງການ, ກົມ, ສະຖາບັນ,ສູນ, ຕາງໜ້າຈາກສາມອົງການຈັດຕັ້ງເຂົ້າຮ່ວມ.

 ທ່ານ ນາງ ຄໍາພູນ ແກ້ວສະຫວັນ ປະທານສະຫະພັນແມ່ຍິງ ກະຊວງພາຍໃນ ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານປະຈຳປີ 2023 ແລະ ທິດທາງປະຈຳປີ 2024 ຊຶ່ງທ່ານໄດ້ຍົກໃຫ້ເຫັນເຖິງຜົນສຳເລັດໃນການຈັດຕັ້ງປະຕິບັດວຽກງານ, ຂໍ້ສະດວກ, ຂໍ້ຄົງຄ້າງ ແລະ ທິດທາງແກ້ໄຂໃນຕໍ່ໜ້າເພື່ອເຮັດໃຫ້ການເຄື່ອນໄຫວວຽກງານມີຄວາມເຂັ້ມແຂງ ແລະ ໄດ້ຮັບຜົນສຳເລັດຍິ່ງໃຫຍ່ກວ່າເກົ່າ. ນອກນັ້ນຄະນະສະຫະພັນແມ່ຍິງກະຊວງພາຍໃນ ຍັງໄດ້ຜ່ານບົດລາຍງານຜົນສຳເລັດການກະກຽມ ແລະ ດຳເນີນກອງປະຊຸມໃຫຍ່ ຄັ້ງທີ III ຂອງໜ່ວຍສະຫະພັນແມ່ຍິງຫ້ອງການ, ກົມ, ສະຖາບັນ ແລະ ສູນ ແລະ ຜ່ານບົດສະຫຼຸບວຽກງານຈັດຕັ້ງປະຕິບັດຂໍ້ແຂ່ງຂັນ 3 ດີ ປີ 2021-2023 ແລະ ທິດທາງແຜນການປະຈຳປີ 2024 ຕື່ມອີກ. ກອງປະຊຸມ ໄດ້ມີພິທີມອບໃບຍ້ອງຍໍຜົນງານດີເດັ່ນໃນການຈັດຕັ້ງປະຕິບັດ ຂໍ້ແຂ່ງຂັນ 3 ດີ ປີ 2021-2023 ໃຫ້ແກ່ ໜ່ວຍສະຫະແມ່ຍິງ  14  ໜ່ວຍ ແລະ ບຸກຄົນດີເດັ່ນ 151 ທ່ານ ໃຫ້ກຽດມອບໂດຍ ທ່ານ  ທອງຈັນ ມະນີໄຊ ລັດຖະມົນຕີກະຊວງພາຍໃນ.  ຈາກນັ້ນ ຫົວໜ້າໜ່ວຍແມ່ຍິງ ຫ້ອງການ, ກົມ, ສະຖາບັນ, ສູນ ກໍ່ໄດ້ມີການຈັບມືແຂ່ງຂັນຈັດຕັ້ງປະຕິບັດຂໍ້ແຂ່ງຂັນ 3 ດີ ປີ 2024. 
ໃນຕອນບ່າຍຂອງວັນດຽວກັນກໍໄດ້ມີການຈັດຝຶກອົບຮົມວຽກງານກວດກາໃຫ້ແກ່ ຜູ້ທີ່ຮັບຜິດຊອບວຽກງານກວດກາ ຂອງໜ່ວຍແມ່ຍິງຫ້ອງການ, ກົມ, ສະຖາບັນ ແລະ ສູນ ໂດຍການເປັນປະທານ ຂອງ ທ່ານ ນາງ ລີວົງ ລາວລີ ຮອງລັດຖະມົນຕີ , ຜູ້ຊີ້ນຳອົງການຈັດຕັ້ງມະຫາຊົນກະຊວງພາຍໃນ.
ເພື່ອເຮັດໃຫ້ການສະເຫຼີມສະຫຼອງວັນແມ່ຍິງສາກົນ ຄົບຮອບ 114 ປີ ມີບັນຍາກາດຟົດຟື້ນ ແລະ ຮັດແໜ້ນຄວາມສາມັກຄີ ໃນວັນທີ 7 ມີນາ 2024 ກໍໄດ້ມີພິທີເປີດຕະຫຼາດນັດແມ່ຍິງກະຊວງພາຍໃນ ຂຶ້ນ ມີ ໜ່ວຍແມ່ຍິງຫ້ອງການ, ກົມ, ສະຖາບັນ ແລະ ສູນ ຂອງກະຊວງພາຍໃນ ເຂົ້າຮ່ວມຊື້ຂາຍສິນຄ້າຮ່ວມກັນ ແລະ ບັນດາອ້າຍເອື້ອຍນ້ອງຂອງກະຊວງພາຍໃນ ແລະ ກະຊວງ/ອົງການອ້ອມຂ້າງ ເຂົ້າຮ່ວມທ່ຽວຊົມຕະຫຼາດນັດ ດ້ວຍບັນຍາກາດທີ່ເບີກບານມ່ວນຊື່ນ.             
ຂ່າວ-ພາບ: ກະຊວງພາຍໃນ