ກອງປະຊຸມພົບປະລະຫວ່າງຄະນະຜູ້ແທນຂັ້ນສູງຂອງແຂວງສະຫວັນນະເຂດ ສປປ ລາວ ແລະ ຄະນະຜູ້ແທນຂັ້ນສູງແຂວງກວາງຈິ ສສ ຫວຽດນາມ ໄດ້ຈັດຂຶ້ນໃນວັນທີ 20 ມີນາຜ່ານມານີ້,ທີ່ຫ້ອງປະຊຸມຂອງຫ້ອງວ່າການປົກຄອງແຂວງສະຫວັນນະເຂດ. ຄະນະຜູ້ແທນແຂວງສະຫວັນນະເຂດນຳໂດຍສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ພ້ອມຄະນະ, ຄະນະຜຸ້ແທນແຂວງກວາງຈິ ນຳໂດຍສະຫາຍ ເລກວາງຕຸ່ງ ກໍາມະການສູນກາງພັກ ເລຂາພັກແຂວງ ຫົວໜ້າຄະນະຜູ້ແທນສະມາຊິກສະພາແຫ່ງຊາດແຂວງກວາງຈິ ພ້ອມຄະນະ.

ໃນວາລະດຳເນີນກອງປະຊຸມ, ທັງສອງຝ່າຍໄດ້ບັນລຸຂໍ້ຕົກລົງດ້ານຕ່າງໆທີ່ເອື້ອຜົນປະໂຫຍດໃຫ້ແກ່ການພັດທະນາເສດຖະກິດ-ສັງຄົມເຊິ່ງກັນ ແລະ ກັນ, ໂດຍສອງຝ່າຍຈະສືບຕໍ່ຊຸກຍູ້ສົ່ງເສີມການຈັດຕັ້ງຜັນຂະຫຍາຍເນື້ອໃນບົດບັນທຶກການຮ່ວມມືລະຫວ່າງຄະນະຜູ້ແທນຂັ້ນສູງ 2 ແຂວງໄລຍະ 2023-2025 ຢ່າງມີປະສິດທິພາບ, ເອົາໃຈໃສ່ຊີ້ນໍາຂະແໜງການເສນາທິການຂອງສອງແຂວງ, ປະສານສົມທົບເພື່ອລົງສໍາຫຼວດບັນດາໂຄງການທີ່ແຂວງກວາງຈິ ຊ່ວຍພັດທະນາການກໍ່ສ້າງຕາມບໍລິເວນຊາຍແດນ ຕາມການສະເໜີຂອງແຂວງສະຫວັນນະເຂດ, ຊີ້ນໍາພະແນກການເປັນເສນາທິການປະສານງານຂອງສອງແຂວງ, ສະຫຼູບຕີລາຄາກາງໄລຍະ, ການຈັດຕັ້ງປະຕິບັດເນື້ອໃນບົດບັນທຶກການຮ່ວມມືໃນປີ 2024, ລາຍງານການນໍາຂອງແຕ່ລະແຂວງເພື່ອຊີ້ນໍາ, ແກ້ໄຂບັນຫາທີ່ເຫັນວ່າຫຍຸ້ງຍາກ, ຂໍ້ຄົງຄ້າງໃນການຈັດຕັ້ງປະຕິບັດ, ທັງຝ່າຍສອງຝ່າຍເຫັນດີສືບຕໍ່ປະສານສົມທົບໃນການດໍາເນີນການດ້ານເອກະສານ, ນິຕິກໍາໃຫ້ສໍາເລັດ, ເພື່ອນໍາສະເໜີລັດຖະບານຂອງແຕ່ລະຝ່າຍໃນການຂໍອະນຸມັດຜ່ານສັນຍາວ່າດ້ວຍເຂດເສດຖະກິດ-ການຄ້າຊາຍແດນຮ່ວມ, ສອງຝ່າຍສືບຕໍ່ນໍາສະເໜີລັດຖະບານຂອງແຕ່ລະຝ່າຍໃນການຂໍອະນຸມັດ ແລະ ສະໜອງງົບປະມານ ເພື່ອຈັດຕັ້ງປະຕິບັດການກໍ່ສ້າງໂຄງການສ້ອມແປງຖານຕັ້ງຫຼັກໝາຍຊາຍແດນ, ກັນເຈື່ອນຫຼັກໝາຍຊາຍແດນແຫ່ງຊາດ ທີ 606 (1), 607 (1) ແລະ ບູລະນະສ້ອມແປງຄືນຫຼັກໝາຍຊາຍແດນ 585 ທີ່ໄດ້ຮັບຜົນກະທົບຈາກໄພນໍ້າຖ້ວມ, ປະສານສົມທົບໃນການຈັດຕັ້ງການສໍາຫຼວດສອງຝ່າຍ, ເພື່ອສະຫຼູບຕີລາຄາສະພາບການ, ສະພາບຕົວຈິງ ແລະ ນໍາສະເໜີວິທີການໃນການປ້ອງກັນການເຊາະເຈື່ອນຂອງຕາຝັ່ງເຊໂປນຢູ່ເບື້ອງຫວຽດນາມຢູ່ຈຸດແຕ່ຫຼັກໝາຍ 606 (1) ຫາ607(1) ເພື່ອລາຍງານຄະນະກໍາມະການຊາຍແດນແຫ່ງຊາດຂອງ 2 ປະເທດ, ແຂວງສະຫວັນນະເຂດຈະນໍາສະເໜີກະຊວງຍຸຕິທຳ, ກະຊວງການຕ່າງປະເທດຂອງ ສປປ ລາວ, ເພື່ອມີນະໂຍບາຍໃນການສ້າງເງື່ອນໄຂອໍານວຍຄວາມສະດວກ, ມອບສິດໃຫ້ເມືອງໃນການອອກໃບຢັ້ງຢືນການແຕ່ງດອງໃຫ້ພົນລະເມືອງລາວ, ເພື່ອຮັບປະກັນການປະກອບບັນດາເອກະສານແຕ່ງດອງກັບພົນລະເມືອງຫວຽດນາມ, ແນໃສ່ການຈໍາກັດປະກົດການແຕ່ງດອງບໍ່ຖືກຕ້ອງຕາມກົດໝາຍທີ່ເກີດຂຶ້ນຕາມບໍລິເວນຊາຍແດນ ແລະ ການຮ່ວມມືດ້ານອື່ນໆ ຕ່າງຝ່າຍກໍໄດ້ຮັບຜົນປະໂຫຍດ.

(ຂ່າວ: ສະຫວັນ)