ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ເວັບໄຊ nasdaq.com ຂອງ ອາເມຣິກາ ໄດ້ລົງຂ່າວວ່າ: ຫວຽດນາມ ພວມມີບົດບາດທີ່ໃຫຍ່ຫຼວງໃນຕະຫຼາດ ອາຍແກັສ ທຳມະຊາດ (LNG) ທົ່ວໂລກ. ຂໍ້ສັງເກດນີ້ໄດ້ເລີ່ມມາຈາກການວາງແຜນຜັງພັດທະນາໄຟຟ້າແຫ່ງຊາດ ໄລຍະ 2021 - 2030, ວິໄສທັດຮອດປີ 2050 (ການວາງແຜນຜັງໄຟຟ້າ VIII) ຂອງ ຫວຽດນາມ. ໃນນັ້ນ, ໄດ້ວາງອອກບັນດາເປົ້າໝາຍທີ່ເຕັມໄປດ້ວຍຄວາມມຸ່ງຫວັງ ເພື່ອແນໃສ່ເພີ່ມທະວີພະລັງງານ ແລະ ອາຍແກັສ.

ໃນຂະນະທີ່, ສຳນັກຂ່າວສານ Reuters (ອັງກິດ) ໄດ້ໃຫ້ຂໍ້ສັງເກດວ່າ: ການວາງແຜນຜັງໄຟຟ້າ VIII ຈະຕ້ອງມີແຫຼ່ງເງິນທຶນ ມູນຄ່າ 134,7 ຕື້ໂດລາ, ສ່ວນໜຶ່ງໃນຈຳນວນນັ້ນຄາດວ່າຈະມາຈາກແຫຼ່ງລົງທຶນຕ່າງປະເທດ, ລວມມີຄຳໝັ້ນສັນຍາທີ່ມີມູນຄ່າ 15,5 ຕື້ໂດລາ ຈາກບັນດາປະເທດອຸດສາຫະກຳພັດທະນາ (G7). ໃນການຫັນປ່ຽນຍຸດທະສາດໄປສູ່ພະລັງງານສະອາດ ໄດ້ເນັ້ນໜັກເຖິງບົດບາດໃໝ່ຂອງ ຫວຽດນາມ ໃນຖານະເປັນຜູ້ນຳເຂົ້າ LNG ໃໝ່.

ກ່ຽວກັບຄວາມຫວັງໄລຍະກາງ, ຮອດປີ 2030, ພະລັງງານທົດແທນ ຄື: ແຮງລົງ ແລະ ແສງຕາເວັນ ຄາດວ່າຈະຕອບສະໜອງເກືອບ 31% ຄວາມຕ້ອງການດ້ານພະລັງງານຂອງ ຫວຽດນາມ ແລະ LNG ຍັງກວມເອົາ 24,8% ຍອດສະມັດຖະພາບ ພະລັງງານ. ຫວຽດນາມ ວາງເປົ້າໝາຍຮອດປີ 2050 ຈະຫຼຸດການປ່ອຍທາດກາກບອນລົງລະດັບ 0 ແລະ LNG ໄດ້ຮັບການຄາດຫວັງວ່າຈະແມ່ນແຫຼ່ງວັດຖຸດິບທົດແທນຖ່ານຫີນ.