ໃນອາທິດຜ່ານມານີ້, ທີ່ໂຮງຮຽນປະຖົມ ບ້ານກ້ານ ເມືອງຊຳເໜືອ ແຂວງຫົວພັນ ໄດ້ມີພິທີມອບ-ຮັບອາຄານໂຮງຮຽນປະຖົມສົມບູນ ບ້ານກ້ານ ເມືອງຊໍາເໜືອ ແຂວງຫົວພັນ, ໂດຍມີທ່ານ ຄໍາສວຍ ແກ້ວດາລາວົງ ປະທານສະມາຄົມມິດ ຕະພາບ ລາວ-ສ. ເກົາ ຫຼີ (LKFA) ແລະ ທ່ານ ໂອ ມິງ ຮວັນ (Oh Myung Hwan) ປະທານສະມາຄົມມິດຕະພາບ ສ. ເກົາຫຼີ-ລາວ (LKFA) ພ້ອມດ້ວຍຄະນະ, ມີທ່ານ ນາງຄຳພອນ ສົມບູນ ຮອງເຈົ້າເມືອງຊຳເໜືອ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.

ໂຄງການກໍ່ສ້າງອາຄານໂຮງຮຽນປະຖົມສົມບູນບ້ານກ້ານ ເປັນອາຄານຖາວອນ, ປະກອບມີ 5 ຫ້ອງຮຽນ, 1 ຫ້ອງການຄູ, ໂຕະຕັ່ງ ແລະ ຫ້ອງນ້ຳຍິງ-ຊາຍ, ລວມມູນຄ່າການກໍ່ສ້າງ 73.800 ໂດລາຊຶ່ງເປັນທຶນຊ່ວຍເຫຼືອລ້າຈາກສະມາຄົມມິດຕະພາບ ສ. ເກົາຫຼີ-ລາວ, ໂຄງການດັ່ງກ່າວ ໄດ້ເລີ່ມກໍ່ສ້າງມາແຕ່ເດືອນຕຸລາ 2023 ແລະ ໄດ້ສຳເລັດ 100% ໃນເດືອນມີນາ 2024.

ໃນພິທີ, ຍັງມີການມອບເຄື່ອງຊ່ວຍເຫຼືອຈາກສະມາຄົມມິດຕະພາບ ສ.ເກົາຫຼີ-ລາວ ຈຳນວນໝຶ່ງ ໃຫ້ແກ່ຜູ້ອຳນວຍການ ແລະ ນັກຮຽນໂຮງຮຽນດັ່ງກ່າວ.

(ຂ່າວ: ຫົວພັນ)