ໃນວັນທີ 29 ມີນານີ້ ຢູ່ທີ່ຫ້ອງຮັບແຂກ ຂອງແຂວງ ບໍລິຄໍາໄຊ. ທ່ານ ນາງ ດັງ ຖີ ຮາຍ ເຕີມ ກົງສູນໃຫຍ່ແຫ່ງ ສສ ຫວຽດນາມ ປະຈໍາພາກກາງແຂວງ ສະຫວັນນະເຂດ ພ້ອມດ້ວຍຄະນະ ໄດ້ເຂົ້າພົບປະຢ້ຽມຢາມ ແລະ ອ່ວຍພອນການນຳແຂວງ ບໍລິຄໍາໄຊ. ຕະຫຼອດເຖິງປະຊາຊົນບັນດາເຜົ່າພາຍໃນແຂວງ ເນື່ອງໃນໂອກາດ ສະເຫຼີມສະຫຼອງວັນບຸນປີໄໝ່ລາວ ພສ 2567, ໃຫ້ກຽດຕ້ອນຮັບໂດຍທ່ານ ກອງແກ້ວ ໄຊສົງຄາມ ເຈົ້າແຂວງ ບໍລິຄໍາໄຊ. ພ້ອມດ້ວຍຄະນະ.
      ໂອກາດດັ່ງກ່າວ, ທ່ານ ນາງ ດັງ ຖີ ຮາຍ ເຕີມ ຍັງໄດ້ແຈ້ງຈຸດປະສົງຂອງການມາຢ້ຽມຢາມແຂວງ ບໍລິຄໍາໄຊໃນຄັ້ງນີ້ວ່າ: ເພື່ອແນໃສ່ໃນການຮ່ວມມືເສີມຂະຫຍາຍມູນເຊື້ອຄວາມສາມັກຄີ ຮັກແພງ ແລະ ພ້ອມໃຈກັນພັດທະນາສາຍພົວພັນແບບພິເສດ ລະຫວ່າງສອງປະເທດເວົ້າລວມ, ເວົ້າສະເພາະກໍ່ຄືກົງສູນໃຫຍ່ແຫ່ງ ສສ ຫວຽດນາມ ປະຈຳແຂວງສະຫວັນນະເຂດ ແລະ ແຂວງບໍລິຄໍາໄຊ ໃຫ້ມີການເສີມຂະຫຍາຍ ແລະ ພັດທະນາໃຫ້ເຂົ້າສູ່ລວງເລິກ ແລະ ຍືນຍົງ. 
     ໂອກາດນີ້, ທ່ານ ເຈົ້າແຂວງ ບໍລິຄໍາໄຊ ໄດ້ລາຍງານສະພາບການພັດທະນາທາງດ້ານເສດຖະກິດ - ສັງຄົມພາຍໃນແຂວງໂດຍຫຍໍ້ໃຫ້ກົງສຸນໃຫຍ່ແຫ່ງ ສສ ຫວຽດນາມ ປະຈໍາແຂວງສະຫວັນນະເຂດໄດ້ຮັບຊາບ.  ຕະຫຼອດຮອດການພົວພັນຮ່ວມມືຮອບດ້ານ ລະຫວ່າງແຂວງ ບໍລິຄໍາໄຊ ກັບບັນດາແຂວງຂອງ ສສ ຫວຽດນາມຕະຫຼອດໄລຍະຜ່ານມາ. ຈາກນັ້ນ, ທັງສອງຝ່າຍໄດ້ກ່າວອວຍພອນເຊິ່ງກັນ ແລະ ກັນເນື່ອງໃນໂອກາດປີໃໝ່ລາວ ພສ 2567 ທີ່ຈະມາເຖິງນີ້. 
(ພາບ,ຂ່າວ ສຸກທະວີ).