ພິທີເປີດໂຮງງານຜະລິເຈ້ຍ ຂອງບໍລິສັດ ພູທົງ ຈໍາກັດ ໄດ້ຈັດຂຶ້ນເມື່ອບໍ່ດົນມານີ້, ເປັນກຽດເຂົ້າຮ່ວມໂດຍ ທ່ານ ວຽງສະຫວັດ ສີພັນດອນ ເຈົ້າແຂວງຫຼວງນໍ້າທາ, ທ່ານ ບຸນຈັນ ສຸດທິປັນຍາ ເຈົ້າເມືອງນາແລ, ມີທ່ານ ເຊຊຽນຝູ້ ປະທານບໍລິສັດ, ຂະແໜງການກ່ຽວຂ້ອງຂັ້ນແຂວງ, ເມືອງເຂົ້າຮ່ວມ. 
ໃນພິທີ ຕ່າງໜ້າບໍລິສັດໄດ້ລາຍງານວ່າ: ບໍລິສັດໄດ້ລົງສໍາຫຼວດ ພ້ອມທັງປະກອບເອກະສານໃນປີ 2018 ແລະ ລົງມືກໍ່ສ້າງປີ 2019, ເນື່ອງຈາກໂຄວິດ 19 ລະບາດ ຈຶ່ງເຮັດໃຫ້ການກໍ່ສ້າງຫຼ້າຊ້າ, ມາຮອດປີ 2023 ບໍລິສັດຈຶ່ງເລັ່ງມືການກໍ່ສ້າງໄດ້ສໍາເລັດ ໃນມູນຄ່າ 6 ລ້ານຢ້ວນ; ຄາດຄະເນການຜະລິດແມ່ນ 2.000 ໂຕນ ຕໍ່ປີ ຄິດເປັນເງິນແມ່ນ 20 ລ້ານຢ້ວນ ຕໍ່ປີ. ໃນປີຕໍ່ໜ້າຄາດຄະເນວ່າ ຈະສືບຕໍ່ລົງທືນອີກ 5 ລ້ານຢ້ວນ ເພື່ອຂະຫຍາຍການຜະລິດໃຫ້ໄດ້ 5.000 ໂຕນ ຕໍ່ປີ ຄິດເປັນເງິນ 50 ລ້ານຢ້ວນ ຕໍ່ປີ. 
ຈາກນັ້ນ, ທ່ານ ເຈົ້າແຂວງຫຼວງນໍ້າທາ ໄດ້ເປັນກຽດລັ່ນຄ້ອງ 9 ບາດ ເພື່ອເປັນສິລິມຸງຄຸນ ພ້ອມທັງຈູດທວນໄຟ ເປັນສັນຍານການເປີດໂຮງງານຜະລິດເຈ້ຍຢ່າງເປັນທາງການ ແລະ ທ່ຽວຊົມສະຖານທີ່ກໍ່ສ້າງໂຮງງານ ອີກດ້ວຍ.
(ຂ່າວ: ຄໍາໝອນ ແອງນິຄຸມ)