ທ່ານ ຫງ໋ອກ ກິມນາມ ຄະນະປະຈຳພັກແຂວງ ຫົວໜ້າຂົນຂວາຍພັກແຂວງເຫງະອານ ສສຫວຽດນາມພ້ອມດ້ວຍຄະນະ ໄດ້ເຂົ້າພົບປະອ່ວຍພອນ ທ່ານ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຊຽງຂວາງ ສປປລາວ ພ້ອມດ້ວຍຄະນະ ໃນວັນທີ 10 ເມສານີ້ ທີ່ຫ້ອງວ່າການແຂວງ. 
ທ່ານ ຫງ໋ອກ ກິມນາມ ໄດ້ອ່ວຍພອນອັນປະເສີດມາຍັງການນຳແຂວງ ຕະຫຼອດຮອດພໍ່ແມ່ປະຊາຊົນບັນດາເຜົ່າຊາວ ແຂວງຊຽງຂວາງ ເນື່ອງໃນໂອກາດປີໃໝ່ລາວ ຈະໝູນວຽນມາຮອດອີກວາລະໜຶ່ງ ຈົ່ງມີແຕ່ຄວາມຜາສຸກ, ສຸກຂະພາລະ, ອາຍຸວັນນະ, ປະສົບຜົນສຳເລັດໃນໜ້າທີ່ການງານ. ນອກນີ້ ທ່ານຍັງໄດ້ລາຍງານການພັດທະນາເສດຖະກິດ-ສັງຄົມຂອງແຂວງເຫງະອານ ໃຫ້ທ່ານເຈົ້າແຂວງໄດ້ຮັບຊາບ. 
ໂອກາດນີ້, ທ່ານເຈົ້າແຂວງຊຽງຂວາງ ໄດ້ກ່າວສະແດງຄວາມດີໃຈຕໍ່ການມາຢ້ຽມຢາມ ແລະ ອ່ວຍພອນໃນຄັ້ງນີ້ ແລະ ທ່ານຍັງໄດ້ລາຍງານການພັດທະນາເສດຖະກິດ-ສັງຄົມຂອງແຂວງຊຽງຂວາງໃຫ້ຄະນະຜູ້ແທນແຂວງ ເຫງະອານໄດ້ຮັບຊາບເຊັ່ນດຽວກັນ. ຫຼັງຈາກນັ້ນ, ການນຳສອງແຂວງໄດ້ຫົດນ້ຳອວຍພອນເຊິ່ງກັນ ແລະ ກັນຕາມຮີດຄອງປະເພນີອັນດີງາມຂອງລາວ.
(ຂ່າວ: ບຸນມີແສງທຸມມີ)