ແຫຼ່ງຂ່າວຈາກ ແຂວງຫົວພັນ ໃຫ້ຮູ້ວ່າ: ແຂວງຫົວພັນ ຈັດພິທີມອບ-ຮັບສຳນັກງານອົງການປົກຄອງເມືອງຊໍາເໜືອ ໃນວັນທີ 12 ເມສາຜ່ານມາໂດຍການເຂົ້າຮ່ວມຂອງທ່ານ ຄໍາແພງ ໄຊສົມແພງ ເຈົ້າແຂວງຫົວພັນ, ທ່ານ ໂດ້ຈ້ອງຮຶງ ປະທານສະພາປະຊາຊົນແຂວງ ແທັງຮວາ ພ້ອມດ້ວຍຄະນະທັງສອງແຂວງ ແລະ ການນໍາເມືອງຊໍາເໜືອເຂົ້າຮ່ວມ.

ໂຄງການກໍ່ສ້າງສຳນັກງານອົງການປົກຄອງ ເມືອງຊໍາເໜືອແຂວງຫົວພັນ ໄດ້ເລີ່ມລົງມືກໍ່ສ້າງມາແຕ່ວັນທີ 12 ເມສາ 2022 ເຖິງວັນທີ 22 ກໍລະກົດ 2023 ໄດ້ກໍ່ສ້າງສໍາເລັດ 100% ລວມມູນຄ່າການກໍ່ສ້າງທັງໝົດ 67,2 ຕື້ກວ່າດົງ ໂດຍແມ່ນຫ້ອງວ່າການແຂວງຫົວພັນ ເປັນເຈົ້າຂອງໂຄງການ ແລພ ບໍລິສັດ ຮຶງຟາດ ກໍ່ສ້າງເຄຫາສະຖານ ຈໍາກັດ ເປັນຜູ້ຮັບເໝົາກໍ່ສ້າງ ຊຶ່ງໄດ້ຮັບທຶນຊ່ວຍເຫຼືອລ້າຈາກແຂວງ ແທັງຮວາ ສສ ຫວຽດນາມ.

ຫ້ອງການດັ່ງກ່າວ, ມີຂະໜາດ 26,5 X 64,85 ແມັດ, ມີເນື້ອທີ່ນໍາໃຊ້ 3,153 ຕາແມັດ, ເປັນອາຄານ 3 ຊັ້ນ, ເປັນຮູບຊົງລາວ, ເປັນເອກະລັກຂອງຊາດລາວ, ໂຄງສ້າງດ້ວຍເບຕົງເສີມເຫຼັກ ແບບຖາວອນ, ແຕ່ລະຫ້ອງປະກອບດ້ວຍເຟີນີເຈີ, ໄຟຟ້າ, ເຄື່ອງຮັບໃຊ້ຫ້ອງການຄົບຊຸດ. ພ້ອມນີ້ຍັງໄດ້ກໍ່ສ້າງເຮືອນຍາມ 1 ຫຼັງ, ກໍ່ສ້າງເຮືອນຈອດລົດຈັກ 1 ຫຼັງ, ກໍ່ສ້າງອ່າງເກັບນໍ້າປະປາ, ກໍ່ສ້າງກຳແພງອ້ອມຕຶກອາຄານ, ເດີນເທເບຕົງເສີມເຫຼັກ ແລະ ຮ່ອງລະບາຍນໍ້າອ້ອມອາຄານ. ນອກຈາກນີ້, ຍັງໄດ້ກໍ່ສ້າງກັນເຈື່ອນ, ປັບພື້ນທີ່ ແລະ ຕົບແຕ່ງສວນດອກໄມ້ຕື່ມອີກ.

(ຂ່າວ-ພາບ: ນິດຖະໜອມ)