ງານບຸນປະເພນີປີໃໝ່ລາວ ແລະ ການສະເຫຼີມສະຫຼອງປີທ່ອງທ່ຽວລາວ 2024 ທີ່ແຂວງຫຼວງພະບາງ ຈັດຂຶ້ນຢ່າງເປັນທາງການໃນວັນທີ 14 ເມສາຜ່ານມານີ້ ທີ່ເສັ້ນທາງສີສະຫວ່າງວົງ ໜ້າຫໍພິພິທະພັນແຫ່ງຊາດຫຼວງພະບາງ ໂດຍມີ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ, ພ້ອມດ້ວຍອະດີດການນໍາຂັ້ນສູງຈາກສູນກາງ, ເຈົ້າແຂວງ, ມີສະຖານກົງສູນໃຫ່ຍ ສສ ຫວຽດນາມ ແລະ ສປ ຈີນ, ປະຊາຊົນບັນດາເຜົ່າຊາວຫຼວງພະບາງ ລວມທັງແຂກທັງພາຍໃນ ແລະ ຕ່າງປະເທດ ເຂົ້າຮ່ວມຢ່າງຫຼວງຫຼາຍ.

ໃນພິທີ ທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ປະທານຈັດງານບຸນປະເພນີປີໃໝ່ລາວ ພສ 2567 ແລະ ສະເຫຼີມສະຫຼອງປີທ່ອງທ່ຽວລາວ 2024 ຂອງແຂວງຫຼວງພະບາງ ໄດ້ລາຍງານວ່າ: ການຈັດງານບຸນປະເພນີປີໃໝ່ລາວ ພສ 2567 ທີ່ເປັນງານບຸນປະເພນີຂອງຊາດລາວ ໄດ້ສືບທອດກັນມາຫຼາຍເຊັ່ນຄົນ; ໃນປີນີ້ ຖືວ່າມີຄວາມພ້ອມໃນທຸກດ້ານ, ພິເສດປີນີ້ ຄະນະຮັບຜິດຊອບໄດ້ນໍາເອົາກິດຈະກຳສະເຫຼີມສະຫຼອງປີທ່ອງທ່ຽວລາວ 2024 ຕິດພັນກັບງານບຸນປະເພນີປີໃໝ່ລາວ ພສ 2567 ເພື່ອໂຄສະນາເຜີຍແຜ່ວັດທະນະທຳ, ວິຖີຊີວິດ ແລະ ຮີດຄອງປະເພນີອັນດີງາມ ທີ່ເປັນເອກະລັກສະເພາະຂອງຊາວຫຼວງພະບາງ, ວາງສະແດງບັນດາຜະລິດຕະພັນການທ່ອງທ່ຽວ ແລະ ສະຖານທີ່ທ່ອງທ່ຽວອັນໂດດເດັ່ນທາງດ້ານທຳມະຊາດ, ປະຫວັດສາດ ແລະ ວັດທະນະທຳຂອງແຂວງຫຼວງພະບາງ ໃຫ້ແຂກພາຍໃນ ແລະ ຕ່າງປະເທດໄດ້ຮັບຮູ້.

ສໍາລັບແຂວງຫຼວງພະບາງ ໄດ້ກຳນົດເອົາ 2 ກິດຈະກໍາຫຼັກ ເປັນງານສະເຫຼີມສະຫຼອງປີທ່ອງທ່ຽວລາວຂອງແຂວງ ຄື: ງານບຸນປະເພນີປີໃໝ່ລາວ ແລະ ງານບຸນອອກພັນສາປະວໍລະນາ. ໃນໄລຍະຜ່ານມາ ອົງການປົກຄອງແຂວງ ໄດ້ໃຫ້ຄວາມສໍາຄັນຕໍ່ການພັດທະນາ, ສົ່ງເສີມວຽກງານການທ່ອງທ່ຽວເປັນຂະແໜງການຫຼັກໃນການຊຸກຍູ້ເສດຖະກິດຂອງແຂວງ ແລະ ໃນຕໍ່ໜ້າ ຈະສືບຕໍ່ພັດທະນາບັນດາພື້ນຖານໂຄງລ່າງ, ສິ່ງອໍານວຍຄວາມສະດວກດ້ານການທ່ອງທ່ຽວ ໃຫ້ມີຄຸນະພາບ, ມີຫຼາຍສີສັນ, ຕິດພັນກັບການຟື້ນຟູ, ອະນຸລັກ ແລະ ເສີມຂະຫຍາຍມໍລະດົກວັດທະນະທຳ ທີ່ເປັນເອກະລັກສະເພາະຂອງຊາວຫຼວງພະບາງ, ປັດຈຸບັນທົ່ວແຂວງ ມີສະຖານທີ່ທ່ອງທ່ຽວ 228 ແຫ່ງ ຊຶ່ງເປີດບໍລິການແລ້ວ 158 ແຫ່ງ ແລະ ປີ 2024 ແຂວງຫຼວງພະບາງ ໄດ້ຕັ້ງເປົ້າໝາຍດຶງດູດນັກທ່ອງທ່ຽວໃຫ້ໄດ້ 1 ລ້ານ 7 ແສນເທື່ອຄົນ.

ຈາກນັ້ນ ທ່ານ ຄໍາຂັນ ຈັນທະວີສຸກ ເຈົ້າແຂວງຫຼວງພະບາງ ໄດ້ກ່າວເປີດງານບຸນປະເພນີປີໃໝ່ລາວ ແລະ ສະເຫຼີມສະຫຼອງປີທ່ອງທ່ຽວລາວ 2024 ຢ່າງເປັນທາງການ ໂດຍໄດ້ເຊີນຊວນບັນດານັກທ່ອງທ່ຽວທັງພາຍໃນ, ຈາກພາກພື້ນ ແລະ ສາກົນ ທີ່ເຂົ້າມາທ່ຽວຊົມແຂວງຫຼວງພະບາງ ມາສໍາຜັດກັບບັນດາສະຖານທີ່ທ່ອງທ່ຽວ, ຮີດຄອງປະເພນີ ວັດທະນະທໍາ ທີ່ເປັນເອກະລັກສະເພາະ ຂອງຊາວຫຼວງພະບາງ. ພ້ອມນີ້ ທ່ານໄດ້ສະແດງຄວາມຍ້ອງຍໍຊົມເຊີຍ ຄະນະຮັບຜິດຊອບ, ອະນຸກຳມະການຝ່າຍຕ່າງໆ, ນັບທັງພາກລັດ, ພາກທຸລະກິດ ຕະຫຼອດຮອດ ຊາວນະຄອນຫຼວງພະບາງ ແລະ ບັນດາເມືອງໃນທົ່ວແຂວງ ທີ່ໄດ້ມີສ່ວນຮ່ວມເຂົ້າໃນການກະກຽມບັນດາກິດຈະກຳ ບຸນປະເພນີປີໃໝ່ລາວ ພສ 2567 ແລະ ສະເຫຼີມສະຫຼອງປີທ່ອງທ່ຽວລາວ 2024 ຊຶ່ງແມ່ນປາງບຸນປະເພນີ ທີ່ມີຄວາມໝາຍ-ຄວາມສຳຄັນ ລະດັບຊາດ. ແມ່ນວັດທະນະທຳອັນດີງາມ ທີ່ເປັນເອກະລັກສະເພາະຂອງຊາວນະຄອນ ຫຼວງພະບາງ ເມືອງມໍລະດົກໂລກ ທີ່ໄດ້ສືບທອດປະຕິບັດກັນມາເປັນເວລາເຫິງນານ ຈົນເທົ້າເຖິງທຸກວັນນີ້.

ໂອກາດນີ້ ທ່ານ ປະທານປະເທດ ໄດ້ໃຫ້ກຽດຕັດແຖບຜ້າ ແລະ ລັ່ນຄ້ອງ 9 ບາດ ເພື່ອເປັນສີລິມຸງຄຸນ ແລະ ເປີດງານຢ່າງເປັນທາງການ. ໃນພິທີຜູ້ເຂົ້າຮ່ວມ ໄດ້ຊົມຂະບວນກ້ອນກໍາລັງຈາກຫຼາຍພາກສ່ວນ ພາຍໃນນະຄອນ ຫຼວງພະບາງ, ບັນດາເມືອງອ້ອມຂ້າງ ແລະ 13 ເຜົ່າ ທີ່ດຳລົງຊີວິດຢູ່ແຂວງຫຼວງພະບາງ ລວມທັງໝົດ 40 ຂະບວນ, ຊຶ່ງແຕ່ລະຂະບວນລ້ວນແລ້ວແຕ່ສ່ອງແສງໃຫ້ເຫັນເຖິງຂະນົບທຳນຽມ, ຮີດຄອງປະເພນີ ທີ່ເປັນເອກະລັກສະເພາະຂອງຊາວຫຼວງພະບາງ.

(ຂ່າວ-ພາບ: ແຂວງຫຼວງພະບາງ)