ຂ່າວຕ່າງປະເທດລາຍງານ ໃນ 13 ເມສາ ຜ່ານມາ, ກະຊວງກິດຈະການພາຍໃນ ແລະ ການສື່ສານຂອງຍີ່ປຸ່ນ ລາຍງານວ່າ: ຈຳນວນປະຊາກອນຂອງຍີ່ປຸ່ນ ຊຶ່ງລວມຜູ້ຢູ່ອາໄສທີ່ບໍ່ແມ່ນຄົນຍີ່ປຸ່ນ ຫຼຸດລົງ 595.000 ຄົນ ຫຼື 0,48% ຈາກປີກ່ອນ ເຫຼືອຢູ່ທີ່ 124.352.000 ຄົນ ເມື່ອນັບເຖິງວັນທີ 1 ຕຸລາ 2023 ຊຶ່ງຖືເປັນການຫຼຸດລົງຕິດຕໍ່ກັນເປັນປີທີ 13.

ຂ່າວລະບຸວ່າ: ຜົນການສຳຫຼວດຂໍ້ມູນປະຊາກອນຂອງກະຊວງດັ່ງກ່າວ ຊຶ່ງເຜີຍແຜ່ໃນວັນທີ 12 ເມສາ ຜ່ານມາວ່າ: ຈຳນວນປະຊາກອນສັນຊາດຍີ່ປຸ່ນຫຼຸດລົງ 837.000 ຄົນ ຫຼື 0,69% ເຫຼືອຢູ່ທີ່ 121.193.000 ຄົນ ຊຶ່ງເປັນການຫຼຸດລົງຫຼາຍທີ່ສຸດຕັ້ງແຕ່ມີຂໍ້ມູນປຽບທຽບໃນປີ 1950.

ຈຳນວນປະຊາກອນອາຍຸ 75 ປີຂຶ້ນໄປ ເພີ່ມຂຶ້ນ 731.000 ຄົນ ຢູ່ທີ່ປະມານ 20,08 ລ້ານຄົນ ຊຶ່ງເປັນຄັ້ງທຳອິດທີ່ສູງເກີນຫຼັກ 20 ລ້ານຄົນ, ສ່ວນຈຳນວນປະຊາກອນອາຍຸ 0-14 ປີ ຫຼຸດລົງ 329.000 ຄົນ ຢູ່ທີ່ປະມານ 14,17 ລ້ານຄົນ ຫຼື 11,4% ຂອງປະຊາກອນທັງໝົດ ຊຶ່ງຖືວ່າຕໍ່າທີ່ສຸດ.

ຂະນະດຽວກັນຈຳນວນປະຊາກອນຕ່າງປະເທດເພີ່ມຂຶ້ນ 243.000 ຄົນ ຢູ່ທີ່ປະມານ 3,16 ລ້ານຄົນ ໂດຍຄົນເຮັດວຽກ ແລະ ນັກຮຽນ, ນັກສຶກສາຄົນຕ່າງປະເທດທີ່ອາໄສຢູ່ໃນຍີ່ປຸ່ນເປັນເວລາ 3 ເດືອນຂຶ້ນໄປ ຈະຖືກນັບລວມຢູ່ໃນຂໍ້ມູນສະຖິຕິປະຊາກອນທັງໝົດ.

ໂຕກຽວ ຊຶ່ງເປັນນະຄອນຫຼວງຂອງຍີ່ປຸ່ນ ເປັນພຽງພື້ນທີ່ດຽວຈາກ 47 ແຂວງຂອງຍີ່ປຸ່ນທີ່ມີປະຊາກອນເພີ່ມຂຶ້ນ ຊຶ່ງເປັນການເພີ່ມຂຶ້ນຕິດຕໍ່ກັນເປັນປີທີ 2 ຂອງນະຄອນຫຼວງໂຕກຽວ.