ພະແນກການເງິນແຂວງຄຳມ່ວນ ແລະ ພະແນກການເງິນແຂວງກວາງບິ່ງ ສສ ຫວຽດນາມ ໄດ້ຈັດພິທີເຊັນບົດບັນທຶກການຮ່ວມມື 2 ຝ່າຍຂຶ້ນໃນວັນທີ 24 ເມສາຜ່ານມາ ທີ່ພະແນກການເງິນແຂວງຄຳມ່ວນ ຮ່ວມລົງນາມໃນຄັ້ງນີ້ຝ່າຍລາວນໍາໂດຍສະຫາຍ ຄຳສິງ ໄຊສິດທິເດດ ກໍາມະການພັກແຂວງ ຫົວໜ້າພະແນກ ການເງິນແຂວງຄຳມ່ວນ ແລະ ຝ່າຍຫວຽດນາມນຳໂດຍສະຫາຍ ຟ໋າມ ກວາງ ລອງ ກໍາມະການພັກແຂວງ ຫົວໜ້າພະແນກການເງິນແຂວງກວາງບິ່ງ ພ້ອມດ້ວຍຄະນະຜູ້ແທນສອງຝ່າຍເຂົ້າຮ່ວມ.

ການເຊັນບົດບັນທຶກໃນຄັ້ງນີ້ທັງສອງຝ່າຍໄດ້ເປັນເອກະພາບບົນພື້ນຖານເນື້ອໃນຈິດໃຈຄື:

1. ສືບຕໍ່ເພີ່ມທະວີສາຍພົວພັນຮ່ວມມືລະຫວ່າງພະແນກການເງິນແຂວງຂອງສອງແຂວງ; ຈັດຕັ້ງກອງປະຊຸມຜັດປ່ຽນກັນເປັນເຈົ້າພາບ 2 ປີ/ຄັ້ງ ລະຫວ່າງພະແນກການເງິນແຂວງຄຳມ່ວນ ກັບພະແນກການເງິນແຂວງກວາງບິ່ງ, ພົບປະແລກປ່ຽນບົດຮຽນຮ່ວມມືຊ່ວຍເຫຼືອຊຶ່ງກັນ ແລະ ກັນ ກ່ຽວກັບການຄຸ້ມຄອງວຽກງານການເງິນ, ການບໍລິຫານດ້ານງົບປະມານ, ການບໍລິຫານດ້ານງົບປະມານຂອງລັດຂັ້ນເມືອງ, ສະຖານທີ່, ວັນເວລາໃນການພົບປະແມ່ນຂຶ້ນກັບສະພາບຕົວຈິງຂອງສອງຝ່າຍ. ກ່ອນທີ່ຄະນະຈະເດີນທາງແມ່ນຕ້ອງແຈ້ງໃຫ້ກັນ ຊາບກ່ຽວກັບແຜນການເຄື່ອນໄຫວ, ເນື້ອໃນ ແລະ ສະມາຊິກໃນຄະນະ.

2.ໂຄສະນາເຜີຍແຜ່ ແລະ ຈັດຕັ້ງບັນດາການເຄື່ອນໄຫວກິດຈະກໍາວັນສ້າງຕັ້ງສາຍພົວພັນການທູດ ຄົບຮອບ 62 ປີ (05/09/1962-05/09/2024) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມືຫວຽດນາມ-ລາວ ຄົບຮອບ 47 ປີ (18/07/1977-18/09/2024) ແລະ ງານປະເພນີຂອງສອງປະເທດປີຕໍ່ປີ. ພິເສດປີ 2024 ພິທີສະເຫຼີມສະຫຼອງຄົບຮອບ 25 ປີວັນສ້າງຕັ້ງເຂດສາມຫຼ່ຽມພັດທະນາ ແລະ ສາມປະເທດຫວຽດ ນາມ, ລາວ, ກຳປູເຈຍ.

3. ພະແນກການເງິນແຂວງກວາງບິ່ງສືບຕໍ່ລາຍງານ ເປັນເສນາທິການໃຫ້ແກ່ຄະນະກໍາມະການປະຊາຊົນແຂວງກວາງບິ່ງ ເພື່ອອຳນວຍຄວາມສະດວກ ແລະ ຄ່າໃຊ້ຈ່າຍໃນການກໍ່ສ້າງພາສາຫວຽດນາມ, ຂະແໜງ ການທີ່ແຂວງກວາງບິ່ງ ແລະ ບາງເນື້ອໃນທີ່ກ່ຽວຂ້ອງໃນການພັດທະນາເສດຖະກິດ-ສັງຄົມຕາມການສະເໜີຂອງແຂວງຄຳມ່ວນ ແລະ ຄວາມສາມາດຂອງແຂວງກວາງບິ່ງ.

4. ບັນດາຂໍ້ມູນການແລກປ່ຽນລະຫວ່າງສອງຝ່າຍ ແມ່ນໄດ້ປະຕິບັດຜ່ານຂະແໜງການຮ່ວມມືສາກົນແຂວງຄຳມ່ວນ ແລະ ພະແນກພົວພັນຕ່າງປະເທດແຂວງກວາງບິ່ງ.

ໃນຕອນເຊົ້າຂອງວັນດຽວກັນ ໄດ້ມີພິທີພົບປະ 2 ຝ່າຍ ຊຶ່ງຝ່າຍລາວນໍາໂດຍສະຫາຍ ຄຳສິງ ໄຊສິດທິເດດ ກໍາມະການພັກແຂວງ ຫົວໜ້າພະແນກການເງິນແຂວງຄຳມ່ວນ ແລະ ຝ່າຍຫວຽດນາມນຳໂດຍສະຫາຍ ຟ໋າມ ກວາງ ລອງ ກໍາມະການພັກແຂວງ ຫົວໜ້າພະແນກການເງິນແຂວງກວາງບິ່ງ ພ້ອມດ້ວຍຄະນະຜູ້ແທນສອງຝ່າຍເຂົ້າຮ່ວມ.

ການພົບປະຄັ້ງນີ້, ທັງສອງຝ່າຍໄດ້ແຈ້ງຈຸດປະສົງໃຫ້ກັນຊາບ ພ້ອມທັງຕີລາຄາສູງຕໍ່ສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງລາວ-ຫວຽດນາມ ເວົ້າລວມ, ເວົ້າສະເພາະ ພະແນກການເງິນແຂວງຄຳມ່ວນ ແລະ ພະແນກການເງິນແຂວງກວາງບິ່ງໃຫ້ນັບມື້ນັບໄດ້ຮັບການພັດທະນາ ແຕກດອກອອກຜົນຢ່າງບໍ່ຢຸດຢັ້ງ. ຂ່າວ-ພາບ: ແດງສະຫວັດ ແສນພານິດ