ຂ່າວສານຫວຽດນາມລາຍງານວ່າ: ໃນການປະກາດເມື່ອວັນທີ 28 ເມສາ ຜ່ານມາ, ທ່ານ ຊີກ ໂມຮາມເມັດ ບິນ ຣາສຊິດ ອັລ ມາກຕູມ (Sheikh Mohammed bin Rashid Al Maktoum) ນາຍົກລັດຖະມົນຕີ ສະຫະລັດ ອາຣັບເອມີເຣດ (UAE) ປະກາດວ່າ: ສະຫະລັດ ອາຣັບເອມີເຣດ ໄດ້ເລີ່ມກໍ່ສ້າງອາຄານຜູ້ໂດຍສານໃໝ່ ຢູ່ສະໜາມບິນສາກົນ ອັລ ມາກຕູມ (Al Maktoum).
ຂ່າວລະບຸວ່າ: ມູນຄ່າການລົງທຶນເກືອບ 35 ຕື້ໂດລາ, UAE ເຊື່ອໝັ້ນວ່ານີ້ຈະແມ່ນອາຄານຜູ້ໂດຍສານທີ່ໃຫຍ່ທີ່ສຸດໃນໂລກ.ພາຍຫຼັງອາຄານຜູ້ໂດຍສານໃໝ່ນີ້ກໍ່ສ້າງສຳເລັດ, ສະໜາມບິນສາກົນ Al Maktoum ຈະສາມາດໃຫ້ບໍລິການຜູ້ໂດຍສານໄດ້ 260 ລ້ານຄົນຕໍ່ປີ, ກາຍເປັນສະໜາມບິນທີ່ມີຄວາມຈຸໃຫຍ່ທີ່ສຸດໃນໂລກ ແລະ ມີຂະໜາດໃຫຍ່ກວ່າ 5 ເທົ່າຂອງສະໜາມບິນສາກົນດູໄບໃນປັດຈຸບັນ.
ທາງການ UAE ຫວັງວ່າໃນອະນາຄົດ, ສະໜາມບິນ Al Maktoum ພາຍຫຼັງໄດ້ຮັບການຂະຫຍາຍ, ຈະປ່ຽນແທນບົດບາດຂອງສະໜາມບິນສາກົນດູໄບ ຊຶ່ງປັດຈຸບັນສາມາດໃຫ້ບໍລິການຜູ້ໂດຍສານໄດ້ 120 ລ້ານຄົນ/ປີ ແຕ່ບໍ່ສາມາດຂະຫຍາຍໄດ້ຕື່ມອີກ ເພາະຕັ້ງຢູ່ໃຈກາງເມືອງ.