ຫວ່າງບໍ່ດົນມານີ້ທີ່ ທໍານຽບປະທານາທິບໍດີ ແຫ່ງ ສ ຕວັກກີນະຄອນຫຼວງອັງກາຣາ,ທ່ານ ລັດສະໝີ ແກ້ວມະນີ ໄດ້ຍື່ນສານຕາຕັ້ງຕໍ່ ພະນະທ່ານRecep Tayyip Erdoğanປະທານາທິບໍດີ ແຫ່ງ ສ ຕວັກກີ ເພື່ອດຳລົງຕຳແໜ່ງເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສ ຕວັກກີ ຊຶ່ງມີສໍານັກງານ ຕັ້ງຢູ່ ເຊີແນວປະເທດສະວິດເຊີແລນ.

ພາຍຫຼັງການຢື່ນສານຕາຕັ້ງ, ທ່ານທູດລາວຄົນໃໝ່ໄດ້ຮັບກຽດພົບປະໂອ້ລົມກັບ ພະນະທ່ານປະທານາທິບໍດີ ຊຶ່ງທ່ານທູດໄດ້ນຳເອົາຄວາມຢື້ຢາມຖາມຂ່າວອັນອົບອຸ່ນ ແລະພອນໄຊອັນປະເສີດຈາກ ພະນະທ່ານ ທອງລຸນ ສີສຸລິດປະທານປະເທດ ແຫ່ງ ສປປ ລາວ ສົ່ງເຖິງ ພະນະທ່ານRecep Tayyip Erdoğan ແລະຜ່ານ ພະນະທ່ານ ໄປຍັງລັດຖະບານ ແລະ ປະຊາຊົນ ສຕວັກກີ ທຸກຖ້ວນໜ້າ ແລະ ໄດ້ຕີລາສູງຕໍ່ຜົນສໍາເລັດຂອງການພົວພັນຮ່ວມມືສອງຝ່າຍ ລາວ-ຕວັກກີ ຕະຫຼອດໄລຍະຫົກທົດສະວັດຜ່ານມາ (1958-2024); ພິເສດ, ໄດ້ສະແດງຄວາມຊົມເຊີຍຕໍ່ບົດບາດອັນສຳຄັນທາງດ້ານການເມືອງ-ຄວາມໝັ້ນຄົງ ແລະການພັດທະນາເສດຖະກິດ-ສັງຄົມ ຂອງ ສ. ຕວັກກີ ອັນໄດ້ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ ແລະປະກອບສ່ວນເຂົ້າໃນການສ້າງສັນຕິພາບ ແລະຄວາມໝັ້ນຄົງຢູ່ພາກພື້ນ ແລະສາກົນ. ໃນໂອກາດດັ່ງກ່າວ, ທ່ານປະທານາທິບໍດີໄດ້ຕີລາຄາສູງ ແລະຊົມເຊີຍຕໍ່ການມາດໍາລົງຕໍາແໜ່ງ ເປັນເອກອັກຄະລັດຖະທູດ ແຫ່ງ ສປປ ລາວ ປະຈໍາ ສຕວັກກີ ແລະອວຍພອນໃຫ້ທ່ານທູດຈົ່ງປະສົບຜົນສໍາເລັດໃນການປະຕິບັດໜ້າທີ່ ແນໃສ່ສົ່ງເສີມສາຍພົວພັນຮ່ວມມືສອງຝ່າຍ ລາວ-ຕວັກກີ ໃຫ້ນັບມື້ນັບເພີ່ມທະວີຂຶ້ນ
ໃນໂອກາດເຂົ້າຮ່ວມພິທີຍື່ນສານຕາຕັ້ງຄັ້ງນີ້, ທ່ານທູດລາວຄົນໃໝ່ຍັງໄດ້ພົບປະແລະເຮັດວຽກ ກັບທ່ານຫົວໜ້າກົມພິທີການທູດ ແລະທ່ານຫົວໜ້າກົມ ອາຊີ-ປາຊີຟິກ, ກະຊວງການຕ່າງປະເທດ ແລະທ່ານກົງສູນກິດຕິມະສັກ ແຫ່ງ ສປປ ລາວ ປະຈໍາ ສ ຕວັກກີ ຊຶ່ງໄດ້ຕີລາຄາສູງຕໍ່ການຜັນຂະຫຍາຍການພົວພັນຮ່ວມມືສອງຝ່າຍ ລາວ-ຕວັກກີ ໃນໄລຍະຜ່ານມາ ແລະກໍານົດທິດທາງໃນຕໍ່ໜ້າ ໂດຍຈະສຸມໃສ່ບາງຂົງເຂດບຸລິມະສິດທີ່ທັງສອງຝ່າຍມີຄວາມອາດສາມາດ ແລະທ່າແຮງບົ່ມຊ້ອນເຊັ່ນ: ການສຶກສາ, ການທ່ອງທ່ຽວ, ການຄ້າ ແລະການລົງທຶນ. ພ້ອມນີ້, ສອງຝ່າຍຈະເພີ່ມທະວີການພົວພັນຮ່ວມມືໃນຂອບຫຼາຍຝ່າຍຕື່ມເປັນຕົ້ນ: ອາຊຽນ, ເອເຊັມ (ASEM), ເອຊີດີ (ACD) ແລະອົງການສະຫະປະຊາຊາດ.
ສປປ ລາວ ແລະສຕວັກກີ ສ້າງຕັ້ງສາຍພົວພັນການທູດນໍາກັນໃນວັນທີ 26 ມິຖຸນາ 1958 (ຄົບຮອບ 66 ປີ).