ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 7 ພຶດສະພາ ຜ່ານມານີ້, ພິທີຮັບດຳລົງຕຳແໜ່ງປະທານາທິບໍດີ ຣັດເຊຍ ຂອງທ່ານ ວະລາດີເມຍ ປູຕິນ ໄດ້ຈັດຂຶ້ນທີ່ວັງເຄຣມລິນ (Kremlin). ໂດຍແມ່ນພິທີຮັບດຳລົງຕຳແໜ່ງປະທານາທິບໍດີ ສະໄໝທີ 5 ໃນພາລະກິດການເມືອງຂອງທ່ານ ວະລາດີເມຍ ປູຕິນ, ໂດຍຊ້ອງໜ້າບັນດາສະມາຊິກໃນສະພາສູງ, ສະພາຕ່ຳ ແລະ ຜູ້ພິພາກສາສານລັດຖະທຳມະນຸນ ຣັດເຊຍ.

ຂ່າວລະບຸວ່າ: ໃນພິທີທ່ານ ວະລາດີເມຍ ປູຕິນ ໄດ້ປະຕິຍານຕົນວ່າຈະເຄົາລົບ, ປົກປ້ອງບັນດາສິດ ແລະ ສິດເສລີຂອງມະນຸດ ແລະ ພົນລະເມືອງ, ປະຕິບັດ ແລະ ປົກປ້ອງລັດຖະທຳມະນຸນ ສະຫະພັນ ຣັດເຊຍ, ປົກປັກຮັກສາອະທິປະໄຕ ແລະ ເອກະລາດ, ຄວາມໝັ້ນຄົງ ແລະ ຜືນແຜ່ນດິນອັນຄົບຖ້ວນຂອງ ລັດ, ຈົງຮັກພັກດີຮັບໃຊ້ປະຊາຊົນ. ຫຼັງຈາກນັ້ນ, ປະທານສານລັດຖະທຳມະນູນ ຣັດເຊຍ ໄດ້ປະກາດໃຫ້ທ່ານ ວະລາດີເມຍ ປູຕິນ ໄດ້ຮັບດຳລົງຕຳແໜ່ງ.

ກ່ອນໜ້ານັ້ນ, ໃນການເລືອກຕັ້ງປະທານາທິບໍດີ ຣັດເຊຍ ຄັ້ງທີ 8 ທີ່ດຳເນີນແຕ່ວັນທີ 15 – 17 ມີນາ ຜ່ານມາ, ທ່ານ ວະລາດີເມຍ ປູຕິນ ຍາດໄດ້ໄຊຊະນະຢ່າງຂາດຂັ້ນ ນັບແຕ່ການເລືອກຕັ້ງຮອບທຳອິດ, ດ້ວຍຈຳນວນຫຼາຍກວ່າ 87% ຂອງຈຳນວນບັດສະໜັບສະໜູນ.