ຂ່າວຕ່າງປະເທດລາຍງານ ໃນວັນທີ 6 ພຶດສະພາ ຜ່ານມາ, ທ່ານ ຊົກ ສຸເກນ ລັດຖະມົນຕີກະຊວງການທ່ອງທ່ຽວກຳປູເຈຍ ເປີດເຜີຍຄວາມຄາດຫວັງວ່າ: ກຳປູເຈຍຈະໄດ້ດຳເນີນການຮ່ວມມືກັບ ຫົວເຫວີຍ ເຕັກໂນໂລຊີ (Huawei Technologies) ຊຶ່ງເປັນບໍລິສັດລາຍໃຫຍ່ດ້ານໂທລະຄົມມະນາຄົມຂອງຈີນ ເພື່ອສົ່ງເສີມໂຄງການລິເລີ່ມດ້ານການທ່ອງທ່ຽວດີຈີຕອນ ຂອງກຳປູເຈຍ.

ທ່ານ ຊົກ ສຸເກນ ໄດ້ພົບປະກັບ ທ່ານ ເຖົາກວງເຍົ່າ ປະທານເຈົ້າໜ້າທີ່ບໍລິຫານຂອງຫົວເຫວີຍ ເຕັກໂນໂລຊີ (ກຳປູເຈຍ) ຈຳກັດ ແລະ ກ່າວເຖິງວິໃສທັດ ໃນການເສີມສ້າງການເຮັດວຽກລະຫວ່າງກະຊວງດັ່ງກ່າວ ກັບຫົວເຫວີຍ ໂດຍສະເພາະໃນດ້ານການພັດທະນາໂຄງການລິເລີ່ມການທ່ອງທ່ຽວດີຈີຕອນ.

ການທ່ອງທ່ຽວເປັນໜຶ່ງໃນສີ່ພາກສ່ວນສຳຄັນທີ່ສະໜັບສະໜູນເສດຖະກິດຂອງກຳປູເຈຍ ໂດຍລາຍງານລ່າສຸດຈາກກະຊວງການທ່ອງທ່ຽວກຳປູເຈຍ ເປີດເຜີຍຈຳນວນນັກທ່ອງທ່ຽວຕ່າງປະເທດ ໃນໄຕມາດທຳອິດ (ມັງກອນ-ມີນາ) ຂອງປີ 2024 ມີ 1,58 ລ້ານຄົນ ເພີ່ມຂຶ້ນ 22,5% ຈາກ 1,29 ລ້ານຄົນໃນໄລຍະດຽວກັນຂອງປີ 2023.

ກຳປູເຈຍມີແຫຼ່ງມໍລະດົກໂລກ 4 ແຫ່ງ ໄດ້ແກ່ ອຸທິຍານບູຮານຄະດີອັງກໍ ຫຼື ນະຄອນວັດ ໃນແຂວງສຽມຣຽບ ແລະ ກຸ່ມຜາສາດສົມບູນໄພຄຸກ ໃນແຂວງກຳປຣົງຖົມ ລວມທັງຜາສາດພຣະວິຫານ ແລະ ບູຮານສະຖານເກາະແກຣ ໃນແຂວງພຣະວິຫານ ແລະ ມີແຄມຝັ່ງຍາວປະມານ 450 ກິໂລແມັດ ຜ່ານສີ່ແຂວງທາງພາກຕາເວັນຕົກສ່ຽງໃຕ້ ເຊັ່ນ: ສີໜຸວິນ, ກຳປອດ, ແກບ ແລະ ເກາະກົງ.