ຂ່າວຕ່າງປະເທດລາຍງານ ໃນວັນທີ 7 ພຶດສະພາ ຜ່ານມາ, ຄະນະກຳມະການໂອແລັມປິກສາກົນ (IOC) ເປີດເຜີຍລະບົບເຝົ້າຕິດຕາມທີ່ຂັບເຄື່ອນດ້ວຍປັນຍາປະດິດ (AI) ຈະປົກປ້ອງນັກກິລາ ແລະ ເຈົ້າໜ້າທີ່ຈາກການລ່ວງລະເມີດໃນໂລກອອນລາຍໃນໄລຍະການແຂ່ງຂັນກິລາໂອແລັມປິກ ແລະ ພາຣາລິມປິກ ປາຣີ 2024.

ຖະແຫຼງການຈາກ IOC ລະບຸວ່າ: ການແຂ່ງຂັນກິລາປາຣີ 2024 ຈະນຳໃຊ້ປັນຍາປະດິດ ເພື່ອສ້າງພື້ນທີ່ໆປອດໄພໃນໂລກອອນລາຍ ສຳລັບນັກກິລາເປັນຄັ້ງທຳອິດ ໂດຍລະບົບທີ່ຂັບເຄື່ອນດ້ວຍປັນຍາປະດິດນີ້ຈະຕິດຕາມບັນຊີຜູ້ໃຊ້ວຽກໃນແພລັດຟອມສື່ສັງຄົມອອນລາຍຫຼາຍພັນບັນຊີ ໃນ 30 ກວ່າພາສາແບບເວລາຈິງ ແລະ ສົ່ງສັນຍານເຕືອນໄພເມື່ອພົບເຫັນ.

IOC ກ່າວວ່າ: ເຄີຍມີການທົດລອງນຳໃຊ້ລະບົບດັ່ງກ່າວໃນໄລຍະໂອແລັມປິກອີສະປອດ ໃນປີ 2023 ໂດຍວິເຄາະໂພສຂອງສາທາລະນະ 17.000 ກວ່າໂພສ ແລະ ສົ່ງສັນຍານເຕືອນຂໍ້ຄວາມທີ່ອາດບໍ່ ເໝາະສົມ 199 ຂໍ້ຄວາມຈາກຜູ້ຂຽນ 48 ຄົນ ທີ່ຕັ້ງເປົ້າໄປຍັງບັນຊີຜູ້ຫຼິ້ນ 122 ຄົນ ແລະ ບັນຊີທາງການຂອງຄະນະກຳມະການ 2 ບັນຊີ.

ລະບົບດັ່ງກ່າວຮ່ວມກັນພັດທະນາ ໂດຍຄະນະກຳມະການນັກກິລາ ແລະ ຄະນະກຳມະການທາງການແພດ ແລະ ວິທະຍາສາດ ຂອງຄະນະກຳມະການໂອແລັມປິກສາກົນ ໂດຍຈະຊ່ວຍໃຫ້ຄະນະກຳມະການໂອແລັມປິກສາກົນເຂົ້າໃຈເຖິງຄວາມທ້າທາຍທີ່ນັກກິລາປະເຊີນຈາກການລ່ວງລະເມີດໃນໂລກອອນລາຍໄດ້ດີຍິ່ງຂຶ້ນ ຊຶ່ງເອື້ອອຳນວຍຕໍ່ການເພີ່ມປະສິດທິພາບການປົກປ້ອງນັກກິລາໃນການແຂ່ງຂັນໃນອະນາຄົດໄດ້.

ທັງນີ້, ລະບົບເຝົ້າຕິດຕາມໃນໂລກອອນລາຍຈະນຳໃຊ້ເພື່ອເບິ່ງແຍງນັກກິລາ 15.000 ຄົນ ແລະ ເຈົ້າໜ້າທີ່ຫຼາຍກວ່າ 2.000 ຄົນ ຕະຫຼອດການແຂ່ງຂັນກິລາໂອແລັມປິກ ແລະ ພາຣາລິມປິກ.