ຂ່າວຕ່າງປະເທດລາຍງານ ໃນວັນທີ 8 ພຶດສະພາ ຜ່ານມາວ່າ: ລັດຖະບານອົສຕຣາລີໄດ້ປະກາດເພີ່ມຍອດເງິນຝາກຂັ້ນຕ່ໍາຕື່ມອີກສໍາລັບບັນຊີນັກສຶກສາຕ່າງປະເທດ ພ້ອມທັງເຕືອນບັນດາມະຫາວິທະຍາໄລແຫ່ງຕ່າງໆຢ່າສໍ້ໂກງຮັບເອົານັກສຶກສາໂດຍບໍ່ມີການກວດສອບການເຂົ້າຮຽນຕາມຕົວຈິງ ເພື່ອຫວັງທີ່ຈະຫຼຸດຈຳນວນຄົນອົບພະຍົບເຂົ້າປະເທດທີ່ເພີ່ມຂຶ້ນສູງ.

ຂ່າວລະບຸວ່າ: ນັບແຕ່ວັນທີ 10 ພຶດສະພາ 2024, ນັກສຶກສາຕ່າງປະເທດທີ່ຈະໄປຮຽນຢູ່ອົສຕຣາລີ ຈະຕ້ອງມີເງິນຝາກໄວ້ໃນບັນຊີທະນາຄານເພື່ອເຮັດໃບແຈ້ງຍອດການຍື່ນຂໍວີຊາ. ໂດຍຕ້ອງມີຍອດເງິນໃນບັນຊີທະນາຄານຢ່າງໜ້ອຍ 29.710 ໂດລາອົສຕຣາລີ ເພື່ອຍື່ນຂໍວີຊາ ຊຶ່ງຖືວ່າເປັນຄັ້ງທີສອງທີ່ວົງເງິນສິນເຊື່ອເພີ່ມຂຶ້ນໃນເວລາພຽງ 7 ເດືອນ ໂດຍໃນເດືອນຕຸລາປີກາຍນີ້ ມີການປັບເພີ່ມຂຶ້ນຈາກ 21.041 ໂດລາອົສຕຣາລີ ມາເປັນ 24.505 ໂດລາອົສຕຣາລີ, ເພີ່ມຂຶ້ນ3.464 ໂດລາອົສຕຣາລີ.

ນອກຈາກການປະກາດເພີ່ມຍອດເງິນຝາກໃນບັນຊີນັກສຶກສາຕ່າງປະເທດແລ້ວຍັງມີການເຕືອນວິທະຍາໄລຫຼາຍໆແຫ່ງບໍ່ໃຫ້ມີການສໍ້ໂກງຮັບນັກສຶກສາໂດຍບໍ່ໄດ້ກວດສອບການເຂົ້າຮຽນຕາມຕົວຈິງອີກດ້ວຍ ຊຶ່ງການເຄື່ອນໄຫວຄັ້ງນີ້ໄດ້ເກີດຂຶ້ນຫຼັງຈາກທີ່ມີຄົນອົບພະຍົບຈຳນວນຫຼວງຫຼາຍໄດ້ຫຼັ່ງໄຫຼເຂົ້າປະເທດ ພາຍຫຼັງທີ່ລັດຖະບານຍົກມາດຕະການຄວບຄຸມ ໂຄວິດ-19, ເຮັດໃຫ້ອຳນາດການປົກຄອງອົສຕຣາລີຕ້ອງເພີ່ມຄວາມເຂັ້ມງວດຫຼາຍຂຶ້ນໃນການພິຈາລະນາການໃຫ້ວີຊານັກຮຽນກັບຄົນຕ່າງປະເທດ. ໃນເດືອນມີນາ ຜ່ານມາ, ກໍໄດ້ມີການເພີ່ມເງື່ອນໄຂຄວາມສາມາດດ້ານດ້ານພາສາອັງກິດສຳລັບຜູ້ທີ່ຈະຍື່ນຂໍວີຊານັກຮຽນ.ນອກຈາກນີ້ ຍັງຍົກເລີກການຂະຫຍາຍເວລາຢູ່ຕໍ່ຂອງນັກສຶກສາທີ່ຮຽນຈົບອີກດ້ວຍ.

ທ່ານ ແຄລ ໂອນີລ ລັດຖະມົນຕີກະຊວງປ້ອງກັນຄວາມສະຫງົບກ່າວວ່າ:ມີການສົ່ງຈົດໝາຍເຕືອນໄປຍັງໂຮງຮຽນ 34 ແຫ່ງທີ່ມີການຮັບສະໝັກນັກຮຽນຢ່າງບໍ່ຖືກຕ້ອງຫຼືຊອກຫາຜົນປະໂຫຍດທີ່ຜິດກົດໝາຍຈາກການຮັບສະໝັກນັກສຶກສາຕ່າງປະເທດ ໂດຍຜູ້ທີ່ກະທໍາຜິດອາດຈະຖືກຈໍາຄຸກຢ່າງໜ້ອຍ 2 ປີ ຫຼືຖືກຫ້າມບໍ່ໃຫ້ຮັບນັກສຶກສາອີກຄັ້ງ ຖ້າພົບວ່າມີຄວາມຜິດ.

ທັງນີ້, ການເຂົ້າມາສຶກສາຕໍ່ຂອງນັກສຶກສາຕ່າງປະເທດແມ່ນເປັນໜຶ່ງໃນແຫຼ່ງລາຍຮັບຫຼັກຂອງອົສຕຣາລີມາດົນນານແລ້ວ. ໂດຍມີມູນຄ່າທາງເສດຖະກິດສູງເຖິງ 36,4 ຕື້ໂດລາອົສຕຣາລີ ໃນປີ 2022 ແລະ 2023, ແຕ່ການເພີ່ມຂຶ້ນຂອງຈໍານວນຄົນເຂົ້າເມືອງ ຊຶ່ງສ່ວນຫຼາຍແມ່ນນັກສຶກສາຕ່າງປະເທດເຮັດໃຫ້ລັດຖະບານຢູ່ພາຍໃຕ້ຄວາມກົດດັນຈາກການເພີ່ມຂຶ້ນຂອງລາຄາເຊົ່າເຮືອນໃນທົ່ວປະເທດ. ພ້ອມກັນນັ້ນ, ຈຳນວນຄົນເຂົ້າເມືອງໄດ້ເພີ່ມຂຶ້ນ 60% ເປັນ 548.800 ຄົນຈົນຮອດວັນທີ 30 ກັນຍາປີກາຍນີ້, ໂດຍລັດຖະບານຄາດວ່າຈາກນະໂຍບາຍທີ່ອອກມາໃໝ່ ຈະຊ່ວຍສະກັດກັ້ນຈຳນວນຄົນອົບພະຍົບເຂົ້າມາອົສຕຣາລີໄດ້ປະມານເຄິ່ງໜຶ່ງ ໃນອີກ 2 ປີຂ້າງໜ້າ.