ຂ່າວຕ່າງປະເທດລາຍງານ ໃນ 7 ພຶດສະພາ ຜ່ານມາ, ຫ້ອງການສະຖິຕິຂອງອິນໂດເນເຊຍ (BPS) ເປີດເຜີຍວ່າ: ເສດຖະກິດຂອງອິນໂດເນເຊຍ ຂະຫຍາຍຕົວ 5,11% ເມື່ອທຽບປີຕໍ່ປີ ໃນໄຕມາດທຳອິດ (ມັງກອນ - ມີນາ) ຂອງປີນີ້, ແຕ່ຫຼຸດລົງ 0,83% ເມື່ອທຽບກັບໄຕມາດກ່ອນໜ້ານີ້.

ທ່ານ ອາມາເລຍ ວິດຍາສັນຕິ ຮັກສາການຫົວໜ້າຫ້ອງການສະຖິຕິຂອງອິນໂດເນເຊຍ ກ່າວວ່າ: ໂຕເລກດັ່ງກ່າວຖືເປັນການເຕີບໂຕໃນຮອບໄຕມາດທຳອິດທີ່ສູງທີ່ສຸດ ນັບຕັ້ງແຕ່ປີ 2015 ໂດຍອິນໂດເນເຊຍ ລາຍງານການເຕີບໂຕ 5,12% ໃນໄຕມາດທຳອິດຂອງປີ 2014.

ທ່ານ ອາມາເລຍ ວິດຍາສັນຕິ ລະບຸວ່າ: ຫາກພິຈາລະຈາໃນດ້ານການຜະລິດ ປັດໄຈຫຼັກທີ່ສົ່ງເສີມການເຕີບໂຕທາງເສດຖະກິດໃນໄລຍະເວລາດັ່ງກ່າວໄດ້ແກ່ ການແປຮູບ, ການຄ້າ, ການກໍ່ສ້າງ ແລະ ບໍ່ແຮ່ ໂດຍການຜະລິດຍັງຄົງເປັນແຫຼ່ງທີ່ມາຂອງການເຕີບໂຕສູງສຸດ 0,86%.

ສ່ວນໃນດ້ານການໃຊ້ຈ່າຍ, ການບໍລິໂພກພາກຄົວເຮືອນຍັງມີສ່ວນສຳຄັນທີ່ສົ່ງເສີມຕໍ່ການເຕີບໂຕທາງເສດຖະກິດ ໂດຍເພີ່ມຂຶ້ນ 4,91% ຊຶ່ງໄດ້ຮັບການສະໜັບສະໜູນຈາກການໃຊ້ຈ່າຍໄລຍະວັນພັກ.