ຂ່າວຕ່າງປະເທດລາຍງານ ໃນທ້າຍອາທິດຜ່ານມາ, ກະຊວງສາທາລະນະສຸກກຳປູເຈຍຮຽກຮ້ອງໃຫ້ປະຊາຊົນຫຼີກລ່ຽງການສູບຢາສູບໄຟຟ້າທີ່ມີສານນິໂຄຕິນປະລິມານຫຼາຍ ເພາະອາດສົ່ງຜົນກະທົບຮ້າຍແຮງຕໍ່ສຸຂະພາບຂອງຜູ້ສູບ, ຫຼັງຈາກພົບການໃຊ້ຢາສູບໄຟຟ້າເພີ່ມຂຶ້ນໃນປະເທດ ໂດຍສະເພາະແມ່ນເຍົາວະຊົນ.

ລາຍງານລະບຸວ່າ: ຢາສູບໄຟຟ້າ ຫຼື ເວບ (vape) ເປັນອຸປະກອນພະລັງງານແບັດເຕີຣີ ທີ່ເຮັດຄວາມຮ້ອນ, ອຸ່ນ ຂອງທາດແຫຼວຊະນິດພິເສດໃຫ້ເປັນລະອອງຄວັນສຳລັບສູບ ໂດຍຢາສູບໄຟຟ້າມີສານນິໂຄຕິນທີ່ເປັນສານກໍ່ໃຫ້ເກີດການເສບຕິດສູງໃນປະລິມານຫຼາຍ.

ກະຊວງສາທາລະນະສຸກຂອງກຳປູເຈຍ ກ່າວວ່າ: ຜູ້ສູບຢາສູບໄຟຟ້າອາດປະເຊີນກັບຄວາມສ່ຽງສູງໃນການເປັນພະຍາດປອດ, ພະຍາດມະເຮັງປອດ, ພະຍາດຫົວໃຈ ແລະ ທຳລາຍພັດທະນາການທາງສະໝອງ ລວມເຖິງສົ່ງຜົນກະທົບຕໍ່ພັດທະນາການຂອງເດັກນ້ອຍໃນທ້ອງແມ່ ຫາກຜູ້ສູບເປັນເພດຍິງຖືພາ. ເຖິງແມ່ນວ່າສຳນັກງານປາບປາມຢາເສບຕິດຂອງກຳປູເຈຍສັ່ງຫ້າມການນຳເຂົ້າ, ຊື້-ຂາຍ ແລະ ໃຊ້ຢາສູບໄຟຟ້າ ແລະ ມໍຣະກູ່ ຕັ້ງແຕ່ປີ 2014 ແຕ່ມີພວກສວຍໂອກາດບາງພາກສ່ວນຍັງຄົງຈັດຈຳໜ່າຍຜະລິດຕະພັນເຫຼົ່ານີ້ ພ້ອມທັງອ້າງອີງຂໍ້ມູນເກີນຈິງວ່າເປັນເຄື່ອງມືຊ່ວຍໃຫ້ເຊົາສູບຢາ ແລະ ປອດໄພກວ່າຢາສູບ.

ກະຊວງສາທາລະນະສຸກ ກ່າວວ່າ: ຄວາມຈິງແລ້ວ ຢາສູບໄຟຟ້າບໍ່ແມ່ນອຸປະກອນສຳລັບການເຊົາສູບຢາ ແຕ່ເປັນອັນຕະລາຍຕໍ່ສຸຂະພາບຂອງຜູ້ສູບ, ຄອບຄົວ ແລະ ສັງຄົມ, ພ້ອມທັງຮຽກຮ້ອງໃຫ້ໜ່ວຍງານທີ່ກ່ຽວຂ້ອງທຸກລະດັບຢັບຢັ້ງການນຳເຂົ້າ, ຊື້-ຂາຍ ແລະ ໃຊ້ຢາສູບໄຟຟ້າ ລວມເຖິງເພີ່ມຄວາມຮັບຮູ້ໃຫ້ປະຊາຊົນກ່ຽວກັບຜົນກະທົບຕໍ່ສຸຂະພາບຈາກການສູບຢາສູບໄຟຟ້າ.