ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ກອງທຶນດິນຟ້າອາກາດສີຂຽວຂອງສະຫະປະຊາຊາດ ໄດ້ຮັບຄຳໝັ້ນສັນຍາປະກອບສ່ວນແຫຼ່ງທຶນ ຈຳນວນເງິນ 9,3 ຕື້ໂດລາ ຈາກ 25 ປະເທດໃນໂລກ, ເພື່ອຊ່ວຍເຫຼືອດ້ານການເງິນໃຫ້ແກ່ບັນດາປະເທດທີ່ມີຄວາມສ່ຽງຖືກຜົນກະທົບຈາກການປ່ຽນແປງຂອງດິນຟ້າອາກາດ. ນີ້ແມ່ນຄຳ ໝັ້ນສັນຍາຫຼ້າສຸດທີ່ການນຳບັນດາປະເທດໃນທົ່ວໂລກໄດ້ຍົກອອກມາ ເພື່ອຊຸກຍູ້ໃຫ້ບັນລຸຄວາມຄືບໜ້າໃນວຽກງານດັ່ງກ່າວ, ໃນສະພາບທີ່ອຸນຫະພູມທົ່ວໂລກສືບຕໍ່ເພີ່ມຂຶ້ນ.

ຂ່າວລະບຸວ່າ: ກ່າວຄຳເຫັນໃນກອງປະຊຸມຢູ່ນະຄອນບອນ ປະເທດເຢຍລະມັນ, ຜູ້ປະສານງານກອງທຶນໃຫ້ຮູ້ວ່າ: ໃນການລະດົມທຶນຄັ້ງນີ້, ປະມານ 75% ບັນດາປະເທດປະກອບທຶນ ໄດ້ໃຫ້ຄຳໝັ້ນສັນຍາຈະເພີ່ມແຫຼ່ງທຶນຫຼາຍຂຶ້ນກວ່າເກົ່າ ເມື່ອທຽບໃສ່ບັນດາຄຳໝັ້ນສັນຍາກ່ອນໜ້ານັ້ນ. ໃນນັ້ນ, ເຢຍລະມັນ, ອັງກິດ, ຝຣັ່ງ ແລະ ຍີ່ປຸ່ນ ແມ່ນປະເທດທີ່ໃຫ້ຄຳໝັ້ນສັນຍາປະກອບສ່ວນດ້ານການເງິນຫຼາຍທີ່ສຸດ.