ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 13 ພຶດສະພາ ຜ່ານມາທີ່ຫໍສະພາແຫ່ງຊາດຢູ່ ຮ່າໂນ້ຍໄດ້ເປີດກອງປະຊຸມຄັ້ງທີ 33 ຂອງຄະນະປະຈຳສະພາແຫ່ງຊາດ, ການເຮັດວຽກໃນຕອນເຊົ້າວັນທີ13 ພຶດສະພາຄະນະປະຈຳສະພາແຫ່ງຊາດຫວຽດນາມ ໄດ້ປະກອບຄຳເຫັນໃສ່ບົດລາຍງານຂອງລັດຖະບານ ແລະ ຕີລາຄາໝາກຜົນແຫ່ງການປະຕິບັດໜ້າທີ່ພັດທະນາເສດຖະກິດ - ສັງຄົມປີ 2023; ສະພາບການປະຕິບັດແຜນການພັດທະນາເສດຖະກິດ - ສັງຄົມ ແລະ ງົບປະມານແຫ່ງລັດໃນຊຸມເດືອນຕົ້ນປີ 2024.
ຂ່າວລະບຸວ່າ: ບົດລາຍງານຂອງລັດຖະບານ ຫວຽດນາມ ຢັ້ງຢືນວ່າ ປີ 2023, ສະພາບເສດຖະກິດ - ສັງຄົມ ໂດຍພື້ນຖານໄດ້ບັນລຸເປົ້າໝາຍສັງລວມທີ່ວາງອອກ ແລະ ບັນລຸໄດ້ຫຼາຍໝາກຜົນສຳຄັນໃນບັນດາຂົງເຂດ. 4 ເດືອນຕົ້ນປີ 2024, ການເຕີບໂຕເສດຖະກິດໄດ້ຮັບການຊຸກຍູ້, ຄວາມເປັນປົກກະຕິຂອງເສດຖະກິດມະຫາພາກໄດ້ຮັກສາໄວ້, ໄພເງິນເຟີ້ໄດ້ຮັບການຄວບຄຸມ, ຄວາມດຸ່ນດ່ຽງໃຫຍ່ໄດ້ຮັບການຮັບປະກັນ. GDP ໄຕມາດ I ຄາດວ່າບັນລຸ 5,66% ເມື່ອທຽບໃສ່ໄລຍະດຽວກັນຂອງປີ 2023, ສູງທີ່ສຸດໃນໄຕມາດ I ນັບແຕ່ປີ 2020 ແລະ ສູງກວ່າແຜນການຂອງລັດຖະບານວາງອອກ. ກ່ຽວກັບທິດທາງ, ໜ້າທີ່, ມາດຕະການຈຸດສຸມໃນໄລຍະຈະມາເຖິງ, ລັດຖະບານ ຫວຽດນາມ ສືບຕໍ່ໃຫ້ບຸລິມະສິດຊຸກຍູ້ການເຕີບໂຕຕິດພັນກັບການຮັບປະກັນເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ຮັບປະກັນຄວາມດຸ່ນດ່ຽງໃຫຍ່ຂອງພື້ນຖານເສດຖະກິດ; ແກ້ໄຂຄວາມຫຍຸ້ງຍາກ, ສິ່ງຄົງຄ້າງ, ຊຸກຍູ້ຄວາມຄືບໜ້າຂອງບັນດາໂຄງການຈຸດສຸມ, ສຳຄັນລະດັບຊາດ.
ໃນການເຮັດວຽກໃນຕອນເຊົ້າວັນດຽວກັນ, ຄະນະປະຈຳສະພາແຫ່ງຊາດ ໄດ້ປະກອບຄຳເຫັນໃສ່ໃບສະເໜີຂອງລັດຖະບານກ່ຽວກັບການຈັດແບ່ງແຜນການລົງທຶນສາທາລະນະໄລຍະກາງ ດ້ວຍທຶນງົບປະມານໄລຍະ 2021 – 2025 ແລະ ແຜນການທຶນປີ 2024 ໃຫ້ບັນດາໜ້າທີ່, ໂຄງການນຳໃຊ້ແຫຼ່ງເພີ່ມລາຍຮັບງົບປະມານສູນກາງປີ 2022 ທີ່ໄດ້ປະຕິບັດສຳເລັດລະບຽບການລົງທຶນ.