ຂ່າວສານຫວຽດນາມລາຍງານ ໃນວັນທີ 13 ພຶດສະພາ ຜ່ານມາ, ອົງການກອງທຶນເງິນຕາສາກົນ (IMF) ຕີລາຄານະໂຍບາຍປະຕິຮູບຂອງລັດຖະບານ ອາກຊັງຕິນ ໄດ້ລື່ນກາຍຄວາມຄາດໝາຍຂອງອົງການ ແລະ ໃຫ້ຮູ້ວ່າ: ນະຄອນຫຼວງບົວໂນສໄອເຣສ ບັນລຸຂໍ້ຕົກລົງສືບຕໍ່ດຳເນີນມາດຕະການເພື່ອຟື້ນຟູເສດຖະກິດ.
ຂ່າວລະບຸວ່າ: ໃນຖະແຫຼງການ IMF ເນັ້ນໜັກວ່າ, ຄະນະກໍາມະການບໍລິຫານຂອງອົງການຈະຕັດສິນໃຈກ່ຽວກັບບ້ວງເງິນສະໜັບສະໜູນໃຫ້ກັບ ອາກຊັງຕິນ ໃນອາທິດໜ້ານີ້, ຢ່າງໃດກໍຕາມ ບໍ່ມີການເປີດເຜີຍຈໍານວນແຫຼ່ງສິນເຊື່ອທີ່ສະເພາະ ແລະ ເງື່ອນໄຂທີ່ປະກອບ.
ການປະກາດດັ່ງກ່າວຖືກຍົກອອກມາພາຍຫຼັງການຢ້ຽມຢາມ ອາກຊັງຕິນ ຂອງບັນດານັກຊ່ຽວຊານດ້ານເສດຖະກິດ IMF. ເອກະສານດັ່ງກ່າວລະບຸວ່າ: IMF ແລະ ລັດຖະບານ ອາກຊັງຕິນ ໄດ້ບັນລຸຄວາມເຫັນດີເຫັນພ້ອມກ່ຽວກັບບັນດານະໂຍບາຍເພື່ອສືບຕໍ່ສະກັດກັ້ນໄພເງິນເຟີ້, ເພີ່ມທຶນສຳຮອງເງິນຕາຕ່າງປະເທດ, ຟື້ນຟູເສດຖະກິດ ແລະ ຮັກສາໂຄງການປະຕິຮູບຂອງປະເທດ.
ໃນບັນດາໝາກຜົນພົ້ນເດັ່ນ ຂອງລັດຖະບານ ອາກຊັງຕິນ ປັດຈຸບັນ, IMF ເຊື່ອໝັ້ນວ່າ: ເປັນເທື່ອທຳອິດໃນຮອບ 16 ປີ, ໃນໄຕມາດທຳອິດຂອງປີນີ້, ອາກຊັງຕິນ ບັນລຸດຸນການເງິນ 3 ເດືອນຕິດຕໍ່ກັນ, ອັດຕາເງິນເຟີ້ຫຼຸດລົງຢ່າງໄວວາ, ທຶນສຳຮອງເງິນຕາຕ່າງປະເທດເພີ່ມຂຶ້ນ ແລະ ລະດັບຄວາມສ່ຽງຂອງເສດຖະກິດຫຼຸດລົງ.