ວິທະຍຸກະຈາຍສຽງຫວຽດນາມລາຍງານວ່າ: ຕາມການຄາດຄະເນຂອງຂະແໜງອຸດສາຫະກຳ - ການຄ້າ ຫວຽດນາມ ໃຫ້ຮູ້ວ່າ: ການເຄື່ອນໄຫວສົ່ງອອກຂອງ ໄຕມາດສຸດທ້າຍໃນປີນີ້ຈະສືບຕໍ່ເຕີບໂຕ ຍ້ອນເງິນເຟີ້ມີທ່າອ່ຽງຫຼຸດລົງຢູ່ບັນດາພື້ນຖານເສດຖະກິດໃຫຍ່ ຄື: ອາເມຣິກາ, ເອີຣົບ ແລະ ສິນຄ້າຄ້າງສາງພວມຫຼຸດລົງ. ພ້ອມກັນນັ້ນ, ຄວາມຕ້ອງການສິນຄ້າບໍລິໂພກກໍເພີ່ມຂຶ້ນສູງໃນທ້າຍປີ; ຫວຽດນາມ ກໍໄດ້ຮັບຜົນປະໂຫຍດຈາກບັນດາບໍລິສັດນາໆຊາດ ເຄື່ອນຍ້າຍການຜະລິດມາສູ່ ຫວຽດນາມ.

ຂ່າວລະບຸວ່າ: ຜູ້ຕາງໜ້າກົມສົ່ງອອກ - ນຳເຂົ້າ (ກະຊວງອຸດສາຫະກຳ ແລະ ການຄ້າ ຫວຽດນາມ) ໃຫ້ຮູ້ວ່າ: ບັນດາມາດຕະການທີ່ຕັ້ງໜ້າ ເພື່ອແນໃສ່ແກ້ໄຂຄວາມຫຍຸ້ງຍາກ, ຊ່ວຍເຫຼືອການຜະລິດຢູ່ພາຍໃນປະເທດ, ສົ່ງເສີມການຄ້າ, ເປິດກວ້າງຕະຫຼາດ ພາຍໃນປະເທດ ແລະ ການສົ່ງອອກ ໄດ້ເສີມຂະຫຍາຍຢ່າງແຂງແຮງ. ດັ່ງນັ້ນ, ການເຄື່ອນໄຫວສົ່ງອອກ ໃນໄລຍະຜ່ານມາໄດ້ຮັກສາການເຕີບໂຕໄດ້ຢ່າງຕໍ່ເນື່ອງ.

ທ່ານ ດັ້ງຟຸກງວຽນ ປະທານ ສະຫະສະມາຄົມຜັກ, ໝາກໄມ້ ຫວຽດນາມ ຄາດຄະເນວ່າ: ແຕ່ນີ້ຮອດທ້າຍປີ ແມ່ນໄລຍະເວລາທີ່ມີງານບຸນຕ່າງໆ, ດັ່ງນັ້ນການສົ່ງອອກ ຜັກ, ໝາກໄມ້ ຍັງສາມາດເຕີບໂຕໄດ້ພໍສົມຄວນ. ພິເສດ, ຊຸມເດືອນທ້າຍປີແມ່ນເວລາເກັບກ່ຽວຜັກ, ໝາກໄມ້ ຫຼາຍປະເພດ ດ້ວຍປະລິມານທົ່ວປະເທດ 7,6 ລ້ານໂຕນ. ດັ່ງນັ້ນ, ມູນຄ່າສົ່ງອອກຜັກ, ໝາກໄມ້ ຈະສູງກວ່າລະດັບສະເລ່ຍຂອງໄຕມາດກ່ອນ.

ທ່ານ ທາງວັນທົງ ຮອງຫົວໜ້າສະມາຄົມ ໄມ້ ຫວຽດນາມ ໃຫ້ຮູ້ວ່າ: ວິສາຫະກິດໃນຂະແໜງການນີ້ກໍໄດ້ຮັບສັນຍານຢ່າງຕັ້ງໜ້າຫຼາຍຂຶ້ນຈາກຄູ່ຮ່ວມມືຊື້ສິນຄ້າ. ບາງວິສາຫະກິດໄດ້ມີໃບສັ່ງຊື້ສິນຄ້າໃໝ່ຈຳນວນຫຼາຍ ມີການຈັດຕັ້ງໃຫ້ກຳມະກອນເຮັດວຽກເພີ່ມຊົ່ວໂມງ ຫຼື ຮັບສະໝັກກຳມະກອນເພີ່ມຕື່ມອີກ.