ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ສຳນັກງານສະຖິຕິແຫ່ງຊາດຂອງ ສ ເກົາຫຼີ ໄດ້ເປີດເຜີຍບົດລາຍງານໂດຍລະບຸວ່າ: ມູນຄ່າການຊື້ເຄື່ອງທາງອອນລາຍຂອງ ສ ເກົາຫຼີ ເພີ່ມສູງຂຶ້ນໃນເດືອນສິງຫາຜ່ານມາ ໂດຍມີປັດໄຈມາຈາກຄວາມຕ້ອງການທີ່ແຂງແຮງທາງດ້ານການເດີນທາງ, ອາຫານ ແລະ ການບໍລິການຄູປອງເອເລັກໂຕຣນິກ.

ບົດລາຍງານລະບຸວ່າ: ການສັ່ງຊື້ສິນຄ້າຜ່ານທາງອິນເຕີເນັດມີມູນຄ່າ 19,1 ລ້ານໆວອນ ໃນເດືອນສິງຫາ ຜ່ານມາ ເພີ່ມຂຶ້ນ 6,1% ຈາກເດືອນດຽວກັນຂອງປີກາຍ. ຄວາມຕ້ອງການບໍລິການໆເດີນທາງ ແລະ ຂົນສົ່ງທາງອອນລາຍເພີ່ມຂຶ້ນ 29,1% ຂະນະທີ່ທຸລະກຳການບໍລິການຄູປອງເອເລັກໂຕຼນິກທາງອອນລາຍເພີ່ມຂຶ້ນ 37% ທ່າມກາງຄວາມນິຍົມໃນການໃຫ້ຂອງຂວັນເຊັ່ນ: ກາເຟ ແລະ ເຄັກ ຜ່ານຄູປອງເອເລັກໂຕຼນິກ. ທາງດ້ານການຊື້-ຂາຍອາຫານ ແລະ ເຄື່ອງດື່ມທາງອອນລາຍເພີ່ມຂຶ້ນ 5,1% ແລະ ຄວາມຕ້ອງການບໍລິການຈັດສົ່ງອາຫານເພີ່ມຂຶ້ນ 4,4% ສ່ວນມູນຄ່າການຊື້ເຄື່ອງທາງອອນລາຍຜ່ານໂທລະສັບມືຖືໃນເດືອນສິງຫາຜ່ານມາເພີ່ມຂຶ້ນ 5,3% ຈາກປີ 2022 ຢູ່ທີ່ 14,14 ລ້ານໆວອນ.