ຕາມສຳນັກຂ່າວສານຫວຽດນາມ ປະຈຳ ສິງກະໂປ ໃຫ້ຮູ້ວ່າ: ໃນຕອນຄ່ຳວັນທີ 15 ພຶດສະພາ ຜ່ານມາ,ທ່ານ ລໍເຣັນ ຫວອງ (Lawrence Wong)ນາຍົກລັດຖະມົນຕີສິງກະໂປ ຜູ້ໃໝ່ ໄດ້ເຂົ້າສາບານຕົວຂຶ້ນຮັບຕຳແໜ່ງ ຢູ່ພະລາຊະວັງ ອິສຕານາ.
ຂ່າວລາຍງານວ່າ: ພິທີຄ້າຍຄືກັບພິທີສາບານຕົວຂຶ້ນຮັບຕຳແໜ່ງນາຍົກລັດຖະມົນຕີ ຂອງທ່ານ ລີ ຊຽນ ລຸງ ໃນປີ 2004 ໂດຍມີແຂກຂັ້ນສູງຈາກຂົງເຂດຕ່າງໆ ຂອງ ສິງກະໂປ ຈຳນວນຫຼວງຫຼາຍເຂົ້າຮ່ວມ. ທ່ານ ລໍເຣັນ ຫວອງ ຍັງຄົງຮັກສາການລັດຖະມົນຕີການເງິນ ເພື່ອຮັບປະກັນຄວາມໝັ້ນຄົງ ແລະ ສະຖຽນລະພາບຂອງປະເທດ.
ກ່ຽວກັບດ້ານການເມືອງ, ທ່ານ ລໍເຣັນ ຫວອງ ໄດ້ປະກາດຢ່າງຈະແຈ້ງສອງບົດບາດທີ່ລັດຖະບານຊຸດໃໝ່ຢູ່ສິງກະໂປ ຕ້ອງປະຕິບັດ ຄື: ໜຶ່ງ, ແມ່ນຕັດສິນໃຈປະຕິບັດນະໂຍບາຍທີ່ຈຳເປັນ ແລະ ສຳຄັນ ພາຍຫຼັງການສຳຫຼວດ ແລະ ຮັບຮູ້ບັນຫາ ຂອງບັນດາພາກສ່ວນທີ່ແຕກຕ່າງກັນຢູ່ໃນສັງຄົມ. ສອງ, ແມ່ນຂະຫຍາຍການພົວພັນກັບມະຫາຊົນ ຄື: “ເປັນຜູ້ອຳນວຍຄວາມສະດວກ, ຜູ້ຟັງ, ນາຍໜ້າທີ່ຊື່ສັດ” ຊຶ່ງໝາຍເຖິງການຊອກຫາວິທີການເຂົ້າຮ່ວມຂອງບັນດາກຸ່ມຕ່າງໆ, ຮັບຟັງທັດສະນະຂອງກັນແລະກັນ ແລະ ການປະນີປະນອມເພື່ອໃຫ້ ສິງກະໂປ ກ້າວໄປຂ້າງໜ້າ.
ທາງດ້ານເສດຖະກິດ, ປັດຈຸບັນສິງກະໂປ ແມ່ນຢູ່ໃນລະດັບການພັດທະນາສູງ ແລະ ຢູ່ໃນອັນດັບທີ່ຂ້ອນຂ້າງດີໃນດ້ານຕ່າງໆ ເຊັ່ນ: ທີ່ຢູ່ອາໄສ, ສາທາລະນະສຸກ, ການສຶກສາ ແລະ ການຂົນສົ່ງ. ທ່ານ ລໍເຣັນ ຫວອງ ຕ້ອງການໃຫ້ ສິງກະໂປ ກາຍເປັນບ່ອນທີ່ມີຫຼາຍເສັ້ນທາງກ້າວໄປສູ່ຄວາມສຳເລັດທີ່ແຕກຕ່າງກັນ, ໃນນັ້ນປະຊາຊົນທຸກຊັ້ນວັນນະໄດ້ຮັບການຮັບປະກັນຄວາມຕ້ອງການຂັ້ນພື້ນຖານ.