ໃນວັນທີ 9 ຕຸລາ ນີ້, ທ່ານ ດາວວົງ ພອນແກ້ວ ກໍາມະການສູນກາງພັກ ເຈົ້າແຂວງສາລະວັນ,ພ້ອມຄະນະ ແລະ ພະແນກການທີ່ກ່ຽວຂ້ອງ ໄດ້ລົງເຄື່ອນໄຫວພົບປະໂອ້ລົມ, ຢ້ຽມຢາມຖາມຂ່າວຄອບຄົວປະຊາຊົນທີ່ປູກກາເຟເປັນສິນຄ້າຢູ່ເມືອງເລົ່າງາມ, ໂດຍເປັນກຽດຕ້ອນຮັບ ແລະ ນໍາພາຂອງ ທ່ານ ສົມສັກ ທົງຄໍາຫານ ກໍາມະການພັກແຂວງ ເລຂາພັກເມືອງ ເຈົ້າເມືອງເລົ່າງາມ, ພ້ອມດ້ວຍພະນັກງານການນໍາຂອງເມືອງ ເຂົ້າຮ່ວມ.
ໃນໂອກາດນີ້ ອໍານາດການປົກຄອງເມືອງເລົ່າງາມ ໄດ້ນໍາພາທ່ານເຈົ້າແຂວງສາລະວັນ ລົງຢ້ຽມຍາມຄອບຄົວປະຊາຊົນທີ່ປູກກາເຟເປັນສິນຄ້າ ຢູ່ໃນ 3 ບ້ານຄື: ບ້ານຜັກກູດ, ບ້ານໜອງຈົວ ແລະ ບ້ານເລົ່າຫຍ້າ ຂອງເມືອງເລົ່າງາມ, ທ່ານ ແສງຈັນ ທໍາມະວົງສາ ຕາງໜ້າສະມາຊິກໂຄງການສົ່ງເສີມການປູກກາເຟຄຸນນະພາບໃຫ້ຮູ້ວ່າ: ປັດຈຸບັນພວກເຮົາມີສະມັກຊິກທີ່ເຂົ້າໂຄງການສົ່ງເສີມການປູກກາເຟຄຸນະພາບທັງໝົດ 125 ກວ່າຄອບຄົວ, ມີເນື້ອທີ່ປູກກາເຟທັງໝົດ 47.237 ເຮັກຕາ, ໃນນີ້ສວນກາເຟກາງ 21.642 ເຮັກຕາ, ກາເຟນ້ອຍ 18.851 ເຮັກຕາ. ກ່ອນເຂົ້າໂຄງການຜົນຜະລິດສະເລ່ຍໃນເມື່ອກ່ອນແມ່ນ 3-4 ໂຕນ ໝາກແດງຕໍ່ເຮັກຕາ, ກາເຟກາງ 4-5 ໂຕນຕໍ່ເຮັກຕາ ແລະ ກາເຟນ້ອຍ 3-4 ໂຕນຕໍ່ເຮັກຕາ. ມາຮອດປີ 2022 ຜູ້ທີ່ເຂົ້າໂຄງການແມ່ນໄດ້ຮັບຜົນຜະລິດເພີ່ມຂຶ້ນເຄິ່ງໝຶ່ງຈາກເຄີຍໄດ້ 3-4 ໂຕນ ກໍໄດ້ 8-10 ໂຕນຕໍ່ເຮັກຕາ, ມາຮອດປັດຈຸບັນສະເລ່ຍຜົນຜະລິດແມ່ນບໍ່ຕໍ່າກວ່າ 15 ໂຕນຕໍ່ເຮັກຕາ, ສ່ວນການລົງທຶນແມ່ນບໍ່ເກີນ 25% ຂອງລາຍຮັບ. ນັບແຕ່ໂຄງການເຂົ້າມາເຫັນວ່າຊາວສວນມີລາຍຮັບຫຼາຍຂຶ້ນ ມີຄວາມເປັນຢູ່ດີຂຶ້ນເປັນຂັ້ນໆຈາກຜູ້ທີ່ມີລາຍຮັບບໍ່ເຖິງ 80-90 ລ້ານຕໍ່ປີ ກໍມີລາຍຮັບສະເລ່ຍ 150-200 ລ້ານກີບ ຕໍ່ຄອບຄົວ. 
ເມືອງເລົ່າງາມເປັນເຂດພູພຽງບໍລິເວນເໝາະແກ່ການສຸມໃສ່ພັດທະນາວຽກງານກະສິກໍາ ແລະ ປ່າໄມ້ ໃຫ້ຍືນຍົງ, ສົ່ງເສີມປະຊາຊົນ ເຮັດການຜະລິດເປັນສິນຄ້າຕາມທ່າແຮງຂອງທ້ອງຖິ່ນ, ຕາມທິດກະສິກໍາສະອາດ ແລະ ໂດຍເນັ້ນໃສ່ການສົ່ງເສີມໃຫ້ມີການປຸງແຕ່ງຜະລິດເປັນສິນຄ້າ ໃຫ້ຫຼາຍຂຶ້ນ ເພື່ອສ້າງລາຍໄດ້ ແລະ ມູມຄ່າເພີ່ມ ເປັນຕົ້ນແມ່ນການພັດທະນາອຸດສະຫາກໍາການຜະລິດກາເຟໃຫ້ມີຄຸນນະພາບສູງຂຶ້ນ, ເຮັດໃຫ້ຊີວິດການເປັນຢູ່ຂອງຄອບຄົວປະຊາຊົນຊາວເມືອງເລົ່າງາມມີການພັດທະນາດີຂຶ້ນເທື່ອລະກ້າວ. 
(ຂ່າວ-ພາບ: ວົງດາລາ ຈັນທະວົງ)