ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 18 ພຶດສະພາ ຜ່ານມາຢູ່ສຳນັກງານສູນກາງພັກ (ຮ່າໂນ້ຍ), ກອງປະຊຸມຄັ້ງທີ 9 ຄະນະບໍລິຫານງານສູນກາງພັກກອມມູນິດ ຫວຽດນາມ ຊຸດທີ XIII ໄດ້ປິດລົງພາຍຫຼັງດຳເນີນມາເປັນເວລາ 3 ວັນໂດຍການເປັນປະທານຂອງ ທ່ານ ຫງວຽນຝູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ.
ຂ່າວລະບຸວ່າ: ທ່ານ ຫງວຽນຝູຈ້ອງ ໄດ້ເນັ້ນໜັກວ່າ: ກອງປະຊຸມບັນລຸໄດ້ຄວາມເຫັນດີເປັນເອກະພາບຢ່າງສູງກ່ຽວກັບແນວຄິດຊີ້ນໍາ, ການກຳນົດທິດສ້າງໂຄງການ ແລະ ຮ່າງເອກະສານສະບັບຕ່າງໆໃຫ້ສົມບູນແບບເພື່ອສະເໜີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XIV ຂອງພັກ. ທ່ານ ຫງວຽນຝູຈ້ອງ ກໍມີຫຼາຍຄຳເຫັນຊີ້ນຳທີ່ສຳຄັນສຳລັບຂໍ້ສະເໜີແນະຂອງບັນດາອະນຸຄະນະກໍາມະການ, ທ່ານເນັ້ນໜັກວ່າ ຮ່າງເອກະສານສະບັບຕ່າງໆ ຕ້ອງກະກຽມໃຫ້ສົມກັບການສະເໜີຕໍ່ກອງປະຊຸມໃຫຍ່ຢ່າງແທ້ຈິງ, ອັນໄດ້ສະແດງເຖິງເຈດຈຳນົງ ແລະ ກຳລັງແຮງບືນຕົວຂຶ້ນຂອງປະເທດຊາດ, ກຳນົດແຜນນະໂຍບາຍຢ່າງຖືກຕ້ອງ, ກຳນົດ ແລະ ມີນະໂຍບາຍຊີ້ຂາດ ແລະ ຮັບປະກັນປະຕິບັດພາລະກິດປ່ຽນແປງໃໝ່ຢ່າງຮອບດ້ານ ແລະ ຄົບຊຸດຂອງປະເທດໃຫ້ສຳເລັດຜົນ. 
    ກ່າວຄຳເຫັນໃນພິທີປິດກອງປະຊຸມຄັ້ງທີ 9, ຄະນະບໍລິຫານງານສູນກາງພັກກອມມູນິດ ຫວຽດນາມ  ຊຸດທີ 13 ທ່ານ ຫງວຽນຝູຈ້ອງ ໃຫ້ຮູ້ວ່າ: ໃນກອງປະຊຸມຄັ້ງນີ້, ສູນກາງພັກໄດ້ປຶກສາຫາລື, ພິຈາລະນາຢ່າງລະອຽດ ແລະ ເຫັນດີເປັນເອກະພາບກ່ຽວກັບວີທີການສະເໜີຕຳແໜ່ງປະທານປະເທດ, ປະທານສະພາແຫ່ງຊາດ ເພື່ອອົງຄະນະພັກສະພາແຫ່ງຊາດ ແນະນຳກັບສະພາແຫ່ງຊາດພິຈາລະນາ, ຕົກລົງໃນກອງປະຊຸມຄັ້ງທີ 7 ສະພາແຫ່ງຊາດ ຫວຽດນາມ ຊຸດທີ 15 ທີ່ເປີດຂຶ້ນໃນວັນທີ 20 ພຶດສະພານີ້.
    ກ່ຽວກັບວຽກງານກະກຽມກອງປະຊຸມໃຫຍ່ຄັ້ງທີ 14 ຂອງພັກ, ທ່ານ ຫງວຽນຝູຈ້ອງ ເນັ້ນໜັກວ່າ: ນີ້ແມ່ນວຽກງານສຳຄັນຍິ່ງ, ຕ້ອງໄດ້ຜັນຂະຫຍາຍໂດຍໄວດ້ວຍຈິດໃຈສືບຕໍ່ປ່ຽນແປງໃໝ່ຕາມທິດແທດຈິງ, ບັນລຸປະສິດທິຜົນ; ເສີມຂະຫຍາຍປະຊາທິປະໄຕ ໄປຄຽງຄູ່ກັບການຮັກສາຫຼັກການ, ວິໄນຂອງພັກ; ຮັບປະກັນການເພີ່ມທະວີຄວາມສາມັກຄີ, ຍົກສູງຄວາມສາມາດຊີ້ນຳ-ນຳພາ, ກຳລັງຕໍ່ສູ້ຂອງບັນດາອົງການຂອງພັກ ແລະ ສະມາຊິກພັກ.ຄະນະບໍລິຫານງານສູນກາງພັກກອມມູນິດ ຫວຽດນາມ  ມອບໃຫ້ກົມການເມືອງ, ພາຍຫຼັງກອງປະຊຸມຄັ້ງນີ້ ຕ້ອງຮີບເລັ່ງຊີ້ນຳສ້າງສຳເລັດ ແລະ ປະກາດໃຊ້ຄຳສັ່ງເພື່ອກຳນົດທິດໃຫ້ແກ່ທົ່ວພັກ ກະກຽມ ແລະ ດຳເນີນກອງປະຊຸມໃຫຍ່ພັກທຸກຂັ້ນ, ປະກອບສ່ວນເຂົ້າໃນຜົນສຳເລັດຂອງກອງປະຊຸມໃຫຍ່ ຄັ້ງທີ 14 ຂອງພັກ