ຂ່າວຕ່າງປະເທດລາຍງານ ໃນວັນທີ 18 ພຶດສະພາຜ່ານມາ, ທ່ານ ຣານິນ ວິກົມສິງຫະ ປະທານາທິບໍດີສີລັງກາ ກ່າວວ່າ: ລັດຖະບານວາງແຜນປ່ຽນຜ່ານພາກການກະເສດຂອງປະເທດ ໂດຍຈະນໍາໃຊ້ເຕັກໂນໂລຊີທີ່ທັນສະໄໝ ເຊັ່ນ: ປັນຍາປະດິດ (AI) ແລະ ຈະສະໜັບສະໜູນຜູ້ປະກອບການພາກເອກະຊົນທີ່ສົນໃຈໃນແຜນລິເລີ່ມດັ່ງກ່າວ.
ຂ່າວລະບຸວ່າ: ໃນວັນທີ 17 ພຶດສະພາ, ຖະແຫຼງການຈາກຫ້ອງການປະຊາສຳພັນຂອງປະທາທິບໍດີສີລັງກາ (PMD) ເປີດເຜີວ່າ: ມີ 100 ເມືອງທີ່ໄດ້ຮັບການຄັດເລືອກສຳລັບໂຄງການປັບປຸງການເຮັດການກະເສດໃຫ້ທັນສະໄໝໃນປີນີ້, ໂດຍໃນໄລຍະທຳອິດຈະມີ 25 ເມືອງຈະໄດ້ຮັບສິ່ງອຳນວຍຄວາມສະດວກທີ່ຈຳເປັນກ່ອນຈະຂະຫຍາຍຄວບຄຸມໄປອີກ 75 ເມືອງທີ່ເຫຼືອ ໃນໄລຍະທີສອງ.
ທ່ານ ຣານິນ ວິກົມສິງຫະ ເນັ້ນຢໍ້າວ່າ: ລັດຖະບານສີລັງກາຈະເອົາໃຈໃສ່ສົ່ງເສີມການກະເສດທັນສະໄໝຢູ່ສີລັງກາ ພ້ອມຢໍ້າອີກວ່າລັດຖະບານຍິນດີໃຫ້ການສະໜັບສະໜູນການເງິນທີ່ຈຳເປັນ ແລະ ຈັດການຝຶກອົບຮົມທີ່ກ່ຽວຂ້ອງ.
ທ່ານປະທານາທິບໍດີສີລັງກາ ຍັງໄດ້ເປີດເຜີຍແຜນການດັ່ງກ່າວລະຫວ່າງການເດີນທາງຢ້ຽມຢາມບໍລິສັດທີ່ນໍາໃຊ້ເຕັກໂນໂລຊີປັນຍາປະດິດເຂົ້າໃນວຽກງານດ້ານການກະເສດແຫ່ງທຳອິດໃນສີລັງກາ, ບໍລິສັດດັ່ງກ່າວມີປະສົບການໃນພາກການກະເສດຫຼາຍກວ່າ 7 ປີ ໂດຍປະຍຸກໃຊ້ປັນຍາປະດິດເຂົ້າໃນການເພາະປູກໃນໂຮງເຮືອນ, ກາງແຈ້ງ ແລະ ໃຊ້ລະບົບອັດຕະໂນມັດເພື່ອຍົກລະດັບປະສິດທິພາບ ແລະ ຜະລິດຕະພັນ.