ຂ່າວສານຫວຽດນາມລາຍງານວ່າ: ໃນວັນທີ 16 ພຶດສະພາ ຜ່ານມາ, ອົງການພູເຂົາໄຟ ອິນໂດເນເຊຍ ໄດ້ຍົກລະດັບເຕືອນໄພຂອງ ພູເຂົາໄຟອີບູ (Ibu) ຂຶ້ນສູ່ລະດັບສູງສຸດ (ລະດັບ 4) ຂອງປະເທດ ພາຍຫຼັງໄດ້ບັນທຶກການລະເບີດ 6 ຄັ້ງນັບແຕ່ທ້າຍອາທິດຜ່ານມາ. ຢ່າງໃດກໍຕາມ, ອົງການຫຼຸດຜ່ອນໄພພິບັດຂອງ ອິນໂດເນເຊຍ ປະກາດວ່າຍັງບໍ່ມີແຜນການອົບພະຍົບ.
ຂ່າວລະບຸວ່າ: ພູເຂົາໄຟອີບູທີ່ຕັ້ງຢູ່ເທິງເກາະຮາລມາເຮຣາ (Halmahera) ທາງຕາເວັນອອກຂອງອິນໂດເນເຊຍໄດ້ເລີ່ມລະເບີດຂຶ້ນຢ່າງຮຸນແຮງ ໃນວັນທີ 11 ພຶດສະພາ ຜ່ານມາ ຫຼັງຈາກໄດ້ມີການປະທຸຂຶ້ນຢ່າງຕໍ່ເນື່ອງໃນເດືອນເມສາ. ພູເຂົາໄຟອີບູ ໄດ້ພົ່ນເທົ່າຖ່ານສີເທົາໜາທຶບຂຶ້ນໄປເທິງອາກາດ ຊຶ່ງຢູ່ຫ່າງຈາກປ່ອງພູເຂົາໄຟສູງເຖິງ 5 ກິໂລແມັດ.
ເຈົ້າໜ້າທີ່ ໄດ້ແນະນຳໃຫ້ປະຊາຊົນ ແລະ ນັກທ່ອງທ່ຽວ ໃນລັດສະໝີ 4-7 ກິໂລແມັດ ໃຫ້ຢູ່ຫ່າງຈາກພູເຂົາໄຟ ແລະ ມີມາດຕະການປ້ອງກັນ ເຊັ່ນ: ໃສ່ໜ້າກາກ ແລະ ແວ່ນຕາປ້ອງກັນ.
ເນື່ອງຈາກສະຖານທີ່ຕັ້ງຢູ່ເທິງວົງແຫວນໄຟປາຊີຟິກ, ອິນໂດເນເຊຍ ມັກຈະປະສົບກັບແຜ່ນດິນໄຫວ ແລະ ພູເຂົາໄຟ. ປັດຈຸບັນ ອິນໂດເນເຊຍ ມີພູເຂົາໄຟເຖິງ 127 ກຳລັງພວມມີການປະທຸຂຶ້ນ.