ຂ່າວສານຫວຽດນາມລາຍງານວ່າ: ໃນວັນທີ 23 ພຶດສະພາ ຜ່ານມາ, ບໍລິສັດໄມໂຄຊອບ (Microsoft– ບໍລິສັດແຖວໜ້າຂອງ ອາເມຣິກາ) ໄດ້ເປີດສູນຂໍ້ມູນຄລາວຂະໜາດໃຫຍ່ຢ່າງເປັນທາງການຢູ່ລັດເກເຣຕາໂຣປະເທດເມັກຊິກ.

ຂ່າວລະບຸວ່າ: ທ່ານ ອັລເບີໂຕ ອາຊິນິກາ ຜູ້ອໍານວຍການ Microsoft ທີ່ຮັບຜິດຊອບໃນອາເມຣິກາລາຕິນ ໃຫ້ຮູ້ວ່າ: ນີ້ແມ່ນສູນຂໍ້ມູນຄລາວແຫ່ງທຳອິດຂອງບໍລິສັດທີ່ສ້າງຕັ້ງຂຶ້ນໃນອາເມຣິກາລາຕິນ ເພື່ອປະກອບສ່ວນຊຸກຍູ້ຂະບວນການຫັນເປັນດີຈີຕອນໃນພາກພື້ນ. ສູນຂໍ້ມູນຂອງ Microsoft ຈະຊ່ວຍໃຫ້ທຸລະກິດຂະໜາດນ້ອຍ ແລະ ກາງ ເຂົ້າເຖິງບໍລິການເຕັກໂນໂລຊີຂອງ ປັນຍາປະດິດ (AI), Internet of Things, ການຊໍາລະ, ການເຮັດທຸລະກໍາທາງອອນລາຍໃນປະລິມານທີ່ສູງ. ນອກຈາກນັ້ນ, ໂຄງການດັ່ງກ່າວຍັງປະກອບສ່ວນດຶງດູດການລົງທຶນ ແລະ ສ້າງວຽກເຮັດງານທຳໃຫ້ປະຊາຊົນຫຼາຍກວ່າ 300.000 ຄົນ ໃນຫຼາຍຂະແໜງການຢູ່ເມັກຊິກ.

ໃນການພົບປະ, ທ່ານ ໂຣເຈລິໂອ ຣາມິເຣສ ເດ ລາ ໂອ ລັດຖະມົນຕີກະຊວງການເງິນ ແລະ ສິນເຊື່ອສາທາລະນະ (SHCP) ເມັກຊິກ ຢືນຢັນວ່າ: ພື້ນຖານເສດຖະກິດໃຫຍ່ອັນດັບ 2 ຂອງອາເມຣິກາລາຕິນ ພ້ອມແລ້ວທີ່ຈະບຸກເບີກທ່າອ່ຽງການຜະລິດດີຈີຕອນ ແລະ ຮັບເອົາບັນດາເຕັກໂນໂລຊີສູງ.