ວິທະຍຸກະຈາຍສຽງຫວຽດນາມລາຍງານວ່າ: ເມື່ອບໍ່ດົນມານີ້, ເວທີປາໄສນ້ຳໂລກຄັ້ງທີ 10 ໄດ້ປິດລົງຢູ່ ເກາະບາລີປະເທດ ອິນໂດເນເຊຍ. ນີ້ແມ່ນເວທີປາໄສກ່ຽວກັບນ້ຳທີ່ມີຂອບຂະໜາດໃຫຍ່ທີ່ສຸດໃນໂລກ ຊຶ່ງ 3 ປີຈັດຂຶ້ນເທື່ອໜຶ່ງ. ເວທີປາໄສຄັ້ງນີ້ມີການເຂົ້າຮ່ວມຂອງຜູ້ແທນປະມານ 50.000 ຄົນທີ່ມາຈາກທຸກປະເທດໃນໂລກ. ອີກຢ່າງໜຶ່ງ, ເວທີປາໄສປີນີ້ໄດ້ຢັ້ງຢືນຄວາມສຳຄັນຂອງການເພີ່ມທະວີກຳລັງແຮງສັງລວມ ແລະ ການຮ່ວມມືລະຫວ່າງບັນດາຝ່າຍທີ່ກ່ຽວຂ້ອງ ເພື່ອແນໃສ່ຮັບມືກັບບັນດາບັນຫາກ່ຽວກັບນ້ຳທີ່ກ່ຽວຂ້ອງເຖິງການປ່ຽນແປງຂອງດິນຟ້າອາກາດ.
ເວທີປາໄສນ້ຳໂລກຄັ້ງທີ 10 ຢູ່ ບາລີ ແມ່ນເທື່ອທຳອິດໃນປະຫວັດສາດ (ນັບແຕ່ເລີ່ມຈັດຕັ້ງຂຶ້ນໃນປີ 1997 ຢູ່ ມໍໂຣໂຄ) ໄດ້ອອກຖະແຫຼງການຂັ້ນລັດຖະມົນຕີ ຊຶ່ງລວມມີ 16 ຂໍ້. ປະກາດໃຊ້ພ້ອມກັບຖະແຫຼງການຂອງລັດຖະມົນຕີ ແມ່ນບົດສະຫຼຸບ 113 ໂຄງການມີມູນຄ່າ 9,4 ຕື້ໂດລາ ຄາດວ່າຈະປະກົດຜົນເປັນຈິງເພື່ອນຳມາຊຶ່ງຜົນປະໂຫຍດໃຫ້ແກ່ບັນດາປະເທດໃນໂລກ.