ຂ່າວສານຫວຽດນາມລາຍງານວ່າ: ບັນດາລາຍການສັ່ງຊື້ສິນຄ້າອຸປະກອນທີ່ຈຳເປັນໃນດ້ານການຜະລິດຂອງອາເມຣິກາ ໄດ້ຟື້ນຕົວຫຼາຍກວ່າທີ່ຄາດຄະເນໄວ້ໃນເດືອນເມສາ 2024 ແລະ ການສົ່ງອອກຂອງສິນຄ້າເຫຼົ່ານີ້ຍັງເພີ່ມຂຶ້ນ, ສະແດງໃຫ້ເຫັນເຖິງທ່າອ່ຽງທີ່ດີຂຶ້ນໃນການໃຊ້ຈ່າຍດ້ານເຄື່ອງຈັກ ແລະ ອຸປະກອນຂອງວິສາຫະກິດ ໃນໄຕມາດທີ 2 ຂອງປີ 2024.
ຂ່າວລະບຸວ່າ: ເຖິງຢ່າງໃດກໍຕາມ, ການລົງທຶນໃນດ້ານເຄື່ອງຈັກ ແລະ ອຸປະກອນ ຍັງສືບຕໍ່ມີສິ່ງທ້າທ້າຍໂດຍຄ່າໃຊ້ຈ່າຍໃນການກູ້ຢືມທີ່ສູງຂຶ້ນ. ນອກຈາກນັ້ນ, ເງິນໂດລາທີ່ແຂງຄ່າ ແລະ ຄວາມຕ້ອງການທົ່ວໂລກທີ່ອ່ອນແອຍັງເຮັດໃຫ້ເກີດຄວາມຫຍຸ້ງຍາກໃຫ້ແກ່ຂະແໜງການຜະລິດ ຊຶ່ງກວມເອົາ 10,4% ຂອງພື້ນຖານເສດຖະກິດ ອາເມຣິກາ.
ທ່ານ ຊັລ ກົວຕິເອຣີ ນັກເສດຖະສາດອາວຸໂສຂອງ BMO Capital Markets ກ່າວວ່າ: ເຖິງແມ່ນວ່າຄ່າໃຊ້ຈ່າຍໃນການກູ້ຢືມເພີ່ມຂຶ້ນ ແລະ ມາດຕະຖານການກູ້ຢືມທີ່ເຄັ່ງຄັດ, ການລົງທຶນຂອງບໍລິສັດ ອາເມຣິກາ ສາມາດເພີ່ມຂຶ້ນໃນໄຕມາດທີ 2 ຂອງປີ 2024.
ບັນດານັກເສດຖະສາດຂອງ Goldman Sachs ໄດ້ເພີ່ມການຄາດຄະເນສໍາລັບການເຕີບໂຕ GDP ຂອງອາເມຣິກາ ໃນໄຕມາດທີສອງຂອງປີ 2024 ເປັນ 3,2%, ຈາກການຄາດຄະເນທີ່ຜ່ານມາແມ່ນ 3,1%.
ທະນາຄານກາງ ອາເມຣິກາ (Fed) ຄາດວ່າຈະເລີ່ມຫຼຸດອັດຕາດອກເບ້ຍໃນເດືອນກັນຍາທີ່ຈະມາເຖິງ. Fed ໄດ້ຮັກສາອັດຕາດອກເບ້ຍຢູ່ທີ່ 5,25% - 5,50% ນັບຕັ້ງແຕ່ເດືອນກໍລະກົດ 2023.