ຂ່າວສານຫວຽດນາມລາຍງານວ່າ: ໃນວັນທີ 28 ພຶດສະພາ ຜ່ານມາທ່ານ ໂມຮາມັດ ບິນ ຊາເຍດ ອັລ ນາຍານ ປະທານາທິບໍດີ ສະຫະລັດອາຣັບເອມິເຣດ (UAE) ໄດ້ຢ້ຽມຢາມທາງລັດຖະກິດຢູ່ ສ ເກົາຫຼີ ເປັນເວລາ 2 ວັນ ເພື່ອປຶກສາຫາລືກ່ຽວກັບວິທີການເປີດກວ້າງການຮ່ວມມືສອງຝ່າຍ, ພິເສດແມ່ນໃນຂົງເຂດພະລັງງານ ແລະ ປ້ອງກັນຊາດ. ນີ້ແມ່ນການຢ້ຽມຢາມ ສ ເກົາຫຼີ ຄັ້ງທຳອິດທາງລັດຖະກິດຂອງປະທານາທິບໍດີ UAE.
ຂ່າວລະບຸວ່າ: ຕາມຂ່າວສານ Yonhap (ສໍານັກຂ່າວຂອງ ສ ເກົາຫຼີ) ໃຫ້ຮູ້ວ່າ: ທ່ານ ໂມຮາມັດ ບິນ ຊາເຍດ ອັລ ນາຍານ ໄດ້ມີການເຈລະຈາກັບທ່ານ ຢຸນ ຊອກຢອນ ປະທານາທິບໍດີ ສ ເກົາຫຼີ ແລະ ພົບປະກັບບັນດາຜູ້ນຳວິສາຫະກິດສຳຄັນຂອງ ສ ເກົາຫຼີ. ຈຸດສຸມຂອງການພົບປະລະຫວ່າງການນຳສອງປະເທດເວົ້າລວມແມ່ນກ່ຽວຂ້ອງເຖິງການຮ່ວມມືໃນຂົງເຂດພະລັງງານ, ປ້ອງກັນປະເທດ ແລະ ການລົງທຶນ.
ໃນກອງປະຊຸມສຸດຍອດສອງຝ່າຍ, ທ່ານ ໂມຮາມັດ ບິນ ຊາເຍດ ອັລ ນາຍານ ໄດ້ປະກາດແຜນການລົງທຶນ 30 ຕື້ໂດລາ ເຂົ້າ ສ ເກົາຫຼີ ແລະ ໄດ້ລົງນາມໃນບົດບັນທຶກຊ່ວຍຈຳ 13 ສະບັບກ່ຽວກັບພະລັງງານ, ປ້ອງກັນປະເທດ ແລະ ການຮ່ວມມືກ່ຽວກັບການປ່ຽນແປງຂອງດິນຟ້າອາກາດ.