ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ກອງທຶນປະຊາກອນແຫ່ງສະຫະປະຊາຊາດ (UNFPA) ໄດ້ເປີດເຜີຍບົດລາຍງານໂດຍລະບຸວ່າ: ປະຊາກອນຜູ້ອາຍຸສູງໃນອິນເດຍອາດຈະເພີ່ມຂຶ້ນເປັນສອງເທົ່າພາຍໃນປີ 2050 ແລະ ຫຼາຍກວ່າຈຳນວນປະຊາກອນເດັກນ້ອຍພາຍໃນປະເທດ ຊຶ່ງອາດຈະກໍ່ໃຫ້ເກີດຄວາມທ້າທາຍທາງດ້ານວັດທະນະທຳ-ສັງຄົມ ແລະ ເສດຖະກິດ.

UNFPA ລະບຸວ່າ: ຈຳນວນປະຊາກອນອິນເດຍ ອາຍຸ 60 ປີຂຶ້ນໄປອາດຈະເພີ່ມຈາກ 149 ລ້ານຄົນໃນປີ 2022 ເປັນ 347 ລ້ານຄົນໃນປີ 2050 ແລະ ໃນປີ 2046 ຜູ້ອາຍຸສູງອິນເດຍອາດຈະມີຫຼາຍກວ່າຈຳນວນເດັກນ້ອຍເກີດໃໝ່ - 14 ປີ ແລະ ປະຊາກອນທີ່ມີອາຍຸລະຫວ່າງ 15-59 ປີຈະຫຼຸດລົງ. ປັດຈຸບັນ, ປະເທດທີ່ມີປະຊາກອນຫຼາຍທີ່ສຸດໃນໂລກມີໄວໜຸ່ມຕໍ່າກວ່າ 35 ປີຄິດເປັນອັດຕາສ່ວນ 65% ຂອງຈຳນວນປະຊາກອນທັງໝົດ. UNFPA ໄດ້ຄາດຄະເນວ່າ: ປະຊາກອນອິນເດຍໂດຍລວມຈະເພີ່ມຂຶ້ນ 18% ຈາກປີ 2022 ໄປເຖິງປີ 2050 ແລະ ປະຊາກອນຜູ້ອາຍຸສູງຈະເພີ່ມຂຶ້ນ 134%, ກຸ່ມຄົນທີ່ມີອາຍຸ 80 ປີຂຶ້ນໄປຈະເພີ່ມຂຶ້ນ 279% ໃນໄລຍະເວລາດຽວກັນ. ດ້ວຍຈຳນວນຜູ້ອາຍຸສູງໃນອິນເດຍເພີ່ມຂຶ້ນຈຳນວນຫຼາຍອາດຈະກໍ່ໃຫ້ເກີດຄວາມທ້າທາຍທາງດ້ານວັດທະນະທຳ-ສັງຄົມ ແລະ ເສດຖະກິດ.

ໂດຍອີງຕາມຜົນການສຶກສາຂອງ UNFPA ລາຍງານວ່າ: ແມ່ຍິງທີ່ເປັນໝ້າຍຈະເພີ່ມຂຶ້ນຫຼາຍເພາະແມ່ຍິງອາຍຸຍືນກວ່າຜູ້ຊາຍ ແລະ ແມ່ຍິງໃນຊົນນະບົດອິນເດຍຈະໄດ້ຮັບຜົນກະທົບຫຼາຍກວ່າແມ່ຍິງທີ່ອາໄສໃນເມືອງ ເນື່ອງຈາກພວກເຂົາອາດຈະປະເຊີນກັບຄວາມໂດດດ່ຽວ, ການຂົນສົ່ງທີ່ບໍ່ດີ ເຮັດໃຫ້ການເດີນທາງຍາກລຳບາກ ເກີດຄວາມບໍ່ໝັ້ນຄົງທາງດ້ານລາຍໄດ້ ແລະ ຂາດການເບິ່ງແຍງທາງການແພດທີ່ ເໝາະສົມ.